Kërkesa më e fundit për lirim me kusht e Mark David Chapman, njeriut që vrau ish-anëtarin e grupitThe Beatles, John Lennon, më 1980 në Manhattan, është refuzuar për herë të 14-të, njoftuan autoritetet korrektuese të Nju Jorkut.

Chapman, 70 vjeç, u paraqit përpara komisionit të lirimeve me kusht më 27 gusht, ndërsa vendimi u publikua së fundmi në internet nga Ministria përkatëse e SHBA-ve.

John Lennon u qëllua për vdekje natën e 8 dhjetorit 1980 nga Chapman, i cili në atë kohë ishte 25 vjeç, teksa ky i fundit po kthehej në apartamentin e tij në zonën Upper West Side së bashku me bashkëshorten, Yoko Ono.

Më herët atë ditë, Lennon i kishte dhënë një autograf Chapman-it mbi një kopje të albumit “Double Fantasy”. Vrasësi u arrestua brenda pak minutash pranë vendngjarjes, duke mbajtur në duar romanin e J.D. Salinger, “The Catcher in the Rye”.

Procesverbali i plotë nga seanca e fundit e dëgjimit ende nuk është bërë publik. Megjithatë, në të kaluarën, Chapman ka shprehur pendesë për krimin e kryer.

“E dija çfarë po bëja dhe e dija që ishte gabim. E dija që ishte e keqe, por e dëshiroja famën aq shumë sa isha i gatshëm të bëja gjithçka, madje edhe të merrja një jetë njerëzore,” kishte deklaruar tre vite më parë gjatë një seance të mëparshme me komisionin.

Aktualisht, Chapman po vuan një dënim prej 20 vitesh deri në burgim të përjetshëm në institucionin korrektues Green Haven, në veri të Nju Jorkut. Ai do të ketë të drejtën të paraqesë një kërkesë për lirim me kusht në shkurt të vitit 2027, sipas agjencisë Associated Press.

Ministri spanjoll i Kulturës, Ernest Urtasun, tha se vendi do të tërhiqet nga pjesëmarrja në Eurovision 2026 nëse Izraeli nuk përjashtohet.

“Nuk mendoj se mund ta normalizojmë pjesëmarrjen e Izraelit në evente ndërkombëtare sikur s’po ndodh asgjë.”

Gjatë një interviste, Urtasun tha se pjesëmarrja e Izraelit në konkurs nuk mund të tolerohet.

“Ngjarje si Eurovision apo Vuelta a España sjellin një përfaqësim të veçantë të vendit”, tha ai duke iu referuar protestave kundër ekipit të çiklistëve Israel-Premier Tech gjatë këtij edicioni të garës.

“Në rastin e Eurovision nuk është një artist individual që merr pjesë, por dikush që merr pjesë në emër të qytetarëve të atij vendi.”

Urtasun tha se nëse Izraeli merr pjesë e “nuk ia dalim ta përjashtojmë, do duhen të merren masa”, rikujtoi se kryeministri Pedro Sánchez i kishte bërë thirrje më parë European Broadcasting Union, i cili organizon konkursin, për të mos lejuar Izraelin në konkursin ndërkombëtar.

Urtasun theksoi se denoncimi i “gjenocidit” në Gaza nuk është antisemitik dhe e përshkroi Izraelin si “qeveri gjenocidale”.

Ai sqaroi se vendimi i tërheqjes nga Eurovision do të jetë në dorën e RTVE (Korporata Spanjolle e Radios dhe Televizionit), e cila ka shprehur shqetësim për pjesëmarrjen e Izraelit në Eurovision pas vitit të shkuar.

Edhe drejtuesi i transmetuesit kombëtar slloven, RTVSLO, ka njoftuar se me gjasë vitin e ardhshëm do të tërhiqet nga konkursi nëse Izraeli merr pjesë.

Pas 19 muajsh, Princi Harry është takuar sërish me babanë e tij, Mbretin Charles III, në një takim privat këtë të mërkurë në Londër, duke ringjallur shpresat për një pajtim mes tyre.

CNN raporton se kanë pirë çaj privatisht në Clarence House. Harry u pa duke mbërritur me Range Rover rreth 17:20 dhe doli pas një ore.

Ky ishte takimi i tyre i parë që nga shkurt 2024, kur Harry udhëtoi për një vizitë të shkurtër në Britani pas diagnostikimit të babait të tij me kancer. Në prill, ai nuk arriti të takohej me të atin pasi Charles ndodhej në një vizitë shtetërore në Itali.

Harry ka shprehur publikisht dëshirën për të pajtuar marrëdhëniet.

“Disa anëtarë të familjes sime kurrë nuk do të më falin për librin tim… por unë dua të pajtohem me familjen time. Nuk ka më kuptim të vazhdojmë të grindemi,” deklaroi ai për BBC-në në maj.

Marrëdhëniet me vëllanë, princin William, mbeten të tensionuara. William është i përqendruar tek gruaja e tij, Princesha Kate, gjatë trajtimit të saj për kancer. Ndërkohë, Harry ka qenë aktiv në Londër me angazhime bamirësie.

“Po, është shumë mirë, faleminderit,” tha ai për gjendjen shëndetësore të babait të tij.

Ai shpalli donacion 500 mijë dollarësh për fëmijët e plagosur në Gaza dhe Ukrainë, duke theksuar se asnjë organizatë nuk mund ta zgjidhte këtë vetëm. “Duhen partneritete për të siguruar që fëmijët të mbijetojnë e rikuperohen pas plagëve të shkaktuara” shtoi ai.

Vizitën e tij në Britani, Harry do ta përmbyllë të enjten me një aktivitet bamirësie në kuadër të fondacionit “The Diana Award”, para se të kthehet në Shtetet e Bashkuara.

Përgatiti: A.Z. /UBT News/