Profesorët e UBT-së, Prof. Dr. Visar Hoxha dhe Prof. Dr. Fisnik Laha, realizuan një vizitë zyrtare në kuadër të programit Erasmus+ në Universitetin Politeknik të Valencias (UPV) dhe në Instituto Universitario de Investigación – ICITECH.

Prof. Dr. Visar Hoxha zhvilloi sesione strategjike me studiues të UPV-së për thellimin e bashkëpunimit në kërkime eksperimentale mbi përdorimin e mbetjeve organike me aciditet të lartë, me qëllim rritjen e efikasitetit energjetik të tullave dhe materialeve ndërtimore, duke përdorur modelimin parashikues me inteligjencë artificiale.

Prof. Dr. Fisnik Laha zhvilloi diskutime shkencore mbi mbrojtjen kundër korrozionit të materialeve ndërtimore nga kloruret, një fushë kritike për ndërtimet në mjedise me përmbajtje të lartë kripërash dhe në zona bregdetare.

Gjatë vizitës, u realizuan gjithashtu takime me doktorantë nga Universiteti i Pekinit, i renditur i 14-ti në botë sipas renditjes prestigjioze QS World University Rankings, me qëllim shkëmbimin e përvojave dhe nxitjen e bashkëpunimit ndërkombëtar në fushën e kërkimit shkencor.

Një nder dhe kënaqësi e veçantë për profesorët e UBT-së ishte të dëgjonin nga stafi akademik i Universitetit Politeknik të Valencias vlerësimet maksimale për dy studentët e UBT-së, Diellza Vishi dhe Leart Shabani, të cilët kanë shënuar rezultate të shkëlqyera gjatë mobilitetit të tyre.

UBT po thellon partneritetet akademike dhe kërkimore me universitetet më të njohura në botë, në funksion të zhvillimit shkencor dhe inovacionit në Kosovë dhe më gjerë.

Në kuadër të Akademisë Verore të Fakultetit të Arkitekturës dhe Planifikimit Hapësinor si dhe Fakultetit të Inxhinierisë së Ndërtimit dhe Infrastrukturës në UBT, u zhvilluan me sukses aktivitetet e ditës së dytë, me theks të veçantë në bashkëpunimin ndërdisiplinor mes studentëve të të dy fushave.

Dita nisi me një ligjëratë të veçantë nga Prof. Bledian Nela, ekspert i njohur i fushës së ndërtimtarisë, i cili trajtoi qasjet moderne dhe inovative në planifikimin e hapësirave urbane, me fokus të veçantë në ndërtimet nëntokësore dhe strukturat funksionale për trafikun urban. Në këtë sesion mori pjesë edhe shkrimtari Elvi Sidheri, si shembull frymëzues për studentët në aspektin e dizajnit bashkëkohor dhe zgjidhjeve të qëndrueshme arkitektonike.

Aktivitetet vazhduan me punë intensive të studentëve, të cilët ishin të ndarë në grupe të përbashkëta të përbëra nga arkitektë dhe inxhinierë ndërtimi. Qëllimi i bashkëpunimit ishte krijimi i zgjidhjeve të integruara për parkime urbane, nënkalime, menaxhim të trafikut dhe përmirësim të transportit publik, duke reflektuar nevojat reale të qyteteve të Kosovës dhe më gjerë.

Studentët po përdorin metoda të avancuara të projektimit, duke analizuar terrenin dhe fluksin e qarkullimit për të ofruar propozime konkrete dhe funksionale, të cilat do të prezantohen në fund të Akademisë përballë një paneli profesional vlerësues.

Ky bashkëpunim ndërdisiplinor jo vetëm që forcon aftësitë praktike dhe analitike të studentëve, por shërben edhe si një model i suksesshëm i edukimit të integruar, që i përgatit ata për sfidat reale të tregut të punës dhe për ndërtimin e qyteteve të së ardhmes.

Profesori i UBT-së, Musa Sabedini, ka realizuar një tjetër sukses akademik me publikimin e punimit shkencor në revistën ndërkombëtare Journal of Global Perspectives on Society, Culture, and Development (JGPSCD), e cila botohet në Shtetet e Bashkuara të Amerikës nga MK Science Set Publishers, me ISSN 3067‑8358 dhe me sistem vlerësimi shkencor “double-blind peer review”.

Punimi me titull “A janë lajmet e rreme (dezinformimi) armiku më i madh i Etikës, në gazetarinë profesionale në Kosovë?” trajton një tematikë aktuale dhe me rëndësi të veçantë për zhvillimin e gazetarisë etike dhe profesionale në Kosovë, në një kohë të mbushur me sfida të dezinformimit dhe lajmeve të rreme.

Ky punim, i cili është i pajisur me DOI zyrtar, përbën një kontribut domethënës në fushën e studimeve të gazetarisë dhe etikës mediale, duke pasuruar kështu literaturën akademike dhe duke rritur profilin ndërkombëtar të UBT-së në kërkim shkencor.

Profesori Sabedini është autor i tre librave shkencorë në fushën e gazetarisë dhe etikës, përfshirë:

• Etika, mburojë e gazetarisë profesionale (2025), promovuar në UBT
• Gazetaria Online në Kosovë dhe në rajon: Etika dhe sfidat e vetërregullimit (2024)
• Mediet, etika, raportimet për situata të ndjeshme (2023)

Ai ka prezantuar mbi 11 punime shkencore në konferenca ndërkombëtare dhe gëzon mbi 33 vite përvojë në gazetarinë informative dhe hulumtuese. Është themeltar dhe redaktor i portalit RajoniPress, i njohur për raportime profesionale mbi çështje të ndjeshme si korrupsioni dhe krimi i organizuar.

Për angazhimin e tij në gazetari, Sabedini është katër herë fitues i çmimit “Gazetari i Vitit” në Kosovë, ndërsa ka ndjekur trajnime të avancuara në SHBA, përfshirë edhe në University of Missouri – Columbia, në fushën e gazetarisë hulumtuese dhe luftës kundër korrupsionit.

Në kuadër të Akademisë Verore të Fakultetit Juridik në UBT, u mbajt një punëtori me temën “Drejtësia për të Mitur në Praktikë”, ku studentët patën mundësinë të zhvillojnë aftësitë e tyre praktike përmes diskutimit të rasteve konkrete dhe simulimeve profesionale.

Punëtoria u pasurua me pjesëmarrjen e dy mysafirëve të veçantë nga institucionet kyçe të sistemit të drejtësisë për të mitur në Kosovë:

• Ismail Dibrani, Drejtor i Shërbimit Korrektues të Kosovës
• Arsim Tahiri, Drejtor i Shërbimit Sprovues të Kosovës

Të ftuarit ndanë përvojat e tyre profesionale dhe theksuan rëndësinë e bashkëpunimit ndërinstitucional në trajtimin e të miturve në konflikt me ligjin. Ata vlerësuan lartë këtë iniciativë të Fakultetit Juridik, duke kontribuar me diskutime dhe këshilla konkrete që ndihmuan studentët të thellojnë njohuritë e tyre praktike në këtë fushë të specializuar të së drejtës.