Dy oficerë janë qëlluar për vdekje, ndërsa një tjetër ka mbetur i plagosur në një qytet të Australisë. Policët do ekzekutonin urdhërarrestin kundrejt një personi për krime seksuale në Porepunkah, në verilindje të Viktorias, në momentin që janë zënë në pritë.

Autori i të shtënave me armë është arratisur, ndërsa autoritetet përkatëse janë vënë në ndjekje të tij, shkruan rtsh.al.

Policia u ka kërkuar qytetarëve që të shmangin zonën, ndërsa shkolla fillore që ndodhet në afërsi të vendngjarjes dhe ndërtesat e këshillit janë mbyllur përkohësisht.

Kryeministri i Australisë, Anthony Albanese, ka reaguar mbi ngjarjen e rëndë, duke qëndruar në krah të oficerëve.

“Mendimet tona janë me policinë për punën që bëjnë, çdo ditë. Burrat dhe gratë që veshin uniformën tonë, veshin uniformën e policisë, marrin rreziqe çdo ditë. Komisioneri i policisë së Viktorias do të japë një përditësim këtë pasdite ndërsa më shumë fakte që mund të publikohen bëhen të qarta”, tha ai.

Shoqata Federale e Policisë Australiane ka lëshuar një deklaratë ku shpreh ndjenjat e saj më të thella për oficerët, familjet dhe kolegët e Policisë së Viktorias të prekur nga incidenti i sotëm.

Janë bërë 27 vjet nga vrasja e 11 anëtarëve të familjes Asllani. Më 26 gusht të vitit 1998, forcat serbe kanë vrarë 11 anëtarë të familjes Asllani në Rancë të Shtimes, prej të cilëve 8 ishin fëmijë të moshave të ndryshme dhe tri gra.

Në këtë ngjarje të dhimbshme kanë humbur jetën: Jalldyze Asllani (1934), Halide Asllani (1963), Ajshe Asllani (1971), Burim Asllani (1985), Lumnije Asllani (1986), Ejup Asllani (1988), Luljeta Asllani (1991), Shpend Asllani (1993), Xhafer Asllani, (1995), Antigona Asllani (1997) dhe Albiona Asllani (1998).

Atë ditë të kobshme në këtë fshat nga forcat serbe u ekzekutua edhe plaku 96-vjeçar, Zeqir Asllani.

Me rastin e 115-vjetorit të lindjes së Shën Nënë Terezës dhe 20-vjetorit të bekimit të gurthemelit të Katedrales që mban emrin e saj “Shën Nënë Tereza” në Prishtinë organizohet një mbrëmje solemne kulturore, duke filluar nga ora 19:30.

Ngjarja do të mbahet në ambientet e katedrales dhe ka për qëllim të nderojë jetën, veprën dhe trashëgiminë e pavdekshme të humanistes shqiptare, e cila u bë simbol botëror i dashurisë, përkushtimit dhe mëshirës ndaj të varfërve.

Në këtë mbrëmje të veçantë pritet të performojnë artistë të njohur nga të gjitha trevat shqiptare, të cilët do të sjellin përmes muzikës dhe artit një mesazh mirënjohjeje, paqeje dhe dashurie në nder të figurës së Shën Nënë Terezës, e njohur nga mbarë bota si “Nëna e madhe e Globit”.

“Unë gjithmonë e kam në zemër popullin tem shqiptar. Shumë e luti Zotin që paqja e tij të vijë në zemrat tona, në gjitha familjet tona, në gjithë botën. Luti shumë për fukarat e mij dhe për mua dhe motrat e mija. Unë lutem për juve”, këto janë fjalët e Shën Nënë Terezës.

Nobelistja shqiptare Gonxhe Bojaxhiu-Nëna Terezë u lind më 26 gusht 1910 në Shkup, atëherë pjesë e Vilajetit të Kosovës në Perandorinë Osmane. Pasi kishte jetuar në Maqedoni për tetëmbëdhjetë vjet, ajo u shpërngul në Irlandë dhe më pas në Indi, ku jetoi pjesën më të madhe të jetës së saj.

Nënë Tereza themeloi Misionarët e Bamirësisë, një kongregacion fetar i cili në vitin 2012 kishte më shumë se 4.500 motra dhe ishte aktiv në 133 shtete.

Nënë Tereza është nderuar me çmimet dhe nderimet më të larta, duke përfshirë: më 1962 Çmimin e Paqes Ramon Magsaysay dhe 1979 Çmimin Nobel për Paqe.

Më 19 tetor 2003, ajo u lumturua dhe u quajt “Tereza e Bekuar e Kalkutës”. Për t’u kanonizuar në shenjtore, asaj duhej t’i njihej një mrekulli e dytë, në bazë të rregullave të kishës katolike.

Një mrekulli e dytë i është njohur nga Papa Françesku, në dhjetor 2015, duke i hapur rrugën që ajo të shpallet e shenjtë nga Kisha Katolike e Romës. Kanonizimi i saj është bërë më 4 shtator 2016, një ditë para 19-vjetorit të vdekjes së saj (5 shtator), ku njihet edhe si dita e saj e festës.

Një figurë e diskutueshme si gjatë jetës dhe pas vdekjes së saj, Nënë Tereza u admirua gjerësisht nga shumë njerëz për veprat e saj bamirëse.

Qendra Kombëtare Operacionale e Emergjencave Civile (QKOEC) pranë Agjencisë Kombëtare të Mbrojtjes Civile (AKMC) ka bërë të ditur se janë regjistruar 10 vatra zjarri në të gjithë vendin. Prej tyre, 6 vatra janë shuar plotësisht, ndërsa 4 të tjera mbeten aktive, duke angazhuar forca të shumta zjarrfikëse, helikopterë dhe burime lokale për të kontrolluar situatën.

Situata në Vlorë

Një nga situatat më shqetësuese është raportuar në fshatin Pishë-Poro, njësia administrative Novoselë, bashkia Vlorë. Zjarri, i cili ka rënë në një terren ranor në fshatin Delisuf, është përhapur me shpejtësi për shkak të erërave të forta, duke marrë një shtrirje të konsiderueshme.

Terreni i vështirë ranor ka pamundësuar ndërhyrjen e drejtpërdrejtë të mjeteve zjarrfikëse, edhe pse në zonë janë të angazhuara 3 automjete zjarrfikëse me 12 efektivë, 4 forca të Administrimit të Zonave të Mbrojtura (AdZM) dhe 10 forca bashkiake.

Vatra aktive në Kolonjë, Tiranë dhe Skrapar

Në Parkun Natyror Gërmenj, njësia administrative Leskovik, bashkia Kolonjë, zjarri është riaktivizuar gjatë ditës së sotme pranë piramidës 15. Forcat zjarrfikëse të MZSH Kolonjë janë të angazhuara në terren për të kontrolluar situatën, por sfida mbetet për shkak të terrenit të vështirë.

Në fshatin Pezë Helmës, njësia administrative Pezë, bashkia Tiranë, zjarri vazhdon të jetë aktiv në disa vatra, në një zonë me bimësi të dendur dhe pa rrugëkalime, çka e bën të pamundur ndërhyrjen e drejtpërdrejtë të forcave zjarrfikëse.

Sipas AKMC-së zjarrfikësit janë në gatishmëri 24-orëshe, të pozicionuar kryesisht pranë banesave të afërta, por larg vatrës kryesore të zjarrit, për të parandaluar rrezikun për banorët.

Në fshatin Bogovë, njësia administrative Bogovë, bashkia Skrapar, një vatër zjarri ka shpërthyer fillimisht në një hangar dhe më pas është përhapur në një sipërfaqe pyjore me pisha.

Tre grupe shërbimi nga MZSH Skrapar po operojnë në vendngjarje, dhe situata raportohet të jetë nën kontroll, pa rrezik të menjëhershëm për banesat.

Vatrat e izoluara plotësisht

QKOEC raportoi se 6 vatra zjarri janë izoluar dhe shuar plotësisht duke nisur me fshatin Krenze, njësia administrative Shtiqën, bashkia Kukës; fshati Reç, njësia administrative Shkrel, bashkia Malësi e Madhe; fshati Bisht-Kamëz, njësia administrative Katund i Ri, bashkia Durrës; fshati Ishull-Shëngjin, njësia administrative Shëngjin, bashkia Lezhë; Lagjja 18, Rajoni Nr.1, bashkia Korçë; zona e Shkozës, njësia administrative Nr.1, bashkia Tiranë, shkruan RTSH.

Autoritetet po koordinojnë përpjekjet mes forcave zjarrfikëse, administratës lokale, Forcës Ajrore dhe partnerëve ndërkombëtarë për të menaxhuar situatën.

Angazhimi i helikopterëve nga Emiratet e Bashkuara Arabe tregon mbështetjen ndërkombëtare për Shqipërinë në përballimin e këtyre emergjencave.

QKOEC ka njoftuar se monitorimi i situatës vijon dhe ka bërë thirrje për kujdes të shtuar nga qytetarët, veçanërisht në zonat e prekura nga thatësira dhe erërat e forta, të cilat favorizojnë përhapjen e zjarreve.