Më 24 shtator, Kosova do të përballet me Irlandën në Prishtinë, ndërsa Austria dhe Izraeli do të takohen në Linz. Këto janë ndeshjet e para të Grupit 3 të Ligës B të Ligës së Kombeve të UEFA-s.

Grupi vlerësohet si i fortë dhe mjaft i barabartë, me të katërta përfaqësueset që synojnë vendin e parë dhe avancimin në Ligën A.

Edhe pse ndeshjen e parë Irlanda e zhvillon ndaj Kosovës, në këtë përfaqësuese vëmendja kryesore aktualisht është te sfida e dytë, ajo kundër Izraelit.

Irlanda dhe Izraeli do të përballen më 27 shtator në Debrecen të Hungarisë, me Izraelin si vendas. Pikërisht në Debrecen do të zhvillohet edhe ndeshja Izrael – Kosovë, më 1 tetor.

Në Irlandë, mbështetja për Palestinën është e madhe dhe prej kohësh ka zëra që kërkojnë që ndeshjet ndaj Izraelit të mos zhvillohen. Madje, kjo mundësi është shqyrtuar edhe nga Federata Irlandeze, por në fund është vendosur që ndeshjet të luhen, pasi një bojkot do të mund të sillte sanksione të rënda.

Për shkak të shqetësimeve për mundësi incidentesh, Irlanda ka vendosur që edhe ndeshjen si vendase ndaj Izraelit ta zhvillojë në terren neutral. Sfida do të luhet më 4 tetor në Serbi dhe do të zhvillohet pa praninë e tifozëve.

Selektori i Irlandës, Heimir Hallgrimsson, ka treguar se ka zhvilluar biseda individuale me lojtarët për situatën dhe për ndeshjet ndaj Izraelit.

“Askush prej nesh nuk ndihet rehat duke luajtur në këto ndeshje”, ka thënë Hallgrimsson.

“Sigurisht që kemi mendime të ndryshme dhe qëndrime me intensitet të ndryshëm. Mendoj se është mirë të them, pa hyrë në detaje për individë, se askush prej nesh nuk ndihet rehat duke luajtur në këto ndeshje. Por, pasi kemi vendosur t’i luajmë ato, ne qëndrojmë të gjithë të bashkuar dhe luajmë si një trup i vetëm”, ka shtuar ai.

Në korrik, delegatët e Federatës Irlandeze e mbështetën vendimin për zhvillimin e ndeshjeve, pavarësisht presionit për bojkot. Në federatë kishte shqetësime se moszhvillimi i tyre do të shkaktonte dëme të konsiderueshme.

Presioni ka ardhur edhe nga lëvizja “Irish Sport”, e cila përmes fushatës “Stop The Game” ka bërë thirrje për bojkot të ndeshjeve me Izraelin. Kjo thirrje është mbështetur edhe nga ish-trajnerë dhe ish-futbollistë të Përfaqësueses së Irlandës.

Në maj, një ndeshje e Irlandës ndaj Katarit në Dublin u ndërpre përkohësisht pasi në fushë u hodhën topa tenisi që përmbanin mesazhe në mbështetje të Palestinës.

Sa i përket formës sportive, Irlanda së fundmi është mposhtur 1:0 nga Portugalia, më 11 tetor 2025.

Megjithatë, Hallgrimsson insiston se skuadra e tij është në një moment pozitiv.

“Jemi në seri pozitive dhe duam të vazhdojmë atë”, ka deklaruar selektori irlandez.

“Jemi të pamposhtur në shtatë ndeshje dhe mendoj se asnjë përfaqësuese nuk dëshiron të luajë kundër Irlandës për momentin”, ka përfunduar Hallgrimsson.

D.L

Pas Amir Rrahmanit, Florent Hadërgjonaj është futbollisti i radhës që nuk do të jetë në dispozicion të Përfaqësueses së Kosovës.

Ndryshe nga Rrahmani, i cili doli publikisht kundër udhëheqësisë së FFK-së, Hadërgjonaj ka vendosur të tërhiqet përkohësisht për shkak të pakënaqësive me stafin teknik të Kombëtares.

“Pas shumë mendimesh, kam marrë vendimin që, për momentin, të mos jem më në dispozicion të Kombëtares së Kosovës nën drejtimin e stafit aktual teknik”, ka shkruar Hadërgjonaj në një postim të gjatë në rrjetet sociale.

Mbrojtësi i Alanyasporit ka theksuar se është krenar për çdo paraqitje me fanellën e Kosovës dhe për gjithçka që ka dhënë për Përfaqësuesen, por ka lënë të kuptohet se nuk është ndier i vlerësuar pavarësisht formës së mirë që ka treguar në klub.

“Gjatë dy viteve e gjysmë të fundit kam zgjedhur të mos flas publikisht, por të vazhdoj punën time dhe të përgjigjem me paraqitjet e mia në klub. Besoj se forma dhe paraqitjet e mia flasin vetë. Megjithatë, me kalimin e kohës është bërë e qartë për mua se me trajnerin aktual nuk ekziston më baza e nevojshme e respektit të ndërsjellë dhe besimit për të vazhduar një bashkëpunim profesional”, ka shkruar ai.

Hadërgjonaj, 32-vjeçar, luan në krahun e djathtë të mbrojtjes dhe deri më tani ka regjistruar 39 paraqitje dhe një gol me fanellën e Kosovës.

Në këtë edicion të Superligës së Turqisë, ai ka zhvilluar pesë ndeshje dhe ka dhënë dy asistime. Ndërsa sezonin e kaluar ishte një prej lojtarëve më produktivë të Alanyasporit, me nëntë gola dhe 11 asistime në 35 paraqitje në të gjitha garat.

Me Kosovën, në kampanjën e kualifikimeve për Botërorin 2026, Hadërgjonaj ka luajtur vetëm një minutë, në fitoren 4:3 ndaj Sllovakisë, në gjysmëfinalen e plejofit.

Megjithatë, Hadërgjonaj ka bërë të qartë se vendimi i tij nuk përbën një tërheqje përfundimtare nga Përfaqësuesja dhe as nuk është një qëndrim kundër Kosovës. Sipas tij, bëhet fjalë vetëm për raportin me stafin aktual teknik.

“Për Kosovën do të jem gjithmonë krenar dhe i gatshëm të jap gjithçka, kur të ekzistojnë përsëri kushtet e duhura. Bashkëlojtarëve të mi dhe Kombëtares u dëshiroj nga zemra çdo sukses”, ka përfunduar Hadërgjonaj.

D.L

Përzgjedhësi i Zvicrës U21, Alex Frei, ka publikuar listën prej 25 lojtarësh për fazën e fundit të kualifikimeve të Kampionatit Evropian 2027, i cili do të mbahet në Shqipëri dhe Serbi.

Ekipi zviceran do të zhvillojë tre ndeshje: kundër Luksemburgut në Lugano, si dhe dy përballje në udhëtim ndaj Islandës dhe Francës.

Për herë të parë në këtë nivel është ftuar 20-vjeçari Lutfi Dalipi, i cili luan te Vaduzi i huazuar nga Young Boys.

Mesfushori me origjinë nga Presheva dhe Portugalia po kalon një formë të mirë në Superligën zvicerane me tre gola e shtatë asistime, ndërsa më parë është kontaktuar edhe nga Shqipëria e Kosova.

Përveç Dalipit, pjesë e listës janë edhe Samuel Krasniqi, si dhe Labinot Bajrami e Dorian Derbaci që rikthehen te përfaqësuesja U21.

D.L

Përzgjedhësi i Zvicrës, Murat Yakin, ka publikuar listën prej 25 lojtarësh për katër ndeshjet e ardhshme të Ligës së Kombeve kundër Maqedonisë së Veriut, Skocisë dhe Sllovenisë, ku ndeshja e dytë ndaj Maqedonisë së Veriut do të luhet më 6 tetor.

Pjesë e këtij grumbullimi janë tre futbollistë shqiptarë: kapiteni i Sunderlandit, Granit Xhaka, mesfushori i Milanit, Ardon Jashari, si dhe mbrojtësi i Bragës, Adrian Bajrami.

Ky i fundit rikthehet te përfaqësuesja e Zvicrës pasi ishte grumbulluar për herë të fundit në nëntor të vitit të kaluar për kualifikueset e Kupës së Botës ndaj Suedisë dhe Kosovës.

D.L