Lajmet

Çfarë duhet të dini për variantin Delta?

Published

5 years ago

on

Në Kosovë, më 29 qershor, autoritetet shëndetësore njoftuan se kanë regjistruar dy raste me variantin Delta të koronavirusit. Sipas Ministrisë së Shëndetësisë, të dy pacientët tashmë janë shëruar.

Varianti Delta, që fillimisht është identifikuar në Indi në tetorin e vitit 2020, nga Organizata Botërore e Shëndetësisë është futur në grupin e varianteve shqetësuese të sëmundjes COVID-19. Aty bëjnë pjesë edhe varianti Alfa (i identifikuar fillimisht në Britani të Madhe), Beta ( i identifikuar fillimisht në Afrikë të Jugut) dhe Gama (i identifikuar fillimisht në Brazil).

Variantet që bëjnë pjesë në këtë grup janë më ngjitëse, më vdekjeprurëse ose më rezistente ndaj vaksinave ekzistuese kundër COVID-19.

Varianti Delta tashmë është përhapur në mbi 90 shtete të botës dhe OBSH-ja ka thënë se Delta po bëhet varianti dominues i koronavirusit në mbarë botën.

Shefja e shkencëtarëve në OBSH, Soumya Swaminathan, ka deklaruar më 18 qershor se studimet kanë sugjeruar se varianti Delta është rreth 60 për qind më i transmetueshëm se varianti Alfa, që konsiderohet si variant më ngjitës se varianti origjinal i COVID-19, që u përhap fillimisht në Vuhan të Kinës, në fund të vitit 2019.

Varianti Delta tashmë është dominues në Mbretërinë e Bashkuar, ndërsa shkencëtari kryesor për sëmundje ngjitëse në Shtetet e Bashkuara, Anthony Fauci, e ka cilësuar këtë variant si “kërcënimin kryesor” në përpjekjet e SHBA-së për ta mposhtur pandeminë COVID-19.

Sipas të dhënave të Shëndetit Publik të Anglisë, që është agjencia kryesore britanike për shëndetësi, mbi 90 për qind e rasteve me COVID-19 janë me variantin Delta. Sipas kësaj agjencie, varianti Delta ka 64 për qind më shumë mundësi që të përhapet brenda familjeve, sesa varianti Alfa.

Ndërkaq, Qendra Evropiane për Parandalimin dhe Kontrollin e Sëmundjeve (ECDC) ka thënë më 23 qershor, se pret që deri në fund të muajit gusht, varianti Delta të përbëjë 90 për qind të rasteve me COVID-19 në vendet e Bashkimit Evropian.

“Fatkeqësisht, të dhënat fillestare (të studimeve) tregojnë se (varianti Delta) mund të prekë njerëzit që kanë marrë dozën e parë të vaksinave ekzistuese. Ka shumë gjasa që varianti Delta të qarkullojë gjerësisht gjatë verës, veçanërisht në mesin e të rinjve, të cilët ende nuk janë në listë për t’u vaksinuar. Kjo gjë mund të rrisë rrezikun që njerëzit më të ndjeshëm të infektohen dhe të përjetojnë sëmundje të rëndë dhe vdekje, nëse nuk janë të vaksinuar plotësisht”, ka thënë ECDC-ja.

Edhe Qendrat amerikane për Kontrollin dhe Parandalimin e Sëmundjeve (CDC) e kanë klasifikuar si variant shqetësues variantin Delta.

Për dallim nga varianti fillestar i koronavirusit, që karakterizohet me simptoma si temperaturë, dhembje muskujsh, probleme me frymëmarrje, humbje të shijes apo nuhatjes, personat që po preken nga varianti Delta, sipas ekspertëve, po përjetojnë kryesisht këto simptoma: dhembje të kokës e fytit dhe rrjedhje nga hunda.

Këto simptoma, sipas ekspertëve, janë shumë të ngjashme me ato të gripit sezonal, prandaj rritet edhe rreziku që shumë të infektuar të mos izolohen dhe të përhapin edhe më tej sëmundjen.

A janë efektive vaksinat ekzistuese ndaj variantit Delta?

Që prej përhapjes së variantit Delta janë kryer disa studime, për të parë nëse vaksinat ekzistuese kundër COVID-19 janë efektive ndaj këtij varianti.

Sipas një studimi të kryer nga hulumtuesit e Universitetit të Oksfordit, vaksina e prodhuar nga AstraZeneca dhe ajo nga Pfizer/BioNTech mbeten gjerësisht efektive ndaj variantit Delta.

Ky studim, gjetjet e të cilit janë publikuar në gazetën shkencore Cell, ka hetuar aftësinë e antitrupave në gjakun e njerëzve, të cilët janë vaksinuar me të dyja dozat, për të neutralizuar variantin ngjitës Delta.

Megjithatë, hulumtuesit thanë se kanë parë rënie të përqendrimit të antitrupave në gjak, duke shtuar se kjo gjë mund të çojë në disa infektime me COVID-19.

Sipas gjetjeve të Shëndetit Publik në Angli, vaksinat e këtyre dy kompanive kanë ofruar mbi 90 për qind mbrojtje ndaj hospitalizimeve nga varianti Delta.

Kompania farmaceutike Moderna ka thënë se në një studim të kryer, ku është analizuar gjaku i personave që kanë marrë dozën e dytë të vaksinës një javë më parë, është gjetur se vaksina e kësaj kompanie, ka shkaktuar përgjigje të antitrupave kundër të gjitha varianteve të testuara.

Sipas studimit, vaksina Moderna është shumë më efektive në prodhimin e antitrupave ndaj variantit Delta sesa ndaj variantit Beta, që fillimisht është identifikuar në Afrikën e Jugut.

“Këto të dhëna të reja janë inkurajuese dhe përforcojnë besimin tonë se vaksina Moderna do të vazhdojë të ofrojë mbrojtje ndaj varianteve të reja që janë zbuluar”, tha shefi ekzekutiv i Moderna-s, Stephane Bancel.

Pavarësisht se disa studime sugjerojnë se vaksinat janë efektive ndaj variantit Delta, OBSH-ja u ka bërë thirrje edhe njerëzve që janë të vaksinuar plotësisht, të vazhdojnë të mbajnë maska dhe distancë fizike.

“Njerëzit nuk duhet të ndihen të sigurt për faktin se kanë marrë dy dozat e vaksinës. Ata ende duhet të mbrojnë vetveten”, ka deklaruar Mariangela Simoa, ndihmësdrejtoresha e përgjithshme e OBSH-së për qasje në ilaçe dhe produkte shëndetësore./REL

Related Topics:
Continue Reading

Lajmet

UBT vazhdon të forcojë bashkëpunimet ndërkombëtare dhe lidhjet institucionale me partnerë evropianë

Published

16 minutes ago

on

September 10, 2026

By

UBT vazhdon të forcojë bashkëpunimet ndërkombëtare dhe lidhjet institucionale me partnerë evropianë. Në kuadër të këtyre përpjekjeve, Zëvendësdekani i Departamentit të Turizmit në UBT, Prof. Alban Fejza, zhvilloi një takim në Ambasadën e Italisë në Kosovë, së bashku me Prof. Raffaella Ritucci dhe Lirdion Blakaj.

Gjatë takimit u diskutua për mundësitë e konkretizimit të bashkëpunimeve të ndërsjella me UNITO – University of Turin dhe UNITA – Universitas Montium, aleanca universitare evropiane e koordinuar nga UNITO.

Diskutimi u fokusua në mundësi konkrete për bashkëpunim akademik, mobilitet, ndërkombëtarizim dhe zhvillimin e iniciativave të përbashkëta, me synim që interesat e përbashkëta të shndërrohen në hapa konkretë.

Ky takim përbën një hap të rëndësishëm në drejtim të forcimit të lidhjeve akademike dhe institucionale ndërmjet UBT-së, partnerëve italianë dhe hapësirës evropiane të arsimit të lartë.

Continue Reading

Lajmet

Tenderi afro 400 mijë eurosh për kamionë në Ekoregjion, aktakuzë ndaj tre personave

Published

42 minutes ago

on

September 10, 2026

By

Prokuroria Speciale ka ngritur aktakuzë ndaj tre personave, B.Sh., A.G. dhe R.Z., si dhe ndaj subjektit juridik SH.P.K. “D.C & E”, për veprat penale “Keqpërdorim i pozitës apo autoritetit zyrtar”, “Keqpërdorimi dhe mashtrimi në prokurimin publik” dhe “Mbajtja në pronësi, kontroll ose posedim të paautorizuar të armëve”.

Sipas aktakuzës, më 7 qershor 2023 dhe gjatë periudhës 18 shtator 2023 deri më 16 nëntor 2023, në Prizren, B.Sh., në cilësinë e kryeshefit të KRM “Eko Regjioni”, në bashkëkryerje me zyrtarin e kësaj kompanie, A.G., kanë tejkaluar kompetencat e tyre me qëllim të përfitimit të dobisë pasurore për vete dhe për subjektin juridik SH.P.K. “D.C & E”.

A.G. dhe B.Sh. akuzohen se, në kundërshtim me legjislacionin për prokurimin publik, kanë krijuar mundësi që tenderin “Furnizimi me kamiona kompaktor dhe autobusë për nevojat e KRM ‘Ekoregjioni’”, në vlerë prej 385 mijë e 500 eurosh, ta përfitojë SH.P.K. “D.C & E”.

Sipas Prokurorisë, me këto veprime buxhetit të KRM “Ekoregjioni” i është shkaktuar dëm në shumën prej 233 mijë e 685.37 eurosh.

Ndërkaq, R.Z. akuzohet për veprën penale “Keqpërdorimi dhe mashtrimi në prokurimin publik”. Sipas aktakuzës, ai u ka paguar B.Sh. dhe A.G. shpenzimet e një udhëtimi jashtë territorit të Kosovës, me qëllim të koordinimit të veprimeve inkriminuese dhe ndikimit në dhënien e tenderit.

Prokuroria pretendon se R.Z. paraprakisht kishte arritur marrëveshje të kundërligjshme me të pandehurit, përmes së cilës ishin përshtatur specifikat teknike të tenderit./A.K/

Continue Reading

Lajmet

OVL e UÇK-së kundërshton kërkesat për dënime ndaj Thaçit dhe të tjerëve

Published

1 hour ago

on

September 10, 2026

By

Organizata e Veteranëve të Luftës së Ushtrisë Çlirimtare të Kosovës (OVL e UÇK-së) ka shprehur shqetësim lidhur me kërkesat e fundit të Prokurorisë së Specializuar për dënimin e Hashim Thaçit, Hajredin Kuçit, Fadil Fazliut, Isni Kilajt dhe Bashkim Smakajt, në rastin e pretenduar të pengimit të drejtësisë.

OVL e UÇK-së ka thënë se këto kërkesa nuk përbëjnë befasi, duke kritikuar qasjen e Prokurorisë së Specializuar ndaj ish-pjesëtarëve të UÇK-së.

“Ato vijnë nga e njëjta Prokurori e Specializuar, e cila gjatë gjithë këtij procesi ka ndërtuar një qasje të njëanshme ndaj ish-pjesëtarëve të UÇK-së dhe ka ngritur akuza mbi një material të kontestueshëm, përfshirë edhe materiale të ardhura nga Serbia”, thuhet në reagimin e OVL-së.

Sipas tyre, kërkesat për dënime të rënda ngrejnë pikëpyetje nëse Prokuroria po përpiqet të arsyetojë punën e saj pas proceseve të zhvilluara në Hagë.

“Vendimi duhet të mbështetet në ligj dhe në standardet më të larta të drejtësisë, e jo në narrativat e Prokurorisë. Lufta e UÇK-së nuk mund të kriminalizohet përmes proceseve të njëanshme dhe drejtësia nuk mund të ndërtohet mbi paragjykime politike”, thuhet në reagim.

OVL e UÇK-së ka theksuar se, pavarësisht kritikave ndaj Prokurorisë, pret që gjykatësit të vendosin në bazë të ligjit dhe standardeve të drejtësisë./A.K/

Continue Reading

Lajmet

Inflacioni në Kosovë arrin 7.3 për qind në gusht, rritja më e madhe te transporti

Published

2 hours ago

on

September 10, 2026

By

Agjencia e Statistikave të Kosovës (ASK) ka publikuar të dhënat për Indeksin e Harmonizuar të Çmimeve të Konsumit për muajin gusht 2026, sipas të cilave çmimet e konsumit janë rritur me 7.3 për qind krahasuar me gushtin e vitit të kaluar.

Sipas ASK-së, inflacioni mujor në gusht ishte 1.3 për qind, krahasuar me korrikun e këtij viti.

Rritja vjetore e çmimeve është ndikuar kryesisht nga transporti, ku çmimet janë rritur me 21.1 për qind. Pas tij renditet grupi i strehimit, ujit, energjisë elektrike, gazit dhe lëndëve të tjera djegëse, me rritje prej 11.8 për qind.

Rritje të çmimeve janë regjistruar edhe në restorante dhe shërbime akomodimi, me 5.4 për qind, pijet alkoolike, duhani dhe narkotikët me 5.1 për qind, shëndetësia me 4.2 për qind, si dhe kujdesi personal, mbrojtja sociale dhe mallrat e shërbimet e ndryshme me 3.8 për qind.

Çmimet e mobiljeve, pajisjeve shtëpiake dhe mirëmbajtjes rutinore të shtëpisë janë rritur me 3.4 për qind, po aq sa edhe çmimet në grupin e rekreacionit, sportit dhe kulturës.

Ndërkohë, veshjet dhe këpucët janë shtrenjtuar me 3 për qind, ushqimet dhe pijet joalkoolike me 2.6 për qind, ndërsa informacioni dhe komunikimi me 0.6 për qind.

E vetmja kategori ku ASK ka regjistruar rënie vjetore të çmimeve janë shërbimet arsimore, me 0.5 për qind.

Në krahasim me korrikun, rritjen më të madhe mujore e ka shënuar transporti, me 4.6 për qind. Pas tij vjen grupi i strehimit, ujit, energjisë elektrike, gazit dhe lëndëve të tjera djegëse, me 0.8 për qind.

Rritje prej 0.5 për qind janë regjistruar te mobiljet, pajisjet shtëpiake dhe mirëmbajtja rutinore e shtëpisë, ndërsa ushqimet dhe pijet joalkoolike janë shtrenjtuar me 0.4 për qind.

Po me 0.4 për qind janë rritur edhe çmimet në shëndetësi, informacion dhe komunikim, si dhe në rekreacion, sport dhe kulturë.

Rritje më të vogla mujore janë regjistruar në restorante dhe shërbime akomodimi (0.3 për qind), pije alkoolike, duhan dhe narkotikë (0.1 për qind), veshje dhe këpucë (0.1 për qind), si dhe kujdes personal, mbrojtje sociale dhe mallra e shërbime të ndryshme (0.1 për qind)./A.K/

Continue Reading

Të kërkuara