Aktualitet

Bullgaria heton shpërthimet në depot e municioneve

Published

4 years ago

on

Prokurorët bullgarë thanë se po mbledhin prova rreth përfshirjes së mundshme të gjashtë rusëve në katër shpërthime midis viteve 2011 dhe 2020 në depot bullgare të armëve, ku ruheshin municione për eksport në Ukrainë dhe Gjeorgji.

Një zëdhënëse tha se prokurorët mund të supozojnë në mënyrë të arsyeshme se ekzistojnë lidhje midis shpërthimeve në Bullgari, përpjekjes për helmim të tregtarit bullgar të armëve Emilian Gebrev në vitin 2015 dhe shpërthimeve të depove të municioneve në Republikën Çeke në 2014.

Gjashtë rusët ishin në Bullgari rreth datave kur ndodhën shpërthimet në depot e armëve dhe pati gjithashtu përpjekje për të helmuar zotin Gebrev, tha zëdhënësja e prokurorisë Siyka Mileva në një konferencë për shtyp të mërkurën.

“Provat e mbledhura deri tani të çojnë, me një shkallë të lartë besueshmërie, në përfundimin se qëllimi i veprimeve të shtetasve rusë ishte të ndalnin furnizimet e Gjeorgjisë dhe Ukrainës me municione,” tha zëdhënësja.

“Po mblidhen prova mbi përfshirjen e këtyre gjashtë shtetasve rusë,” tha ajo.

Ukraina ka patur përplasje me Rusinë që nga viti 2014, kur rajoni i saj i Krimesë u aneksua nga Moska dhe separatistët e mbështetur nga Rusia filluan një rebelim në Ukrainën lindore. Tensionet midis Rusisë dhe Gjeorgjisë kanë qenë të larta që nga lufta e tyre në vitin 2008.

Zëdhënësja tha se prokurorët po bashkëpunojnë me homologët në Republikën Çeke për të vendosur lidhje të mundshme midis shpërthimeve në Bullgari dhe atyre të vitit 2014 në depon çeke, ku gjithashtu ruheshin municione në pronësi të zotit Gebrev.

Aludimet

Moska i ka hedhur poshtë aludimet çeke si absurde ndërsa të mërkurën, Ministri i Jashtëm Sergei Lavrov hodhi poshtë hetimet në Bullgari. Ai u tha gazetarëve: “Ose pala bullgare nuk dinte asgjë dhe vetëm tani, pasi Republika Çeke njoftoi për incidentin e vitit 2014, vendosi t’ua kalonte çekëve dhe të hetonte më tej në histori, ose ata e dinin gjatë gjithë kësaj kohe por nuk e bënë publike për një arsye ose një tjetër.”

Zonja Mileva nuk i përmendi emrat e shtetasve rusë dhe as nuk dha hollësi të tjera rreth tyre, por tha se tre rusë të cilët janë akuzuar për vrasjen e mbetur në tentativë të zotit Gebrev ka të ngjarë të kenë qenë agjentë të zbulimit.

Prokurorët thanë se asnjëri nga shpërthimet, ai i vitit 2011 në një depo armësh në pronësi të kompanisë EMCO të zotit Gebrev, dy në kompaninë shtetërore të armëve VMZ në vitin 2015 dhe një i katërt i vitit 2020 në prodhuesin privat të armëve Arsenal, nuk kishte shkaqe të dukshme teknike.

Shpërthimet u komanduan që të gjitha nga distanca dhe erdhën pas zjarreve që autorët me sa duket i kishin planifikuar për t’u dhënë kohë punëtorëve të largoheshin nga zona dhe të shmangnin viktimat, tha zonja Mileva.

“Në të katër shpërthimet, prodhimi i destinuar për eksport në Gjeorgji dhe Ukrainë u shkatërrua,” tha ajo.

Në një deklaratë, EMCO tha se municionet e shkatërruara në depon e kompanisë në vitin 2011 nuk ishin të destinuara për eksport në Gjeorgji. Kompania mohoi që shpërthimi në fjalë të kishte ndonjë lidhje me ato në firmën shtetërore VMZ. EMCO u bëri thirrje prokurorëve të kërkojnë arsyet e vërteta të shpërthimeve.

Javën e kaluar, autoritetet çeke urdhëruan shumicën e stafit diplomatik rus në Pragë të largohej, pas akuzave që ngritën se pas shpërthimeve të depove të municioneve qëndronin agjentë rusë. Rusia dëboi një numër diplomatësh çekë si hakmarrje. Bullgaria ka shprehur solidaritet me Pragën./ VOA

Related Topics:
Continue Reading

Aktualitet

Vendimi i gjykatës: Popoviq dëbohet nga Kosova

Published

2 hours ago

on

August 8, 2025

By

Igor Popoviq është shpallur fajtor dhe është dënuar nga Gjykata Themelore në Prishtinë me gjobë prej 3 mijë eurosh dhe me masën plotësuese të dëbimit nga territori i Kosovës për një periudhë dyvjeçare, pas arritjes së marrëveshjes për pranimin e fajësisë me Prokurorinë Speciale të Republikës së Kosovës.

Sipas aktakuzës së ngritur më 4 gusht 2025 nga PSRK-ja , Igor Popoviq, ndihmësdrejtor në të ashtuquajturën Zyrë për Kosovën në Qeverinë e Serbisë, me dashje dhe me qëllim ka nxitur dhe përhapur publikisht urrejtje dhe mos durim midis grupeve etnike.

Në atë mënyrë që i njëjti me datën 18 korrik 2025, rreth orës 12:00 në Rahovec ka mbajtur një fjalim publik me të cilin i është drejtuar një mase të gjerë të qytetarëve, ku mes tjerash ka përdorur gjuhë me përmbajtje nxitëse dhe urrejtëse.

Kryetari i trupit gjykues, gjyqtari Kujtim Krasniqi, tha se i akuzuari Igor Popoviq, me është shpallur fajtor për veprën penale “nxitja e përçarjes dhe mosdurimit” nga neni 141, paragrafi 1 i Kodit Penal të Republikës së Kosovës.

Sipas tij, gjykata, në përputhje me dispozitat penale dhe procedurale, e ka dënuar Popoviqin me 6 muaj burgim, dënim i cili, me pëlqimin e të akuzuarit, zëvendësohet me gjobë në shumën prej 3 mijë eurosh.

Krasniqi tha se gjykata ka shqiptuar edhe dënim plotësues, dëbimin e Popoviqit nga territori i Republikës së Kosovës dhe ndalimin e hyrjes së tij për një periudhë prej dy vitesh.

“I akuzuari Igor Popoviq me shënime personale si në shkresë të lëndës është fajtor për veprën penale nxitja e përqarjes dhe mos durimit nga neni 141, paragrafi 1 i kodit penal të Republikës së Kosovës. Andaj gjykata konform dispozitave penale dhe procedurale të njëjtin e gjykon me dënim me burgim me kohëzgjatje prej 6 muajve, i cili dënim me pëlqimin e të akuzuarit zëvendësohet me dënim me gjobë në shumën prej 3 mijë eurove… Koha e kaluar në masën e paraburgimet nga data 18.07.2025 deri më datën 08.08.2025 i llogaritet në dënimin me burgim të shqiptuar. Po ashtu, Gjykata i shqipton edhe dënim plotësues. Urdhërohet dëbimi i të pandehurit Igor Popoviq nga territori i Republikës së Kosovës dhe i ndalohet hyrja për dy vite”, tha Krasniqi.

Mëngjesin e sotëm, më 8 gusht, Prokuroria Speciale i propozoi gjykatës që ndaj Popoviqit të shqiptohet i njëjtit dënim, sipas marrëveshjes, për veprën penale për të cilën akuzohet, gjashtë muaj burgim, i cili të zëvendësohet me gjobë në shumën prej 3 mijë eurosh.

Sot, prokurorja e rastit, Fikrije Krasniqi-Zejnullahu i propozoi gjykatës që ndaj Popoviqit të shqiptohet edhe dënimi plotësues – dëbimi nga territori i Kosovës për një afat prej dy vitesh, për çka palët janë pajtuar.

Avokati i Popoviq, Millosh Delliviq tha se i qëndrojnë mbrapa marrëveshjes së arritur me Prokurorinë Speciale.

Kujtojmë se arrestimi i Popoviq ndodhi pas mbajtjes së një fjalimi në Hoçë të Madhe të Rahovecit, ku ai u shpreh kundër Ushtrisë Çlirimtare të Kosovës.

Prokuroria vlerësoi se përmes këtyre deklaratave, Popoviq ka ndikuar negativisht në marrëdhëniet ndërmjet komuniteteve, duke nxitur mosbesim dhe tensione ndëretnike, dhe duke rrezikuar bashkëjetesën në shoqërinë kosovare.

Continue Reading

Aktualitet

​Qeveria në detyrë merr këto vendime në mbledhjen e radhës

Published

2 hours ago

on

August 8, 2025

By

Qeveria në detyrë e Kosovës ka mbajtur sot mbledhje elektronike në të cilën ka marrë disa vendime.

Kabineti qeveritar në detyrë ka miratuar vendimin për shqyrtim të mëtejmë të kërkesës me vetiniciativë për shpronësim për interes publik të pronave të paluajtshme të cilat janë të nevojshme për realizimin e Projektit Infrastrukturor për Interes Publik- Ndërtimi i Urës mbi lumin Ibër që lidh Mitrovicën e veriut dhe Mitrovicën e jugut.

Po ashtu, janë caktuar zonat e shërbimit për ofruesit e shërbimeve të ujit në Kosovë, si dhe është miratuar ndryshimin e Statutit të Kompanisë Rajonale të Ujësjellësit “Mitrovica” sipas vendimit të bordit të drejtorëve.

Continue Reading

Aktualitet

​Kurti takoi ambasadorët e QUINT-it dhe shefin e Zyrës së BE-së në Kosovë

Published

3 hours ago

on

August 8, 2025

By

Kryeministri në detyrë Albin Kurti ka pritur në takim ambasadorët dhe përfaqësuesit diplomatikë të shteteve të QUINT-it dhe shefin e Zyrës së Bashkimit Evropian në Kosovë.

Aty u diskutua mbi rrugën e integrimit të vendit tonë në BE, mos konstituimin e Kuvendit dhe arrestimet e qytetarëve të Kosovës nga Serbia.

Kurti informoi ambasadorët dhe përfaqësuesit diplomatikë për performancën ekonomike të vendit dhe rezultatet e politikave të qeverisë përgjatë pjesës së parë të këtij viti.

Ai tha se qarkullimi i bizneseve për gjashtë muajt e parë të vitit ka arritur vlerën 10.7 miliardë euro, duke shënuar një rritje 10.3%. Shpenzimet kapitale të qeverisë gjatë këtyre gjashtë muajve të parë janë 24% më të larta sesa në gjysmën e parë 2024.

Në çerekun e parë 2025, ekonomia është rritur për 3.61% të Bruto Produktit Vendor, tha ai.

Kurti ka folur edhe mbi numrin e bizneseve të reja të regjistruara këtë vit, si dhe veçoi të dhënat e fundit nga skema e punësimit “Qeveria për Familjet”, anëtarësimin e Kosovës në Regjistrin Evropian për Cilësi të Arsimit të Lartë dhe në Aleancën Evropiane për Praktikën Profesionale.

Continue Reading

Aktualitet

Ministri Sveçla priti në takim të ngarkuarin me punë në Ambasadën e Japonisë në Kosov

Published

4 hours ago

on

August 8, 2025

By

Ministri i Punëve të Brendshme, z. Xhelal Sveçla, ka pritur në takim, z Tanigaki Hiroyasu, i ngarkuar me punë në Ambasadën e Japonisë në Kosovë.

Fillimisht ministri Sveçla i uroi mirëseardhje në Kosovë, z Hiroyasu, të cilin e falënderoi për mbështetjen e vazhdueshme që ka dhënë Japonia në të gjitha hapat e shtet ndërtimit të Republikës së Kosovës, si dhe për rolin aktiv në anëtarësimin e Republikës së Kosovës në organizata të rëndësishme ndërkombëtare.

Me këtë rast, ministri Sveçla e njoftoi edhe për situatën e përgjithshme të sigurisë në Kosovë, si dhe situatën e fundit me zjarre. Ndërkohë ministri Sveçla e falënderoi Hiroyasu për përkrahen e vazhdueshme që ka dhënë përmes projekteve të ndryshme për ngritjen e kapaciteteve të Agjencisë për Menaxhim të Emergjencave thuhet në njoftimin nga MPB-ja.

Ndërsa, i ngarkuari me punë në Ambasadën e Japonisë në Kosovë, z. Tanigaki Hiroyasu, vlerësoi të arriturat në vitet e fundit në Kosovë dhe u shpreh i gatshëm në thellimin e bashkëpunimit në mes të dy vendeve.

Ambasadori japonez u zotua se edhe në të ardhëm shteti i Japonisë do të vazhdojë të përkrahë Republikën e Kosovës.

Continue Reading

Të kërkuara