Pavarësisht se bëri histori me albumin e saj të muzikës country në Grammy të këtij viti , duket se Beyonce ende po përpiqet të shesë biletat e stadiumeve , me vende të shumta në dispozicion vetëm disa orë para natës së hapjes.

Këngëtarja 43-vjeçare e hitit Texas Hold ‘Em nisi zyrtarisht turneun prej 32 stadiumesh “Cowboy Carter” në stadiumin SoFi në Los Angeles të hënën në mbrëmje. Prej andej, superylli i popit do të performojë në SHBA dhe Evropë përpara se të mbyllë koncertin në Las Vegas më 26 korrik.

Javën e kaluar në stadiumin SoFi kishte më shumë se 3,000 vende të lira, me një numër të madh vendesh ende të lira vetëm pak çaste para se ajo të ngjitej në skenë të hënën në mbrëmje, sipas hartave të vendeve në Ticketmaster.

Duke folur për DailyMail.com, një burim i brendshëm pohoi se rishitësit – individë ose biznese që blejnë sasi të mëdha biletash koncertesh dhe ua shesin fansave me çmime të tepruara, janë fajtorë për pjesëmarrjen e kufizuar.

Burimi i brendshëm pohoi se Beyoncé dhe Jay-Z kishin mbetur me shpresë dhe ‘presin që më shumë fansa të saj të blejnë bileta sot e në ditët në vijim nëse rishitja bëhet më e lirë’. Por, kur bëhet fjalë për ndryshimin e biletave, Beyoncé po has vështirësi në krahasim me turnetë e mëparshëm në stadiume .

Një pjesë e kritikave të hershme erdhën nga adhuruesit që shprehën pakënaqësi për çmimet e larta fillestare.

“Jam shumë e lumtur që ndodhi kjo. Çmimet ishin absurde që në fillim”, ka shkruar një përdoruese në X (ish-Twitter).

“Daily Mail” citon një fans që krahasoi një biletë në tribunat më të larta me një menu të restorantit të njohur të ushqimit të shpejtë McDonald’s.

“Për shkak të kërkesës së ulët, biletat për turneun ‘Cowboy Carter’ të Beyoncét ($20) janë më të lira se menu ‘Minecraft’ në McDonald’s ($21.39)”, shkroi ai.

Megjithatë, shumë nga këto bileta të lira janë bileta të rishitura, pra jo të shitura direkt nga organizatorët, por nga individë që i kanë blerë më herët për t’i shitur me fitim. Kur nuk arrijnë t’i shesin, ata i ulin çmimet drastikisht, një fenomen i njohur në industrinë e muzikës live.

Një burim i brendshëm ka thënë për “Daily Mail” se “çmimet mund të bien në mbrëmje për disa data, nëse ulëset duken bosh”.

Kjo nuk është strategji e panjohur – është praktikë e zakonshme për të mbushur stadiumet deri në fund.