Bashkimi Evropian ka vendosur të zgjasë për gjashtë muaj të tjerë të gjitha sanksionet ekonomike kundër Federatës Ruse. Vendimi u mor gjatë samitit të liderëve të BE-së më 26 qershor në Bruksel, dhe u konfirmua zyrtarisht nga Këshilli i BE-së në një deklaratë publike.

“Këshilli zgjati masat kufizuese sektoriale të BE-së kundër Federatës Ruse deri më 31 janar 2026,” thuhet në njoftim.

Sanksionet ekonomike ndaj Rusisë u vendosën për herë të parë në korrik 2014, pas aneksimit të Krimesë dhe destabilizimit të situatës në Ukrainën lindore. Prej asaj kohe, ato janë rinovuar çdo gjashtë muaj në përgjigje të zhvillimeve në terren dhe qëndrimit të Moskës.

Masat kufizuese përfshijnë ndalime në sektorët financiar, energjetik dhe të mbrojtjes, si dhe kufizime në eksportin e teknologjive të avancuara.

Zgjatja e fundit vjen në një moment tensionesh të shtuara mes BE-së dhe Rusisë, përfshirë çështjet e sigurisë në Ukrainë, ndikimin në vendet e Ballkanit dhe politikat energjetike.

Ministri i Jashtëm rus, Sergey Lavrov, deklaroi se rritja e konsiderueshme e shpenzimeve të NATO-s për mbrojtjen do të dëmtojë vetë aleancën, duke e çuar atë drejt shpërbërjes. Deklarata u bë pas takimit të Këshillit të Ministrave të Jashtëm të Organizatës së Traktatit të Sigurisë Kolektive (CSTO).

“Ai ndoshta mund ta kuptojë – meqenëse është një njeri kaq i mençur – se rritja katastrofike e shpenzimeve të vendeve të NATO-s do të çojë gjithashtu në rrëzimin e kësaj organizate,” tha Lavrov, duke iu referuar homologut të tij polak, Radoslaw Sikorski, i cili kishte parashikuar se përforcimi ushtarak i Rusisë do të sillte rënien e saj.

Lavrov shtoi se ndryshe nga NATO, Rusia po ndjek një qasje më të përmbajtur dhe pragmatike. Ai kujtoi se Presidenti Vladimir Putin, gjatë një takimi të fundit në Minsk, kishte theksuar synimin për të ulur shpenzimet ushtarake dhe për t’u udhëhequr nga “logjika e shëndoshë”, në vend të “kërcënimeve imagjinare”.

Vendet e NATO-s kanë rënë dakord të rrisin shpenzimet e mbrojtjes në 5% të PBB-së, sipas komunikatës së miratuar pas Samitit të NATO-s të mbajtur në Hagë më 24-25 qershor.

Konferenca e OKB-së mbi Financimin e Zhvillimit nis sot në qytetin spanjoll të Seviljes me fokus në trajtimin e pabarazisë globale, mes një mungese të madhe financimi pas shkurtimeve drastike të ndihmës amerikane nën drejtimin e presidentit Donald Trump.

Trump uli më shumë se 80% të financimit të USAID-it, i cili më parë përbënte afërsisht një të katërtën e financimit total ndërkombëtar të zhvillimit.

Konferenca që ndodh një herë në një dekadë, e cila zgjat deri të enjten, synon të ofrojë zgjidhje konkrete për të adresuar nevojat kritike globale, duke përfshirë urinë, varfërinë, mbrojtjen e klimës, shëndetin dhe paqen.

Ajo gjithashtu do të theksojë bashkëpunimin ndërkombëtar dhe rindërtimin e besimit shumëpalësh.

Sipas organizatorëve, një fokus qendror do të jetë ristrukturimi i financimit për 17 Objektivat e Zhvillimit të Qëndrueshëm (SDG) të Kombeve të Bashkuara, të cilat u miratuan në vitin 2015 me një datë që synon vitin 2030.

Objektivat adresojnë çështje të tilla si varfëria, shëndetësia, arsimi, veprimi klimatik dhe barazia.

Një marrëveshje e re mbi financimin e zhvillimit global,  pritet të miratohet gjatë konferencës nga shtetet anëtare pjesëmarrëse të OKB-së.

SHBA e cila nuk merr pjesë, nuk e nënshkruan marrëveshjen paraprakisht.

Nga perspektiva e avokatëve të zhvillimit, nevojiten veprime më ambicioze.

Konferenca e fundit e tillë u mbajt në vitin 2015 në Addis Ababa. /atsh

Presidenti i SHBA-së, Donald Trump deklaroi se “nuk ka kontaktuar me qeverinë e Teheranit” që nga sulmet ndaj objekteve bërthamore të Iranit dhe se nuk i ka bërë asnjë ofertë Iranit, transmeton Anadolu.

Trump bëri një deklaratë në “Truth Social lidhur me procesin pas sulmeve ndaj objekteve bërthamore të Iranit.

“Dikush t’i thotë atij senatori demokrat, Chris Coons se unë nuk i ofrova asgjë Iranit“, tha Trump.

Ai tha se ish-presidenti i SHBA-së, Barack Obama i pagoi miliarda dollarë Iranit dhe se nuk do të bënte të njëjtën gjë. Trump argumentoi se Plani i Përbashkët Gjithëpërfshirës i Veprimit (JCPOA) kishte humbur vlefshmërinë e tij.

Trump theksoi se “nuk ka kontaktuar me qeverinë e Teheranit” që nga sulmet ndaj objekteve bërthamore të Iranit.

– Konflikti që filloi me sulmet e dhunshme të Izraelit ndaj Iranit

Më 13 qershor, Izraeli nisi sulme në shkallë të gjerë duke synuar objektet bërthamore në qytete të ndryshme të Iranit si dhe komandën e lartë ushtarake.

Në Iran, shefi i Shtabit të Përgjithshëm, komandanti i Përgjithshëm i Korpusit të Gardës Revolucionare, disa komandantë të lartë dhe 9 shkencëtarë bërthamorë u vranë në sulmet e Izraelit.

Në deklaratën e saj të fundit, Ministria iraniane e Shëndetësisë raportoi se numri i përgjithshëm i viktimave civile në sulmet e Izraelit ishte 606 ndërsa numri i të plagosurve 5.332.

Zyra e kryeministrit izraelit njoftoi se 28 persona u vranë dhe 1.272 u plagosën në hakmarrjen e ushtrisë iraniane. SHBA-ja, e cila mbështet hapur Izraelin, kreu sulme ndaj tre centraleve bërthamore të Iranit në Natanz, Fordo dhe Isfahan më 22 qershor.

Irani sulmoi bazën ajrore amerikane “Al-Udeid” në Katar më 23 qershor në përgjigje të sulmit amerikan. Presidenti i SHBA-së, Donald Trump, njoftoi një armëpushim midis Iranit dhe Izraelit më 24 qershor.