Presidentja e Kosovës Vjosa Osmani ka thënë se në takim me kongresistë amerikanë ka diskutuar në lidhje me shumë çështje e me fokus ato të sigurisë dhe mbrojtjes.

Osmani ka theksuar se Kosova është shteti më pro amerikan dhe se asnjëherë nuk ka pasë qeveri antiamerikane.

“Sot kisha nderin që t’i mirëpres në Kosovë dy kongresistë amerikanë. Që të dy për një kohë të gjatë kanë mbështetur Kosovën dhe gjithë rajonin tonë dhe si kontribuues të vazhdueshëm për paqen dhe stabilitetin në rajon tani kanë këtë vizitë. Bashkëpunimi bilateral mes Kosovës dhe SHBA, zhvillimet në sektorin e sigurisë dhe mbrojtjes, përafrimi ynë me NATO si organizate që synojmë të anëtarësohem, sfidat e sigurisë me të cilat po përballemi dhe mënyrën sesi mund të koordinohemi dhe me shumë me SHBA që të kemi integrim sa më të suksesshëm të komuniteti serb në Kosovë”, tha Osmani.

Presidentja i është përgjigjur diplomatit Philip Reeker, i cili kërkoi një qeveri që të bashkëpunojë me amerikanët, ku tha se Kosova nuk ka pasë e as nuk do të ketë ndonjëherë qeveri antiamerikane.

“Secili i ka qëndrimet e veta dhe njëkohësisht dhe Reeker, me të cilin kam pasë bashkëpunim të shkëlqyeshëm. Në Kosovë nuk ka pasë e nuk do të ketë asnjëherë qeveri antiamerikane. Në Kosovë ka pasë dhe do të ketë gjithnjë Qeverinë më pro amerikane që mund ta gjejë ndokush sepse kemi popullin me pro amerikan dhe secila qeveri që vjen nga ky popull. Pra, nuk mund të ketë dallime mes popullit që krijojnë qeveri dhe qeverisë përderisa secila qeveria ka metodat e veta sesi të punojnë me partnerët… sa i përket punës sime si presidente ju sigurojë që kam pasur dhe do të vazhdojë të kem një bashkëpunim të ngushtë me Shtetet e Bashkuara ët Amerikës sepse i shoh si partner ekzistencial në zhvillimin e Kosovës dhe mbrojtjen e lirisë dhe pavarësisë sonë dhe tejkalimin sfidave të sigurisë”, tha Osmani./EO

Presidentja e Kosovës Vjosa Osmani ka thënë se tashmë nuk mund të kërkojë nga deputetët të mblidhen për çështjen e buxhetit të Komunës së Prishtinës dhe RTK-së, duke theksuar se për një gjë të tillë iu ishte lutur partive politike ditën kur kishte dështuar të zgjidhet mandatari i dytë për kryeministër.

Osmani ka thënë se ka bërë çdo përpjekje për ta shtyrë përpara dhe të gjejë zgjidhje, por janë partitë e ish-opozitës që nuk pranuan dhe refuzuan të kthehen dhe njëherë në Kuvend para se ta nënshkruante dekretin për shpërndarje.

“Kush ka dashur që kryeqyteti të ketë buxhet kanë pasë mundësinë  që ta votojë si pikë të ndarë dhe tjerat mos t’i votojnë. Por fatkeqësisht kjo nuk u shfryëzua si mundësi edhe pse ka qenë e lejueshme edhe me Kushtetutë, ligjet në fuqi dhe praktikën parlamentare. Pasi ka dështuar mandatari i dytë ne kemi një aktgjykim të Gjykatës Kushtetuese që thotë Kuvendi nuk shpërndahet automatikisht, pra edhe kur dështon mandatari i dytë, ende kemi Kuvend deri në momentin kur unë nënshkruaj dekretin për shpërndarje dhe unë nuk e kam nënshkruar. Qëllimisht i kam ftuar partitë politike dhe i kam lutur, ju lutem para se ta shpërndajë Kuvendin, kthenu në sallën e Kuvendit e unë ju pres këtu. Miratoni marrëveshjet ndërkombëtare prej 1.1 miliard të cilat kërkojnë 2/3, miraton buxhetet. Kam kërkuar nga kryeministri, i kam thënë a mundesh me heq dorë nga buxheti 2026 dhe të trajtohen vec me pikat tjera  dhe ai është pajtuar që të hiqet çështja e buxhetit 2026 dhe të shkohet në seanca me 1.1 miliardë, buxhetin e Prishtinës, Gjilanti dhe zgjatjen buxhetore por nuk ka pasë dakrodim nga partitë e tjera. Mundësi ka pasë por jo edhe vullnet politik. Unë kam shfrytëzuar çdo instrument dhe duhet t’i pyesin ata pse i kanë refuzuar këto propozime”, tha Osmani.

Ajo ka theksuar edhe se atë cka kërkoi ajo nuk ishte kundërkushtetuese.

“Tani që nuk ka Kuvend unë nuk kam se ku t’i çojë deputetët, as t’iu kërkojë se ku të mblidhen sepse nuk kanë ku mblidhen derisa të mbahen zgjedhjet që i kanë kërkuar vetë ta kemi rezultatin, të certifikohen dhe të konstituohet dhe me shpresë që do të bëhet qeveria e re. Por si presidente kam bërë gjithçka, por është refuzuar nga disa parti. Nuk është e vërtetë që një gjë e tillë do të ishte kundërkushtetuese” , tha ajo.

Osmani u pyet se a mund të ketë një zvarritje tjetër për konstituim të Kuvendit, e për çka nuk e ka përjashtuar.

“Shqetësim ka sepse nuk është larg koha që kishim situata të tilla, këto veç sa ndodhën por shpresoj që kjo të ketë qenë një mësim i mësuar dhe një përvojë nga e cila partitë politike të kenë mësuar se zvarritja është në dëmë të interesave të qytetarëve të Kosovës”, tha Osmani./EO

Kazermat e Forcës së Sigurisë së Kosovës (FSK) do të jenë të hapura për qytetarët me rastin e Ditës së Forcës që do të jetë me 27 Nëntor.

“Forca e Sigurisë së Kosovës ju fton të merrni pjesë në “Ditën e Hapur”, që do të mbahet me rastin e Ditës së Forcës, më 27 Nëntor, nga ora 09:00 deri në ora 14:00.  Në kazermën “Adem Jashari “ në Prishtinë nga ora 09:30 do të jenë të pranishëm udhëheqësit e lartë shtetërorë, mysafirë e ambasador të vendeve mike. Të gjithë qytetarët janë të mirëseardhur të vizitojnë kazermat e Forcës së Sigurisë së Kosovës në: Prishtinë, Prizren, Pomozotin, Istog, Ferizaj, Mitrovicë dhe Gjilan. Në të gjitha kazermat e Forcës së Sigurisë së Kosovës, qytetarët do të kenë mundësi të shohin kapacitetet ushtarake të cilat do të jenë të ekspozuara në këtë ditë feste”, thuhet në njoftim./EO

Punëtorët e Radiotelevizionit të Kosovës (RTK) nga sot kanë nisur grevën e përgjithshme dyorëshe për shkak të mosmarrjes së pagave. Përfaqësuesit sindikalë të RTK-së i bëjnë thirrje kryeministrit në detyrë, Albin Kurti, që të ndërmarrë veprime të menjëhershme ligjore dhe të gjejë zgjidhje për t’i siguruar buxhetin RTK-së. Në të kundërtën, ata thanë se do t’i ashpërsojnë masat, mes tjerash edhe bojkotimin e fushatës elektorale për zgjedhjet e parakohshme të 28 dhjetorit, si dhe mos­përcjelljen e aktiviteteve politike.

Përfaqësuesi i Sindikatës së Punëtorëve të RTK-së, Gëzim Bimbashi, tha se kryeministri në detyrë, Albin Kurti, duhet t’i sigurojë buxhetin RTK-së, pasi ka zgjidhje ligjore për një gjë të tillë. 

“Prej sot jemi në grevë dyorëshe. Ne herët kemi hyrë në edicion të lajmeve, në vendin e punës tonë ku punojmë çdo ditë, për me shpreh pakënaqësinë tonë. Po hyjmë në muajin e dytë pa asnjë sinjal nga askush, andaj injorimi i kërkesave tona na ka sjellë deri këtu. Na kanë injoruar kërkesat si sindikatë dhe i kemi bërë thirrje më herët Kuvendit, por u shpërnda Kuvendi. Tash po bëjmë thirrje te qeveria, te kryeministri Kurti. I bëjmë thirrje kryeministrit Kurti që të ndërmarrë veprime të menjëhershme ligjore dhe të gjejë zgjidhje, pasi ka zgjidhje ligjore. Gjatë kësaj kohe unë kam takuar avokatë dhe njohës të ligjit dhe më janë prezantuar disa nga format që qeveria mund t’i ndërmarrë shumë shpejt dhe nuk bien në kundërshtim me ligjin. Prandaj kjo mbetet në vullnetin e qeverisë dhe kryeministrit Kurti për të gjetur ndonjë zgjidhje”, tha ai.

Në të kundërtën, Bimbashi tha se do t’i ashpërsojnë masat, madje do të bojkotojnë të gjitha aktivitetet politike si dhe fushatën elektorale.

“Në fund të kësaj jave do t’ju njoftojmë për masat e tjera. Fillimisht kemi shkuar me grevë dyorëshe dhe nga fundi i javës do të dalim me qëndrime për të vazhduar tutje. Greva nuk do të ndalet dhe do të vazhdojë çdo ditë. Ne, nëse nuk bëhet një zgjidhje, do të kërkojmë që të pezullohet mbulimi i fushatës elektorale, jo prej qejfit dhe dëshirës”, shtoi Bimbashi.

Në anën tjetër, kryetari i Asociacionit të Gazetarëve të Kosovës, Xhemajl Rexha, tha se situata e RTK-së është e paprecedent dhe e papranueshme për AGK-në. Duke shprehur përkrahjen ndaj grevës së RTK-së, ai tha se sigurimi i buxhetit për RTK-në është në dorën e kryeministrit në detyrë, Albin Kurti, dhe ministrit në detyrë të Financave, Hekuran Murati.

Ai bëri thirrje që të ndalohet presioni politik dhe financiar ndaj RTK-së.

“Kjo është një situatë e paprecedent dhe e papranueshme për transmetuesin publik. Ne e përkrahim grevën e sotme, përkrahim edhe masat e tjera në të ardhmen që sindikata mund t’i marrë, siç u përmend edhe bojkotimi i fushatës zgjedhore që do të ishte hapi minimal i ngjarjeve politike. Si AGK, që e kemi thënë edhe të kaluarën, ka vetëm një adresë të përgjegjësisë që është Qeveria e Kosovës. Gjithçka është në dorën e kryeministrit Kurti dhe ministrit të Financave, Hekuran Murati. Tashmë kanë edhe një përparësi për të ndërmarrë hapa pasi nuk janë ligjërisht deputetë të Kuvendit të Kosovës, janë vetëm kryeministër në detyrë dhe ministër në detyrë. Një argument më shumë për të marrë një vendim dhe për të ndarë buxhetin për tre muaj”, theksoi ai.

Sindikatat paralajmërojnë se greva do të vazhdojë deri në alokimin e buxhetit për RTK-në dhe, përveç grevës, do të organizojnë edhe protestë para Qeverisë dhe Kuvendit ditët në vijim. Në mungesë të pagave dhe zgjidhjes institucionale, sipas tyre rrezikohet funksionimi i programeve dhe misioni publik i transmetuesit të vetëm në vend.