Kryeministri shqiptar Edi Rama e mbylli bashkëbisedimin me qytetarët në rubrikën “Sy m’sy” duke theksuar se një nga objektivat kryesore të tij është të vendosë flamurin kuqezi në tryezën e Bashkimit Europian.

Rama u shpreh se procesi i integrimit të Shqipërisë në BE është shumë afër dhe se dritarja që është hapur për vendin tonë nuk duhet mbyllur pa realizuar këtë qëllim.

“Jemi shumë afër, miqtë e mi, jemi dy vjet afër. Ka rëndësi që kjo dritare nuk duhet mbyllur pa u futur ne në Bashkimin Europian. Pas kësaj, keni kohë të shihni të tjerët dhe të më kujtoni se ku isha. Kur të më thoni ‘ku je’, do të jem aty, duke pasur sukses,” – tha Rama.

Ushtarët finlandezë të misionit të KFOR-it në Kosovë zhvilluan një patrullim rutinë në veri të vendit, përgjatë vijës kufitare. Kjo sipas KFOR-it, u bë me qëllim të analizimit të kushteve aktuale të rrugës dhe urës.

“Këto përpjekje janë pjesë e misionit të përditshëm të KFOR-it për të garantuar një mjedis të sigurt për të gjitha komunitetet që jetojnë në Kosovë”, tha KFOR-i në një postim në Facebook.

Në njoftim u bë e ditur se ushtarët inxhinierë janë pjesë Komandës Rajonale Lindje të misionit të KFOR-it, të udhëhequr nga NATO.

Presidentja e Kosovës Vjosa Osmani, e ka pritur sot në takim ambasadorin e Suedisë, Jonas Westerlund.

Osmani dhe Westerlund, diskutuan rreth zhvillimeve të fundit në vend si dhe për bashkëpunimin në tejkalimin e sfidave të përbashkëta në kontitentin evropian.

Në njoftimin e Presidencës, thuhet se gjithashtu gjatë këtij takimi u nënshkrua një Memorandum Bashkëpunimi, i cili do t’i sigurojë Zyrës së Presidentes mbështetjen e shtetit suedez nëpërmjet ekspertizës profesionale nga fushëveprimtaria e institucionit të Presidencës.

“Gjatë ceremonisë së nënshkrimit, Presidentja Osmani falënderoi Ambasadorin Westerlund për përkrahjen e vazhdueshme të Suedisë ndaj Kosovës, duke theksuar rëndësinë e partneritetit në forcimin e institucioneve demokratike dhe në avancimin e agjendës evropiane të vendit tonë”, thuhet në njoftim.