Presidenti i SHBA-së, Donald Trump, tha sot se “çdo vend ose person” që blen naftë ose petrokimikate nga Irani do t’i nënshtrohet sanksioneve – duke rritur presionin mbi Teheranin mes negociatave mbi programin bërthamor të vendit.

Kushdo që e bën këtë nuk do të lejohet të bëjë biznes me Shtetet e Bashkuara të Amerikës në asnjë mënyrë apo formë”, shkroi Trump në një postim në platformën e tij “Truth Social”.

Kina shihet si blerësi më i madh i naftës iraniane.

Njoftimi i Trump erdhi pasi një raund i katërt bisedimesh midis Uashingtonit dhe Teheranit mbi programin bërthamor të Iranit u shty, pasi fillimisht ishte planifikuar për të shtunën.

Bisedimet midis të dërguarit special të SHBA-së, Steve Witkoff, dhe ministrit të Jashtëm iranian, Abbas Araghchi ishin planifikuar të zhvilloheshin në Romë, por u shtynë “për arsye logjistike”, sipas Omanit, i cili po vepron si ndërmjetës.

Sipas zëdhënëses së Departamentit Amerikan të Shtetit (DASH), Tammy Bruce, SHBA-ja supozon se do të ketë bisedime të mëtejshme në të ardhmen e afërt.

Fillimisht, Trump bëri thirrje për bisedime me Teheranin dhe kërcënoi me pasoja ushtarake nëse ato dështonin, duke deklaruar se qëllimi i tij kryesor ishte të parandalonte Iranin nga krijimi i armëve bërthamore.

Por të mërkurën, Departamenti Amerikan i Thesarit (DASH) vendosi sanksione të reja ndaj një numri kompanish në Emiratet e Bashkuara Arabe, Turqi dhe Iran, duke i akuzuar ato për përfshirje në tregtinë e petrokimikateve iraniane me vendet e treta dhe për ndihmën që i japin Iranit për t’iu shmangur sanksioneve.

Departamenti Amerikan i Shtetit (DASH) akuzoi gjithashtu Teheranin se po vazhdon të nxisë konfliktin në Lindjen e Mesme, të avancojë me programin e tij bërthamor dhe të mbështesë partnerët dhe përfaqësuesit e tij terroristë.

“SHBA-ja po vepron për të ndaluar flukset e të ardhurave të përdorura për të financuar këto aktivitete destabilizuese”, tha DASH./ATSH/

Sekretari amerikan i Shtetit, Marco Rubio, dhe nënpresidenti amerikan, JD Vance, shprehën pasiguri lidhur me shanset për arritjen e një marrëveshjeje të paqes për t’i dhënë fund luftës në Ukrainë.

“Mendoj se e dimë se ku ndodhet Ukraina dhe e dimë se ku ndodhet Rusia tani… Ata janë më afër, por ende larg njëri-tjetrit”, tha Rubio në Fox News më 1 maj.

Ndërkaq, Vance duke folur në një intervistë të veçantë për të njëjtën rrjet, shkoi më tej, duke thënë se lufta në Ukrainë nuk do të përfundojë “së shpejti”.

Rubio tha se, nëse nuk ka një përparim të vërtetë në luftën në Ukrainë së shpejti, presidenti amerikan, Donald Trump, do të duhet të vendosë se sa kohë do t’i kushtojë procesit të negociatave.

SHBA-ja ka paralajmëruar më herët se negociatat kanë hyrë në një fazë “kritike”, dhe mungesa e përparimit mund të nënkuptojë tërheqjen e Uashingtonit nga përpjekjet për të ndërmjetësuar përfundimin e konfliktit.

Ish-këshilltari i sigurisë kombëtare i SHBA-së, Mike Waltz, tha se ndihet krenar që vazhdon të shërbejë në administratën e Presidentit Donald Trump, pasi u nominua për të qenë përfaqësuesi i përhershëm i SHBA-së në Kombet e Bashkuara.

“Jam i nderuar që vazhdoj t’i shërbej Presidentit Trump dhe vendit tonë të madh”, shkroi Walz në Platformën X, duke komentuar vendimin e presidentit amerikan.

Më herët, Trump njoftoi në rrjetin e tij social Truth Social se do ta nominonte Wolz për pozicionin e përfaqësuesit të përhershëm të ardhshëm të SHBA-së në OKB.

Trump shtoi se, ndërkohë, Sekretari i Shtetit Marco Rubio do të shërbejë si këshilltar i sigurisë kombëtare dhe “do të vazhdojë udhëheqjen e tij të fortë në Departamentin e Shtetit”.

Mediat amerikane raportuan më parë, duke cituar burime të paidentifikuara, se Këshilltari i Sigurisë Kombëtare i Shtëpisë së Bardhë, Mike Waltz, dhe zëvendësi i tij Alex Wong po largohen nga këto pozicione.

Zëvendëspresidenti i Shteteve të Bashkuara, JD Vance, deklaroi se lufta në Ukrainë “nuk do të përfundojë së shpejti”.

Gjatë një interviste për Fox NewsVance ai tha se pyetja kryesore për administratën amerikane është si mund të ndihmojë Rusinë dhe Ukrainën që të “gjejnë terren të përbashkët” për t’i dhënë fund konfliktit që ka zgjatur mbi tre vjet.

Megjithatë, ai theksoi se “do të varet nga [Rusia dhe Ukraina] të arrijnë një marrëveshje dhe të ndalojnë këtë konflikt brutal, shumë të egër”.

Këto deklarata vijnë pak pasi SHBA dhe Ukraina nënshkruan një marrëveshje për ndarjen e fitimeve nga mineralet e rralla të Ukrainës, në këmbim të ndihmës së ardhshme të sigurisë nga Uashingtoni.

Në të njëjtën intervistë, Vance mbrojti qasjen e ish-presidentit Donald Trump ndaj luftës në Ukrainë.

“Po, sigurisht, [ukrainasit] janë të zemëruar që u pushtuan,” tha ai. “Por a do të vazhdojmë të humbasim mijëra e mijëra ushtarë për disa milje territor në këtë apo atë drejtim?”

Trump, ndërkohë, sugjeroi këtë javë se Ukraina mund të jetë e gatshme të heqë dorë nga Krimea – gadishulli që Rusia e pushtoi në vitin 2014 – si pjesë e një marrëveshjeje për armëpushim.

Por presidenti ukrainas Volodymyr Zelensky kishte lënë të kuptohej më parë se nuk mund të pranonte kontrollin rus mbi Krimenë, duke cituar kushtetutën ukrainase.

Ndërkohë, në një intervistë të veçantë për Fox News të enjten, Sekretari i Shtetit i SHBA-së, Marco Rubio, deklaroi se duhet të ketë një “përparim” të shpejtë në konflikt, ndryshe Trump “do të duhet të vendosë sa kohë do t’i kushtojë kësaj çështjeje”.

Presidenti rus Vladimir Putin njoftoi këtë javë një armëpushim të përkohshëm tre-ditor që nis më 8 maj, për të përkuar me përvjetorin e përfundimit të Luftës së Dytë Botërore.

Ministri i Jashtëm i Ukrainës, Andrii Sybiha, bëri thirrje për një armëpushim të menjëhershëm 30-ditor si përgjigje ndaj nismës ruse.

Megjithatë, lufta midis dy vendeve vazhdon.

Të enjten në mbrëmje, një sulm me dron rus në qytetin juglindor të Zaporizhzhia-s plagosi 14 persona, por pa shkaktuar viktima.

Po atë ditë, Moska akuzoi Kievin për një sulm me dron në një treg në një zonë të Ukrainës jugore nën kontrollin e Rusisë, ku sipas autoriteteve ruse, u vranë shtatë persona dhe u plagosën mbi 20 të tjerë.

Kievi mohoi akuzat, duke theksuar se objektivi i sulmit ishin vetëm forcat ushtarake.