Amazon Music ka bërë të ditur se koncerti i Shakirës, i mbajtur më 3 tetor në Madrid, është bërë performanca e transmetuar drejtpërdrejt më e ndjekur nga një artiste femër në historinë e platformës.

Koncerti u transmetua në Amazon Music, Prime Video dhe Twitch, ndërsa u zhvillua në kuadër të turneut botëror të këngëtares kolumbiane, “Las Mujeres Ya No Lloran World Tour”, si pjesë e rezidencës së saj evropiane në Madrid.

Mbrëmja solli edhe një moment të veçantë për publikun, pasi Shakirës iu bashkua në skenë këngëtarja shqiptare me famë botërore, Dua Lipa. Dy artistet interpretuan së bashku, në një version akustik, këngën “Antología”.

Koncerti u mbajt në “Estadio Shakira”, një stadium i përkohshëm i ndërtuar në kompleksin Iberdrola Music, në zonën Villaverde të Madridit.

Transmetimi rekord ishte pjesë e fushatës vjetore të Amazon Music, “Music Connects Us”, e cila këtë vit mban temën “The Women Shaping Latin Music” dhe i kushtohet grave që kanë ndikuar dhe vazhdojnë të ndikojnë në zhvillimin e muzikës latine.

Amazon Music vlerësoi ndikimin e Shakirës në skenën ndërkombëtare, duke e cilësuar atë si një artiste që për më shumë se tri dekada ka ndihmuar në ndryshimin e perceptimit për artistët latinë në tregun global.

Ndërkohë, sipas të dhënave të Amazon Music, “Dai Dai”, bashkëpunimi i Shakirës me Burna Boy, është kënga më e dëgjuar në botë në platformë gjatë vitit 2026 deri më tani. Shakira është gjithashtu artistja latine më e dëgjuar në Amazon Music gjatë së njëjtës periudhë.

“Las Mujeres Ya No Lloran World Tour është bërë shumë më tepër nga sa mund ta kisha imagjinuar dhe jam shumë krenare për të”, është shprehur Shakira, duke thënë se është e emocionuar që këtë përvojë ta ndajë me fansat në mbarë botën./A.K/

Amazon Prime Video ka siguruar të drejtat ekskluzive globale për transmetimin e ceremonisë së çmimeve Emmy, përmes një marrëveshjeje gjashtëvjeçare që i jep fund transmetimit të ceremonisë në televizionet tradicionale amerikane.

Marrëveshja do të nisë në vitin 2027, duke zëvendësuar sistemin e deritanishëm të rotacionit mes rrjeteve të mëdha amerikane, si ABC, CBS, Fox dhe NBC. Ceremonia do të transmetohet drejtpërdrejt dhe falas në mbarë botën çdo shtator, pa qenë e nevojshme që shikuesit të kenë abonim në Prime Video.

Termat financiarë të marrëveshjes nuk janë bërë publikë.

Ky zhvillim është një tjetër dëshmi se si ngjarjet e mëdha televizive po zhvendosen gjithnjë e më shumë drejt platformave digjitale, në një kohë kur mënyrat e konsumimit të përmbajtjes po ndryshojnë. Edhe ceremonia e çmimeve Oscar do të transmetohet drejtpërdrejt globalisht në YouTube, duke nisur nga viti 2029.

Mike Proulx, drejtor kërkimor në Forrester, tha se modeli aktual i transmetimit të ceremonive të tilla nuk ishte më në përputhje me realitetin e televizionit modern.

“Programet që po e çojnë industrinë përpara kryesisht vijnë nga platformat e transmetimit, ndërsa ceremonitë e çmimeve kanë mbetur të lidhura me televizionin tradicional. Për këtë arsye, një platformë e madhe transmetimi si Prime Video ka kuptim për kapitullin e ardhshëm të Emmy-t”, tha Proulx.

Cris Abrego, kryetar i Television Academy, deklaroi se marrëveshja do t’i japë ceremonisë një shtrirje të paprecedentë globale, duke u mundësuar shikuesve në më shumë se 200 shtete ta ndjekin drejtpërdrejt.

“Televizioni nuk ka qenë kurrë më global dhe Emmy duhet të jetë një festë që mund ta ndajë e gjithë bota”, u shpreh Abrego.

Ndërkohë, Mike Hopkins, drejtues i Prime Video dhe Amazon MGM Studios, tha se platforma është e nderuar të bëhet “shtëpia globale” e ceremonisë, duke shtuar se transmetimi falas do t’u ofrojë audiencave në mbarë botën një përvojë të madhe argëtuese.

Marrëveshja shënon gjithashtu një moment të rëndësishëm për Amazon, pasi Prime Video siguron për herë të parë një transmetim të madh argëtues në këtë përmasë. Platforma ka ndërtuar tashmë një profil të fuqishëm në transmetimet live përmes sportit, përfshirë NFL, NBA dhe Ligën e Kampionëve.

Të ardhurat e fundit të Amazon kanë treguar rritje të ndjeshme të shikueshmërisë së transmetimeve sportive live. Sezoni i parë i NBA-së në Prime Video, për shembull, regjistroi shifra rekord, me 6.5 milionë shikues në ndeshjen e shtatë të serisë së gjysmëfinales së Konferencës Lindore.

Marrëveshja për Emmy e vendos Amazon në konkurrencë të drejtpërdrejtë me Google, platforma e së cilës YouTube ka siguruar të drejtat e ardhshme për transmetimin e Oscar.

Ndryshe nga YouTube, i cili mbështetet kryesisht në modelin e financuar nga reklamat, Amazon po përdor qasjen e transmetimit falas për të tërhequr audienca të mëdha globale dhe për të zgjeruar hapësirën e saj të reklamimit.

Kalimi ekskluziv i Emmy-t në Prime Video është një ndryshim i rëndësishëm për ceremoninë, duke i dhënë fund rotacionit mes rrjeteve kryesore televizive amerikane, një praktikë që daton që nga viti 1955. Kjo do të jetë hera e parë që ceremonia largohet tërësisht nga televizioni tradicional amerikan.

Çmimet Emmy u ndanë për herë të parë në vitin 1949 dhe nderojnë arritjet më të rëndësishme në aktrim, skenar dhe produksion, duke shërbyer si një prej ngjarjeve kryesore të industrisë globale të televizionit.

BBC

D.L

Një ditë e zakonshme pune gjatë Javës së Modës në Londër ndryshoi papritur jetën e 24-vjeçarit Soufian Boucetta, i cili po punonte si roje sigurie në një sfilatë të stilistes Simone Rocha.

Boucetta, me origjinë nga Girona e Spanjës dhe që jeton në Londër, tërhoqi vëmendjen e të pranishmëve për pamjen e tij. Një prej tyre publikoi një video të tij në rrjetet sociale, duke shkruar me shaka se koleksioni ishte i bukur, por vëmendjen e kishte marrë roja i sigurisë. Videoja u bë shpejt virale dhe mori më shumë se 900 mijë shikime.

Boucetta ka treguar se gjatë kohës që ishte në punë kishte vënë re se njerëzit po e shikonin, por nuk e kishte imagjinuar se dikush do ta publikonte në Instagram. Kur përfundoi ndërrimin dhe u kthye në shtëpi, zbuloi se videoja ishte shpërndarë gjerësisht.

Pas suksesit të videos, ai mori oferta dhe interesim nga agjenci modelingu në Milano, Paris dhe Shtetet e Bashkuara. Megjithatë, vendosi të qëndrojë në Britani dhe nënshkroi kontratë me agjencinë londineze PRM.

Para se të punonte në sektorin e sigurimit, Boucetta ishte marrë me ndërtimtari. Gjatë punës si roje sigurie kishte pasur mundësi të punonte edhe me figura të njohura ndërkombëtare, përfshirë Rihanna-n, Dwayne “The Rock” Johnson, Jason Statham dhe Aaron Pierre.

Edhe pse vazhdon të punojë herë pas here në sektorin e sigurisë, 24-vjeçari tashmë ka nisur përgatitjet për karrierën e re. Ai po ushtron ecjen në pasarelë dhe ka realizuar setet e para profesionale fotografike, ndërsa synon që në të ardhmen t’i përkushtohet plotësisht modelingut.

Boucetta ka treguar se gjatë viteve shpesh kishte marrë komente nga njerëzit për gjatësinë dhe pamjen e tij, madje thotë se disa herë deri në 15 persona në ditë i kishin sugjeruar të merrej me modeling.

Ajo që nisi si një video e publikuar rastësisht gjatë një dite pune, tashmë i ka hapur një kapitull të ri në karrierë. Boucetta thotë se është i emocionuar për botën e modelingut dhe për mundësitë që mund t’i sjellë kjo kthesë e papritur./A.K/

Jennifer Aniston, Courteney Cox, Lisa Kudrow, Matt LeBlanc dhe David Schwimmer nuk do të marrin pjesë në dokumentarin e ri të Netflix për aktorin e ndjerë Matthew Perry, sipas burimeve të cituara nga “Page Six”.

Bëhet fjalë për serialin dokumentar me tri pjesë “The One About Matthew Perry”, i cili do të trajtojë jetën, karrierën dhe betejën e aktorit me varësinë, përmes rrëfimeve të familjarëve, miqve dhe bashkëpunëtorëve të tij.

Sipas burimeve, pesë aktorët e “Friends” janë kontaktuar nga ekipi i dokumentarit, por kanë vendosur të mos marrin pjesë. Në vend të tyre, dokumentari do t’u japë hapësirë njerëzve të tjerë që e kanë njohur dhe kanë qenë pranë Perry-t gjatë jetës së tij.

Një burim ka thënë se për Jennifer Aniston, e cila ishte veçanërisht e afërt me Perry-n, do të ishte e vështirë ta përjetonte përsëri humbjen në mënyrë publike dhe para kamerave.

Dokumentari, i drejtuar nga Mary Robertson, do të përfshijë edhe rrëfimin e motrës së Perry-t, Mia Perry Bowick, si dhe fotografi dhe video të papublikuara nga arkivi privat i familjes.

Matthew Perry u bë i njohur në mbarë botën për rolin e Chandler Bing në serialin “Friends”, i cili u transmetua nga viti 1994 deri më 2004. Pas përfundimit të serialit, ai mbeti i afërt me bashkë-yjet e tij.

Perry ndërroi jetë në tetor të vitit 2023, në moshën 54-vjeçare. Sipas autoriteteve, shkaku i vdekjes ishte efektet akute të ketaminës. Hetimi për vdekjen e tij çoi në arrestimin e pesë personave, përfshirë asistentin e tij dhe dy mjekë.

Aktori kishte folur publikisht për betejën e tij me varësinë dhe për përpjekjet për t’u rehabilituar. Në vitin 2022 ai publikoi kujtimet “Friends, Lovers, and the Big Terrible Thing”, ku rrëfeu përvojën e tij personale me varësinë dhe shërimin./A.K/