Portugalia e ka nisur me barazim aventurën në Kupën e Botës, pasi u ndal 1:1 nga Republika Demokratike e Kongos në ndeshjen e parë të fazës grupore.

Portugezët kaluan në epërsi që në minutën e gjashtë me golin e Joao Neves, ndërsa Kongo barazoi në fund të pjesës së parë me Yoane Wissa.

Pas ndeshjes ka reaguar Cristiano Ronaldo, i cili luajti gjatë gjithë takimit.

“Nuk ishte fillimi që deshëm, por është ende larg nga mbarimi. Kokën lartë dhe të fokusohemi në ndeshjen tjetër”, ka shkruar Ronaldo në rrjetet sociale.

Sulmuesi portugez pati një rast të mirë për të shënuar në pjesën e dytë, por nuk arriti ta konkretizojë.

Me këtë rezultat, Portugalia dhe Kongo marrin nga një pikë në ndeshjen e parë të Grupit K.

D.L

Photo: Associated Press

Kombëtarja e Anglisë e ka nisur në mënyrën më të mirë të mundshme aventurën në Kupën e Botës 2026, duke mposhtur Kroacinë me rezultatin bindës 4-2 në ndeshjen e parë të fazës së grupeve. Skuadra e drejtuar nga gjermani Thomas Tuchel tregoi një forcë të jashtëzakonshme sulmuese dhe efikasitet të lartë, duke siguruar menjëherë tri pikët e para të turneut.

Përtej rëndësisë së pikëve, ky triumf shënon edhe një arritje historike për “Tre Luanët”. Për herë të tretë radhazi në histori, Anglia arrin të fitojë ndeshjen hapëse të një Kampionati Botëror – një e dhënë statistikore që nuk e kishte regjistruar kurrë më parë.

Kjo seri pozitive nisi në vitin 2018 me fitoren 2-1 kundër Tunizisë, vazhdoi në Katar 2022 me goleadën 6-2 ndaj Iranit, dhe u konfirmua tashmë në Botërorin 2026 me suksesin ndaj kroatëve. Hera e fundit që anglezët e kanë nisur këtë kompeticion me humbje ka qenë plot 12 vite më parë, në Botërorin 2014, kur u mposhtën 2-1 nga Italia.

Ky rekord i ri konfirmon stabilitetin dhe vazhdimësinë e Anglisë në skenën e madhe të futbollit, duke i pozicionuar ata që në start si një nga pretendentët kryesorë për të shkuar deri në fund të turneut. /E.A/

Programi hapet më 18 qershor në orën 01:00 me përballjen mes Ganës dhe Panamasë. Tre orë më vonë, në orën 04:00, Uzbekistani do të përballet me Kolumbinë. Në mbrëmje, në orën 18:00, Çekia luan kundër Afrikës së Jugut, ndërsa nga ora 21:00 Zvicra do të ketë përballë Bosnje-Hercegovinën.

Ndeshjet vazhdojnë pas mesnate, kur më 19 qershor në orën 00:00 do të luhet takimi Kanada – Katar. Programi mbyllet në orën 03:00 me sfidën mes Meksikës dhe Koresë së Jugut, një përballje që pritet të zgjojë interes të madh te tifozët.

Këto ndeshje mund të kenë ndikim të rëndësishëm në renditjen e grupeve, pasi kombëtaret synojnë pikë të vlefshme në garën për kualifikim në fazën e eliminimit direkt të Kampionatit Botëror.

D.L

FC Malisheva dhe FC Ballkani kanë mësuar kundërshtarët e tyre për rundin e parë kualifikues të Ligës së Konferencës për edicionin 2026/27.

Nënkampionët e Kosovës, FC Malisheva, do të përballen me skuadrën shqiptare FC Vllaznia nga Shkodra, në një duel interesant rajonal që pritet të tërheqë vëmendje të madhe nga tifozët e të dyja ekipeve.

Ndërkohë, FC Ballkani do të sfidojë ekipin uellsian FC Connah’s Quay Nomads në përpjekje për të siguruar kalimin në fazën e ardhshme të garës evropiane.

Të dyja skuadrat kosovare do ta nisin aventurën e tyre evropiane me synimin për të përfaqësuar sa më denjësisht futbollin e Kosovës dhe për të vazhduar rrugëtimin në garat ndërkombëtare.

Shorti i rundit të parë ka sjellë kundërshtarë të kalueshëm në letër për ekipet kosovare, por ndeshjet pritet të jenë sfiduese dhe vendimtare për vazhdimin e garës.

Tashmë vëmendja e Malishevës dhe Ballkanit do të përqendrohet te përgatitjet për duelet e para evropiane të sezonit, me shpresën për rezultate pozitive dhe paraqitje dinjitoze në skenën ndërkombëtare.

D.L