Ministrat e Jashtëm të Bashkimit Evropian (BE) janë pajtuar të martën për t’i hequr sanksionet ekonomike kundër Sirisë, njoftoi shefja e politikës së jashtme të BE-së, Kaja Kallas.

“Dëshirojmë ta ndihmojmë popullin sirian ta ndërtojë një Siri të re, gjithëpërfshirëse dhe paqësore”, tha Kallas në një postim në platformën sociale X, pas diskutimeve me ministrat e Jashtëm në Bruksel.

Ky ndryshim nga Bashkimit Evropian në politikën e tij të jashtme vjen pasi presidenti amerikan, Donald Trump, theksoi javën e kaluar se do të urdhëronte heqjen e sanksioneve të SHBA-së ndaj Sirisë.

“BE-ja ka qenë gjithmonë pranë sirianëve gjatë 14 vjetëve të fundit – dhe do të vazhdojë të jetë”, tha Kallas.

Bashkimi Evropian i ka lehtësuar tashmë sanksionet që lidhen me energjinë, transportin dhe rindërtimin, si dhe transaksionet financiare të lidhura me to, por disa kryeqytete kanë argumentuar se ato ishin të pamjaftueshme për t’i mbështetur ndryshimin politik dhe rimëkëmbjen ekonomike të Sirisë.

“BE-ja dëshiron t’ia fillojë nga e para me Sirinë… por ne gjithashtu presim një politikë gjithëpërfshirëse brenda vendit, që përfshin të gjitha grupet e popullsisë dhe grupet fetare”, tha ministri i Jashtëm gjerman, Johann Wadephul, në një deklaratë me shkrim.

“Për ne është e rëndësishme që një Siri e bashkuar të mund ta marrë të ardhmen e saj në duart e veta”, shtoi ai.

Udhëheqësit e rinj të Sirisë kanë kërkuar me ngulm heqjen e sanksioneve ndërkombëtare, të cilat ishin vendosur për shkak se ish-presidenti i vendit, Bashar al-Assad, kishte shtypur kundërshtarët duke e zhytur vendin në luftë civile.

Por, diplomatët thanë se BE-ja synon të vendosë sanksione të reja individuale ndaj atyre që janë përgjegjës për nxitjen e tensioneve etnike, pas sulmeve vdekjeprurëse ndaj pakicës alavite.

Masa të tjera ndaj regjimit të Assadit dhe për ndalimin e shitjes së armëve apo pajisjeve që mund të përdoren për të shtypur civilët, pritet të mbeten në fuqi.

Ministri i Jashtëm i Sirisë, Asaad al-Shaibani, tha pas vendimit të BE-së se heqja e sanksioneve ekonomike tregon “vullnet ndërkombëtar” për të mbështetur Damaskun.

Shaibani shtoi se “populli sirian sot ka një mundësi shumë të rëndësishme dhe historike për të rindërtuar vendin e tij”./REL/

Shtëpia ku kaloi fëmijërinë Papa Leo XIV, Papa i parë amerikan në histori, është nxjerrë në shitje përmes një ankandi luksoz, pas interesit të madh që u krijua menjëherë pas zgjedhjes së tij më 8 maj.

Kjo pronë ndodhet rreth 32 kilometra në jug të Çikagos dhe përfshin tre dhoma gjumi. Ankandi nis me një çmim fillestar prej 250,000 dollarësh, ndërsa shitësi është i gatshëm të pranojë oferta në çdo kohë deri më 18 qershor. Shtëpia u ble nga një investitor pasurish të paluajtshme për 66,000 dollarë një vit më parë dhe më pas iu nënshtrua një rinovimi të plotë. Fillimisht ishte listuar në treg në janar me çmimin 219,000 dollarë, dhe më pas u ul në 199,000 dollarë, por pa tërhequr shumë vëmendje.

Interesi u rrit ndjeshëm pas zgjedhjes së Kardinalit Robert Francis Prevost si Papa Leon XIV. Pas kësaj, brenda vetëm disa orësh, pronari mori tetë oferta dhe hoqi shtëpinë nga tregu.

Papa Leon XIV kaloi fëmijërinë në këtë shtëpi, së bashku me prindërit e tij, babain Louis, që ishte mësues, nënën Mildred, bibliotekare, dhe dy vëllezërit.

Ekspertët e pasurive të paluajtshme shpjegojnë se ankandet luksoze janë gjithnjë e më të zakonshme për prona me një histori ose vlerë unike, që nuk përshtaten me tregun tradicional.

Përfaqësuesi i ankandit, Haghani, tha se pronat me një histori të tillë kanë një vlerë simbolike të veçantë, dhe ankandet ndihmojnë për të përcaktuar vlerën reale në treg.

Ndërkohë që Vatikani përgatitet për një epokë të re nën drejtimin e Papa Leon XIV, kjo shtëpi mund të shndërrohet në një objekt me vlerë të madhe historike dhe simbolike për blerësin e ri, si dhe për historinë amerikane të Kishës Katolike.

Presidenti rus Vladimir Putin dhe homologu i tij amerikan Donald Trump zhvilluan një bisedë telefonike që zgjati mbi dy orë, e cila u përshkrua nga të dy palët si shumë përmbajtësore, e sinqertë dhe konstruktive.

Putin e vlerësoi këtë bisedë si një hap pozitiv drejt rifillimit të dialogut për paqe mes Rusisë dhe Ukrainës, duke theksuar gatishmërinë e Moskës për të punuar mbi një memorandum që do të shërbente si bazë për një marrëveshje paqeje në të ardhmen.

Kreu i Kremlinit falënderoi SHBA-në për mbështetjen në rifillimin e negociatave direkte mes Moskës dhe Kievit, duke përmendur se bisedimet e fundit në Stamboll japin shpresë për arritje konkrete.

“Rusia është e gatshme të bashkëpunojë me Ukrainën për një marrëveshje që do të përcaktojë parimet për zgjidhjen e konfliktit, afatet për traktatin e paqes dhe kushtet e një armëpushimi të përkohshëm, nëse arrihet dakordësi,” tha Putin.

Nga ana e tij, Trump shprehu besimin se një zgjidhje paqësore është e mundur dhe se do të angazhohet për të ndihmuar në gjetjen e rrugës më të mirë drejt përfundimit të luftës. Sipas burimeve, gjatë bisedës udhëheqësit i janë drejtuar njëri-tjetrit me emër dhe nisën telefonatën me urimet e Putinit për lindjen e nipit të njëmbëdhjetë të Trump.

Megjithatë, nuk u vendos një afat konkret për armëpushimin, por Trump nënvizoi dëshirën për të avancuar sa më shpejt drejt paqes.

Biseda përfshiu edhe mundësinë e një shkëmbimi të ri të të burgosurve midis Rusisë dhe SHBA-së, me një marrëveshje të mundshme “nëntë për nëntë”.

Presidentët diskutuan gjithashtu për marrëdhëniet dypalëshe, duke shprehur gatishmërinë për t’i normalizuar më tej. Trump e konsideroi Rusinë si një nga partnerët më të rëndësishëm ekonomikë dhe tregtarë të Shteteve të Bashkuara.

Në një tjetër pikë, u diskutuan edhe negociatat e ndërmjetësuara nga Omani mes Uashingtonit dhe Teheranit mbi programin bërthamor iranian, të cilat Putin i vlerësoi si një zhvillim pozitiv për sigurinë rajonale.

Zëdhënësi i Kremlinit, Dmitry Peskov, dhe këshilltari Yury Ushakov pritet të japin detaje të mëtejshme për këtë bisedë. Kjo ishte telefonata e tretë mes dy liderëve që nga rikthimi i Trump në Shtëpinë e Bardhë, dhe ata ranë dakord të vazhdojnë komunikimin e hapur dhe dialogun mbi të gjitha çështjet e ngritura, me fokus të veçantë krizën në Ukrainë.

Ish-presidenti Joe Biden ka bërë të ditur publikisht se është diagnostikuar me një formë agresive të kancerit të prostatës, e cila tashmë ka përhapje në kocka. Zyra e tij konfirmoi lajmin të dielën, duke nxitur reagime dhe mbështetje nga mbarë bota.

Në një postim emocional në rrjetet sociale, Biden falenderoi të gjithë ata që i dërguan fjalë ngushëllimi dhe mbështetje, përfshirë një letër private nga Mbreti Charles i Britanisë së Madhe.

“Kanceri është një sfidë që prek shumë prej nesh,” shkroi Biden. “Unë dhe Jill kemi kuptuar se jemi më të fortë pas përballjes me vështirësitë. Faleminderit që na qëndroni pranë me dashuri dhe përkrahje.”

Zyra e ish-presidentit bëri me dije se diagnoza është një kancer i prostatës në fazë të avancuar, me një rezultat Gleason 9, që tregon agresivitet të lartë të sëmundjes, dhe që është përhapur në kocka.

Lajmi ka ndezur debatin mbi shëndetin e Bidenit, duke bërë që ish-presidenti Donald Trump të reagojë fillimisht me keqardhje, por më pas të ngrisë dyshime përse diagnoza nuk ishte bërë publike më herët.

“Jam i befasuar që publiku nuk është njoftuar më herët, pasi për të arritur në këtë fazë duhen vite,” tha Trump, duke sugjeruar se ekipi i Bidenit mund ta ketë fshehur këtë fakt.

Megjithatë, ekspertët e shëndetit bëjnë me dije se zbulimet e kancerit në faza të avancuara nuk janë të rralla. Një studim i vitit 2014 në Mbretërinë e Bashkuar tregoi se afërsisht 46% e pacientëve me kancer diagnostikohen në faza të vona të sëmundjes.