Në kuadër të programit Erasmus+ Staff Mobility, UBT mirëpriti gjatë javës së kaluar Assoc. Prof. Dr. Hasan Aykut Aysan dhe Assist. Prof. Dr. Yusuf Gözaçık nga Fakulteti i Edukimit Fizik dhe Sportit në Dicle University, Turqi.

Vizita u realizua në kuadër të bashkëpunimit akademik ndërinstitucional dhe përfshiu një sërë aktivitetesh profesionale dhe akademike, duke përfshirë vizita në kampusin dhe infrastrukturën universitare, organizimin e një punëtorie me studentët dhe stafin akademik, si dhe mbajtjen e një ligjërate tematike mbi shigjetarinë (archery).

Gjatë qëndrimit të tyre në UBT, profesorët prezantuan përvojat dhe ekspertizën e tyre në fushën e edukimit fizik dhe sportit, duke ofruar perspektiva bashkëkohore metodologjike dhe praktike. Aktivitetet e zhvilluara krijuan mundësi për shkëmbim të njohurive, avancim profesional dhe zgjerim të bashkëpunimit akademik ndërmjet pjesëmarrësve.

Ky mobilitet akademik kontribuoi në forcimin e marrëdhënieve ndërmjet UBT-së dhe Dicle University, duke promovuar bashkëpunimin shkencor, akademik dhe kulturor ndërmjet institucioneve dhe vendeve përkatëse.

UBT vazhdon të mbetet i përkushtuar ndaj ndërkombëtarizimit të arsimit të lartë, zgjerimit të partneriteteve strategjike dhe krijimit të mundësive të reja për zhvillim akademik dhe profesional të studentëve dhe stafit akademik.

Prokuroria Speciale e Republikës së Kosovës ka ngritur aktakuzë ndaj pesë personave të dyshuar për kryerjen e veprës penale “Krime lufte kundër popullsisë civile”, duke propozuar që gjykimi të zhvillohet në mungesë.

Sipas njoftimit të Prokurorisë Speciale, të akuzuarit me inicialet P.N., Z.D., I.I., S.M. dhe J.D., dyshohet se si pjesëtarë të Policisë serbe në Stacionin Policor në Fushë Kosovë, kanë kryer krime lufte gjatë konfliktit në Kosovë.

Aktakuza i ngarkon ata për ngjarjet e datës 6 maj 1999, kur sipas pretendimeve të prokurorisë, kanë ndaluar dhe marrë me forcë pesë civilë. Viktimat më pas janë transportuar nga stacioni i trenit në një lokacion të njohur si “Megja”, ku dyshohet se janë ekzekutuar me armë zjarri.

Prokuroria Speciale ka bërë të ditur se ka propozuar zhvillimin e procedurës gjyqësore në mungesë të të pandehurve, në përputhje me dispozitat ligjore në fuqi për rastet e krimeve të luftës.

Rasti pritet të trajtohet nga gjykata kompetente, e cila do të vendosë lidhur me konfirmimin e aktakuzës dhe vazhdimin e procedurave gjyqësore.

Profesorët e UBT-së, Bahri Gashi, Ngadhnjim Brovina dhe Arian Kadriu, kanë publikuar një punim shkencor në revistën prestigjioze Journal of Strategic Security, e indeksuar në platformën Scopus.

Studimi trajton kornizën ligjore për mbrojtjen e informacionit të klasifikuar në Kosovë, me fokus të veçantë në rolin e Agjencia për Mbrojtjen e Informacionit të Klasifikuar (AMIK) si institucioni kryesor përgjegjës për zbatimin e standardeve dhe procedurave të sigurisë së informacionit.

Sipas autorëve, rëndësia e AMIK-ut lidhet me rolin e tij qendror në ndërtimin dhe zbatimin e kornizës ligjore dhe institucionale të Kosovës për mbrojtjen e informacionit të ndjeshëm, në kuadër të përpjekjeve të vendit për t’u përafruar me standardet euroatlantike. Në një shtet të ri si Kosova, funksionimi i institucioneve që garantojnë sigurinë e informacionit konsiderohet element thelbësor për sigurinë kombëtare.

Punimi krahason modelin kosovar me praktikat e NATO-së, Bashkimi Evropian dhe vendeve të Ballkanit Perëndimor, duke arritur në përfundimin se korniza e Kosovës është në përputhje me standardet më të avancuara ndërkombëtare në këtë fushë.

Prokuroria Themelore në Pejë ka njoftuar se është arrestuar një person në kuadër të hetimeve për vdekjen e një punëtori në një vendpunishte në fshatin Gllaviqicë të Pejës, rast i ndodhur më 29 prill 2026.

Sipas njoftimit të Prokurorisë, arrestimi është realizuar pas veprimeve intensive hetimore të zhvilluara në koordinim me Drejtorinë Rajonale të Hetimeve në Pejë.

I dyshuari po hetohet për veprat penale “Manipulimi me prova” dhe “Mbajtja në pronësi, kontroll ose posedim të paautorizuar të armëve”, sipas legjislacionit penal në fuqi.

Me urdhër të prokurorit të shtetit, personi i arrestuar është ndaluar për 48 orë, ndërsa hetimet lidhur me rastin janë duke vazhduar.

Prokuroria ka bërë të ditur se ndaj një familjari të të pandehurit po zhvillohen veprime hetimore për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Sipas organit të akuzës, brenda afateve ligjore do të ndërmerren të gjitha veprimet e nevojshme procedurale dhe hetimore për zbardhjen e plotë të rrethanave të rastit.

Prokuroria Themelore në Pejë ka theksuar se mbetet e përkushtuar në mbrojtjen e sigurisë së punëtorëve në vendet e punës dhe në ndjekjen penale të personave përgjegjës për shkeljet që rrezikojnë jetën dhe sigurinë e tyre.