Qeveria e Kosovës ka miratuar vendimin për rishikimin afatmesëm të strategjisë për sundimin e Ligjit dhe planit të veprimit 2025-2026.

Në mbledhjen e sotme të ekzekutivit, u miratua edhe rregullorja për mekanizmin koordinues lokal për mbrojtje nga dhuna në familje, dhunës ndaj grave si dhe dhunës në baza gjinore. Po ashtu në këtë mbledhje, qeveria emëroi Leonita Shabani-Mullarama sekretare të përgjithshme në Ministri të Ekonomisë

Ministrja e Drejtësisë, Albulena Haxhiu, tha se përmes miratimit të strategjisë për sundimin e ligjit synojnë gjyqësor dhe prokurori efikase..

“Janë dokumente të cilat janë të parapara në kuadër të planit kombëtar zhvillimor. Këto dokumente po i paraqesim para jush si rezultat i një procesi të gjatë dhe gjithëpërfshirës të përgatitjes së tyre. Në bazë të këtyre analizave të zhvilluara gjatë vitit të kaluar janë identifikuar sfidat që duhet të adresohen gjatë viteve të ardhshme. Prandaj plani i ri i veprimit identifikon pesë objektiva strategjike. Gjyqësori dhe prokurorinë efikase, profesionale dhe me integritet. Fuqizimin e sistemit të drejtësisë penale, fuqizimin e sistemit të drejtësisë civile dhe administrative, po ashtu edhe digjitalizimin e drejtësisë”, tha ajo.

Në anën tjetër, qeveria mori vendim që t’i vazhdohet mandati Komisionit për Verifikimin e Diplomave të Universitetit të Mitrovicës së Veriut edhe për 6 muaj.

Kryeministri Albin Kurti deklaroi se qëllimi i krijimit të këtij Komisioni ishte që t’u mundësohet qytetarëve të komunitetit joshumicë që t’i qasen tregut të punës dhe të kenë mundësi të barabarta brenda Administratës shtetërore.

“Çdo qytetar do ta ketë të drejtën për edukim dhe punësim. Për t’ua mundësuar qytetarëve tanë të komunitetit joshumicë të cilët studiojnë në Universitetin e Mitrovicës së Veriut që t’i qasen tregut të punës dhe mundësive të barabarta brenda Administratës shtetërore, kemi themeluar Komisionin për Verifikimin e Diplomave”, tha Kurti.

Krahas këtyre, qeveria miratoi udhëzimin administrativ për linjën telefonike emergjente për viktimat e dhunës në familje. Ndërkaq, Edi Gusia, drejtoreshë të Agjencisë për Barazi Gjinore.

Në mbledhjen e qeverisë së Kosovës është miratuar propozimi për themelimin e Komisionit për Narkotikë.

Kryeministri Albin Kurti tha se ky komision do të bëjë koordinimin e ministrive, autoriteteve të tjera kompetente në zbatimin e strategjisë së vendit për kontroll të narkotikëve dhe evitimin e keqpërdorimit të narkotikëve në Kosovë.

Ministri Arben Vitia ka thënë se Komisioni për Narkotikë përveç detyrave të përcaktuar me ligjin për barna narkotike, substanca psikotrope…, ka rol kyç për koordinimin e aktiviteteve të ministrive dhe subjekteve të tjera të kyçura në zbatimin e strategjisë për kontroll të narkotikëve dhe votimin e keqpërdorimit të narkotikëve në Kosovë.

“Ky komision do të ndërmarrë veprime parandaluese të cilat kanë për qellim informimin publik për pasojat e keqpërdorimit të narkotikëve, propozon hartimin e politikave dhe mekanizmave të tjerë të veprimit për të cilat do të ndikojë në adresimin e problematikave të keqpërdorimit të narkotikëve në nivel vendi”, tha Vitia.

Ish-ministrja dhe një prej kandidatëve më të votuara për deputete, Hykmete Bajrami, ka shkruar për deficitin e lartë tregtar që ka përfshirë Kosovën përgjatë katër viteve të Qeverisë Kurti.

Bajrami thotë se përgjatë mandatit të Kurtit, deficiti tregtar ka shkuar në rreth 19 miliardë euro, shifër kjo që është sa 10 vite të mëparshme bashkë.

“Nuk mund të flasësh për “suksese në eksport” duke heshtur për importet. Nëse e bën këtë, ose nuk e kupton ekonominë, ose po tenton të manipulosh qytetarët”, ka shkruar Bajrami.

Anëtarja e Kryesisë së Lëvizjes Vetëvendosje, Albulena Haxhiu, ka thënë se votat nga diaspora do të jenë përcaktuese për formimin e qeverisë, pas zgjedhjeve parlamentare të 9 shkurtit.

Ajo u shpreh e vendosur se Lëvizja Vetëvendosje do ta formojë qeverinë, derisa tha se partnerët e koalicionit tashmë janë Guxo dhe Alternativa.

Numërimi i votave nga diaspora dhe atyre me kusht do të numërohen sot në Qendrën e Numërimit dhe Rezultateve nga KQZ-ja.

“Ne jemi fitues i qartë i këtyre zgjedhjeve. Lëvizja Vetëvendosje është fituese e qartë e këtyre zgjedhjeve. Neve na takon obligimi për formimin e institucioneve pas certifikimit të rezultatit zgjedhor. Siç e dini, Lëvizja Vetëvendosje i ka partnerët e koalicionit të cilët janë Guxo dhe Alternativa. Ne duhet të presim edhe pak… Votat e diasporës janë shumë të rëndësishme dhe janë përcaktuese që qeveria jonë të formohet dhe të drejtohet nga kryeministri Kurti. Uroj që ky proces mos të zgjasë më tepër”, tha Haxhiu.

Haxhiu, e cila është edhe ministre në detyrë e Drejtësisë, në konferencën për media pas mbledhjes së qeverisë, u shpreh më e rezervuar për një koalicion më të gjerë që do të përfshinte edhe procesin e zgjedhjes së presidentit.

Ajo tha se ky proces zhvillohet vitin e ardhshëm dhe se tani fokusi është vetëm te formimi i qeverisë.

“Sa i përket zgjedhjes së presidentit, shkove larg pasi si proces do të zhvillohet vitin e ardhshëm. Prandaj le të fokusohemi njëherë te qeveria”, shtoi Haxhiu.

Duke folur për mbylljen e katër objekteve të qendrës për punë sociale serbe në veri, ajo tha se veprimet e institucioneve të sigurisë nuk janë kundër partnerëve të Kosovës.

Haxhiu shtoi se aty janë kryer veprime të paligjshme lidhur me procesin zgjedhor.

“Veprimet e institucioneve të sigurisë nuk janë kundër partnerëve tanë apo kundër qytetarëve në Republikën e Kosovës. Përkundrazi, këto qendra janë mbyllur nga Policia e Kosovës sepse dyshohet që përmes tyre është ndërhyrë apo është bërë presion për zgjedhjet e 9 shkurtit, duke kushtëzuar votën e qytetarëve të komunitetit serb. Unë besoj se e keni parë se vetë shefja e misionit të BE-së për vëzhgimin e zgjedhjeve në Kosovë ka deklaruar se Serbia ka ndërhyrë në procesin zgjedhor… Këto qendra dyshohet se kanë qenë instrumenti i ndërhyrjes prandaj edhe ka pasur reagim ligjor dhe të duhur institucional. Ne kemi përgjegjësi ndaj ligjit dhe Kushtetutës që të sigurojmë integritetin e procesit zgjedhor”, deklaroi Haxhiu.

Në anën tjetër, Haxhiu u shpreh më e rezervuar të komentojë arrestin shtëpiak të ministrit të Zhvillimit Rajonal, Fikrim Dama, i cili dyshohet për “sulm fizik” dhe “kanosje të dy personave”.

“S’kemi informacione sesi ka ndodhur rasti. Unë nuk kam pasur komunikim me ministrin Damka dhe nuk mund të jap më shumë informacione pasi si kam ato. Presim vendimin e institucioneve pa dashur të paragjykojmë fajësinë”, tha Haxhiu.

Në përgjithësi, gjatë periudhës së regjistrimit, nga 104,924 shtetas të regjistruar për votim jashtë Kosovës, 84,600, ishin regjistruar për të votuar përmes postës dhe 20,324 të tjerë ishin regjistruar për votimin fizik në përfaqësitë diplomatike.

Nga 20,324 në përfaqësi diplomatike kanë votuar 15,352 votues, ndërkaq në votimin përmes postës KQZ ka pranuar rreth 69 mijë pako me fletëvotime.