Presidentja e Gjeorgjisë, Salome Zurabishvili, nuk ka pranuar ta nënshkruajë një projektligj të miratuar nga Parlamenti muajin e kaluar, për të cilin grupet për të drejtat e njeriut dhe shumë politikanë opozitarë thonë se kufizon dukshëm të drejtat e komunitetit LGBT në Gjeorgji.

I ashtuquajturi Projektligji i “vlerave familjare” kaloi në Parlament pas trysnisë nga partia në pushtet, Ëndrra Gjeorgjiane, më 17 shtator, me 84 vota për dhe asnjë kundër. Votimi u bojkotua nga opozita, ndërsa kundër tij u mbajtën protesta para ndërtesës së Parlamentit.

Në përputhje me provizionet e Kushtetutës së Gjeorgjisë, Zurabishvili nuk pranoi ta mbështesë projektligjin dhe e ktheu atë në Parlament pa komente të shkruara, tha të mërkurën për Radion Evropa e Lirë Presidenca gjeorgjiane.

Vendimi i saj vë në pah peizazhin tejet të polarizuar politik në vendin e Kaukazit në prag të zgjedhjeve nacionale më 26 tetor.

Tani, kryetari i Parlamentit Shalva Papuashvili, mbështetës i projektligjit dhe anëtar i partisë në pushtet, pritet ta nënshkruajë projektligjin për ta bërë ligj, si dhe ta publikojë atë brenda ditësh.

Pakoja e ndryshimeve ligjore, titulli i plotë i të cilit është “Për Vlerat Familjare dhe Mbrojtjen e të Miturve”, sjell ndryshime në 18 ligje të tanishme, përfshirë në legjislacionin për lirinë e shprehjes dhe fjalës, si dhe të transmetimit.

Ai mundëson ndalimin e tubimeve të cilat promovojnë të drejtën që një person të identifikohet si gjini tjetër përpos “gjinisë së tij apo saj biologjike”. Ai ndalon gjithashtu tubimet që avokojnë lidhjet mes personave të së njëjtës gjini apo të të njëjtit orientim seksual.

Opozita i ka bojkotuar seancat parlamentare prej majit, kur ligjvënësit e Ëndrrës Gjeorgjiane e miratuan projektligjin për “agjentët e huaj”. Qeveritë perëndimore dhe shumë gjeorgjianë e cilësuan këtë projektigjt si të ngjashëm me një ligj rus, të cilin e përdor Kremlini për t’i luftuar zërat kritikë dhe kundërshtues.

Ligji kërkon që organizatat mediale dhe ato të shoqërisë civile që marrin mbi 20 për qind të fondeve të tyre nga jashtë, t’iu nënshtrohen mbikëqyrjes dhe mund të përballen me sanksione për krime penale, ende të paspecifikuara.

Zurabishvili përdori veton kundër këtij ligji, por partia në pushtet e rrëzoi atë dhe futi në zbatim ligjin, përkundër protestave disamujore dhe paralajmërimeve nga Shtetet e Bashkuara dhe Bashkimi Evropian se ai ligj do ta shkatërrojë demokracinë në Gjeorgji dhe rrugën e saj drejt anëtarësimin në institucionet perëndimore.

Në prag të zgjedhjeve të 26 tetorit, Ëndrra Gjeorgjiane mbetet partia më popullore në vend, sipas sondazheve./REL

Çmimi letrar “Geschwister Scholl” për këtë vit i është ndarë gazetares ruse në mërgim, Katerina Gordeeva, për librin e saj “Merre dhimbjen time. Tregime nga lufta”, që trajton vuajtjet e njerëzve nga pushtimi rus në Ukrainë.

Në këtë libër, Gordeeva portretizon 24 gra dhe burra, kryesisht nga Ukraina, por edhe nga Rusia, duke i dhënë një zë atyre që kanë përjetuar pasojat e luftës. Pjesë e rëndësishme e narrativës janë tregimet e nënave të ushtarëve rusë, duke e shndërruar librin në një pasqyrë të ndërlikuar të konfliktit dhe ndikimeve të tij.

Çmimi “Geschwister Scholl” jepet nga kapitulli bavarez i Shoqatës Gjermane të Botuesve dhe Librarive, si dhe nga qyteti i Mynihut, dhe ka një vlerë prej 10,000 eurosh (11,000 dollarë). Ceremonia e ndarjes së çmimeve do të mbahet më 26 nëntor.

Gordeeva, e njohur në Rusi për filmat e saj dokumentarë dhe programet televizive, u detyrua të largohej nga vendi pas aneksimit të Krimesë në vitin 2014. Aktualisht ajo jeton me familjen në Letoni dhe është shpallur si një “agjente e huaj” nga qeveria ruse.

Në librin e saj, Gordeeva përdor pasazhe të gjata të fjalimeve të drejtpërdrejta për të ndihmuar të mbijetuarit të tregojnë historitë e tyre personale dhe për të pasqyruar natyrën e vështirë të përvojës së tyre si individë në një luftë. Ajo gjithashtu eksploron rolin e saj të vështirë si reportere nga vendi që shkaktoi vuajtje të mëdha.

Ky çmim vjen si një njohje e rëndësishme për kontributin e Gordeevës në sensibilizimin e problemeve që lidhen me luftën dhe përpjekjet e saj për të shpalosur realitetin e ashpër të të prekurve nga konflikti./UBTNews/

Policia e Kosovës ka arrestuar sot tre persona në Prizren nën dyshimet se janë të përfshirë në veprat penale fajde dhe detyrim.

Në vendbanimet e personave të dyshuar janë sekuestruar dy automjete, para dhe dëshmi të rëndësishme, të cilat do të përdorën si dëshmi në procedura të mëtutjeshme.

Dyshohet se këta persona duke kanosur viktimën, në vazhdimësi kanë tentuar ta detyrojnë që të veprojë kundër pasurisë së tij.

Të dyshuarit pas intervistimit, me aktvendim të prokurorit ndalohen për 48 orë.

Kryeministrja italiane, Giorgia Meloni, ka thirrur sot një takim urgjent të krerëve të shteteve dhe qeverive të grupit G7 për të diskutuar sulmin e fundit raketor të Iranit ndaj Izraelit. Ky takim do të mbahet përmes videokonferencës, siç raportoi agjencia italiane e lajmeve ANSA.

Meloni, gjatë një deklarate në Romë, theksoi se Italia është e angazhuar për të punuar drejt një zgjidhjeje diplomatike për konfliktin në Lindjen e Mesme. “Duke marrë parasysh situatën e tensionuar, është thelbësore të bashkohemi për të diskutuar veprimet tona të ardhshme,” tha ajo.

Si një nga anëtaret kryesore të G7, Italia aktualisht mban presidencën vjetore të këtij grupi, që përfshin Kanadanë, Francën, Gjermaninë, Japoninë, Britaninë e Madhe dhe Shtetet e Bashkuara të Amerikës, si dhe Bashkimin Evropian.

Takimi vjen në një kohë të vështirë për sigurinë në rajon, pas shpërthimit të tensioneve për shkak të aktiviteteve të Iranit dhe sulmeve të mëparshme në Gaza. Meloni kërkon një qasje të koordinuar nga vendet e G7 për të adresuar këtë situatë dhe për të mbështetur stabilitetin në Lindjen e Mesme./UBTNews/