Lajmet

Britania do të dërgojë raketa me rreze të gjatë në Ukrainë

Ministri britanik i Mbrojtjes, Ben Wallace, ka thënë se disa sisteme raketore M270 do të dërgohen në Ukrainë.

Published

on

Mbretëria e Bashkuar do të dërgojë raketat e para me rreze të gjatë në Ukrainë, pavarësisht kërcënimeve të Rusisë për Perëndimin.

Ministri britanik i Mbrojtjes, Ben Wallace, ka thënë se disa sisteme raketore M270 do të dërgohen në Ukrainë, në mënyrë që ky shtet të mbrohet nga Rusia.

Qeveria britanike nuk ka konfirmuar sa armë të tilla do të dërgohen, mirëpo transmetuesi britanik, BBC, ka marrë vesh që fillimisht do të nisen tri të tilla.

Ky vendim është marrë në koordinim me Shtetet e Bashkuara, të cilat kanë njoftuar javën e kaluar se do të dërgojnë sisteme raketore në Ukrainë.

Veprimi i Shteteve të Bashkuara veçse ka zemëruar Moskën, pasi presidenti rus, Vladimir Putin ka kërcënuar të dielën për zgjerim të listës së shënjestrave që Rusia do të sulmojë në Ukrainë, nëse shtetet e Perëndimit do t’i dërgojnë Kievit armë me rreze të gjatë.

Qeveria britanike ka thënë se ushtria ukrainase do të trajnohet si të përdorë lansueset e raketave në javët në vazhdim.

Teksa ka bërë të ditur vendimin, Wallace ka thënë se Mbretëria e Bashkuar është duke marrë rol udhëheqës në furnizim të trupave ukrainase me “armë të rëndësishme, të cilat janë të nevojshme për të mbrojtur shtetin nga pushtimi i paprovokuar”.

“Teksa taktikat e Rusisë ndryshojnë, ashtu duhet të ndodhë me mbështetjen tonë në Ukrainë”.

“Këto sisteme raketore do t’iu mundësojnë shokëve ukrainas të mbrojnë veten më shumë kundër artilerisë së rëndë, të cilën forcat e Putinit e përdorin pa dallim nëpër qytete”.

Sistemet raketore britanike mund të nisin 12 raketa tokë-tokë brenda një minuti dhe mund të sulmojnë shënjestra brenda 80 kilometrave me precizitet të lartë.

Ky sistem është i ngjashëm me atë që dërgon ShBA-ja në Ukrainë, HIMARS.

Uashingtoni ka thënë se do të dërgojë armë të tilla në Ukrainë pas garancive të marra se raketat do të përdoren për qëllime të mbrojtjes dhe nuk do të sulmojnë shënjestra brenda Rusisë.

E njëjta ndalesë vlen edhe për sistemin britanik.

Në një intervistë për televizionin shtetëror rus të dielën, Putin ka thënë: “Në përgjithësi, të gjitha këto diskutime për furnizime me armë, kanë vetëm një qëllim – për të zgjatur konfliktin e armatosur sa më gjatë që është e mundur”.

Lideri rus ka thënë se sistemet amerikane që po dërgohen në Ukrainë nuk janë “asgjë e re”.

Mirëpo ai ka paralajmëruar kundër dërgimit të raketave me rreze edhe më të gjatë.

“Nëse ata furnizohen, ne do të nxjerrim përfundimet e nevojshme dhe do të përdorim armë, të cilat i kemi të mjaftueshme, për të sulmuar shënjestrat që nuk i kemi sulmuar ende”.

Ky paralajmërim ka ardhur ndërkohë që është raportuar për shpërthime në disa pjesë të Kievit të dielën, duke shënuar sulmet e para në kryeqytet pas disa javësh.

Rusia ka përqendruar ofensivën e saj në lindje të Ukrainës, të njohur si Donbas gati një muaj pas nisjes së luftës.

Disa prej luftimeve më të ashpra janë raportuar në qytetin Severodonjeck.

Marrja e kontrollit të këtij qyteti nënkupton që forcat ruse marrin kontrollin e rajonit Luhansk.

Presidenti ukrainas, Volodymyr Zelensky, ka thënë të dielën se ai ka vizituar luftëtarët në Donbas.

Mbështetja për hetim të krimeve të luftës

Sekretari britanik i Drejtësisë, Dominic Raab, ka bërë të ditur të hënën se një ekip i avokatëve dhe zyrtarëve policorë britanikë do të angazhohen për t’i ndihmuar Kryeprokurorit Karim Khan për të hetuar krimet e supozuara të Rusisë në Ukrainë.

Në mesin e ndihmës do të ofrohet qasje më e madhe në ekspertizën e policisë dhe ushtrisë britanike, derisa shtatë avokatë me përvojë në ligjin penal do të ofrojnë ndihmë për të identifikuar të dhëna për krimet e kryera në Ukrainë dhe për ndëshkim të përgjegjësve.

Gjykata Ndërkombëtare Penale ka nisur hetimet që mund të shënjestrojnë zyrtarë të lartë rusë, të cilët besohet se janë përgjegjës për krime të luftës, krime kundër njerëzimit dhe gjenocid.

Mizori dhe varreza masive janë raportuar në disa qytete dhe qyteza në Ukrainë, në zonat e pushtuara fillimisht nga forcat ruse, të cilat më pas janë larguar nga Kievi dhe zonat përreth për të fokusuar luftën në lindje të shtetit.

Masakra civile janë zbuluar në Buça, qytezë afër Kievit, pasi njerëzit janë parë të vdekur nëpër rrugë, me duar të lidhura.

Deri më tani, Ukraina ka raportuar 15,000 krime të dyshuara të luftës, përfshirë rastin e një gruaje ukrainase që dyshohet të jetë dhunuar nga trupat ruse.

Rreth 600 të dyshuar janë identifikuar dhe 80 ndjekje penale janë në proces e sipër.

Deri më tani për këtë luftë është dënuar një ushtar rus, i cili ka vrarë një civil 62-vjeçar.

Gjykata ukrainase e ka dënuar 21-vjeçarin rus, Vadim Shishimarin me burgim të përjetshëm./REL

lajme

Fati i Lojërave Mesdhetare “Prishtina 2030” në pikëpyetje

Published

on

By

Komiteti Ndërkombëtar i Lojërave Mesdhetare (ICMG) nuk ka dhënë një përgjigje të qartë nëse Kosova ende mund ta ruajë të drejtën për organizimin e Lojërave Mesdhetare “Prishtina 2030”, në një kohë kur shqetësimet për vonesat në përgatitje dhe përmbushjen e obligimeve po shtohen. Në një përgjigje të shkurtër dërguar të enjten në mbrëmje për KosovaPress-in, Sekretariati i ICMG-së ka shmangur sqarimet se a është ende e mundur realizimi i zotimeve apo nëse procesi ka kaluar pikën e kthimit, duke e orientuar median që për informata të mëtejshme t’i drejtohet Komitetit Organizativ të Lojërave Mesdhetare Prishtina 2030 (OCMG).

Kjo paqartësi ndërkombëtare vjen paralelisht me një përplasje të hapur institucionale brenda vendit, ku faji për rrezikimin e kësaj ngjarjeje sportive po hidhet nga njëri institucion te tjetri. Një ditë më parë në Kuvendin e Kosovës, kryeministri Albin Kurti deklaroi se mungesa e unitetit të brendshëm po e rrezikon organizimin e Lojërave, duke e vlerësuar si të mirë bashkëpunimin me Komitetin Olimpik të Kosovës, por duke kritikuar raportet me Komunën e Prishtinës, teksa shtoi se mbetet optimist i përmbajtur se procesi do të çohet përpara pa korrupsion.

Ndaj këtyre deklaratave reagoi ashpër kryetari i Prishtinës, Përparim Rama, i cili ia atribuoi Qeverisë përgjegjësinë e plotë për dështimin dhe anulimin e takimit të paraparë me përfaqësuesit e ICMG-së në Athinë. Përmes një reagimi publik, Rama theksoi se komunikimi i fundit i ICMG-së konfirmon se takimi është anuluar për tri arsye që binin mbi ekzekutivin: moskryerja e pagesës, mosdërgimi i emrave të delegacionit dhe mungesa e përgjigjeve në postat elektronike.

Këto akuza të ndërsjella pasojnë paralajmërimet serioze që ICMG-ja i kishte dërguar palës kosovare në letrën e 15 tetorit, ku evidentoheshin rreziqet nga mungesa e garancisë bankare ose të sigurimit, pagesat e papërfunduara dhe moskthimi i përgjigjeve. Të gjitha këto zhvillime pritet të marrin një drejtim më të qartë më 19 dhjetor, kur Komiteti Ekzekutiv i ICMG-së do të shqyrtojë gjendjen aktuale dhe propozimin për thirrjen e një Asambleje të Jashtëzakonshme që do të vendosë për fatin e “Prishtina 2030”, ngjarje kjo e fituar nga Kosova në shtator të vitit 2023 dhe e paraparë të mbahet nga 24 korriku deri më 4 gusht 2030 në disa komuna të Kosovës dhe në Durrës. /Kosova Press/

 

Continue Reading

Sport

UEFA dënon FFK-në me 42 mijë e 250 euro gjobë dhe mbyllje të pjesshme me kusht të stadiumit

Published

on

By

Konfederata Evropiane e Futbollit (UEFA) ka shqiptuar një dënim të rëndë ndaj Federatës së Futbollit të Kosovës (FFK) për shkeljet e evidentuara në ndeshjen e Ligës së Kombeve ndaj Izraelit, e cila u zhvillua javën e kaluar dhe përfundoi me barazim 0:0. Pas hapjes së disa procedurave disiplinore, Trupi i Kontrollit, Etikës dhe Disiplinës i UEFA-s vendosi ta gjobisë FFK-në me gjithsej 42 mijë e 250 euro, si dhe t’i shqiptojë dënim me kusht për mbylljen e pjesshme të stadiumit “Fadil Vokrri” në ndeshjen e ardhshme si vendase.

Sipas vendimeve të publikuara të enjten, pjesa më e madhe e gjobës, prej 20 mijë eurosh, është shqiptuar për transmetimin e një mesazhi të papërshtatshëm për ngjarje sportive, pa saktësuar se për cilin mesazh bëhet fjalë. Për sjellje raciste ose diskriminuese, FFK-ja është ndëshkuar me 10 mijë euro gjobë dhe me urdhrin për mbylljen e një sektori të stadiumit për një ndeshje, dënim ky që mbetet me kusht. Po ashtu, 10 mijë euro të tjera janë ndarë për fishkëllimat dhe pengesat gjatë intonimit të himnit të Izraelit, ndërsa 2 mijë e 250 euro për hedhjen e gjësendeve në fushën e lojës.

Ky është ndëshkimi i dytë që UEFA i shqipton Kosovës në edicionin e pestë të Ligës së Kombeve, pas ndeshjes që bëri bujë edhe për faktin se disa lojtarë të Kosovës mbajtën kokën ulur në shenjë proteste gjatë himnit kundërshtar. Në po të njëjtën paketë vendimesh disiplinore, UEFA ka dënuar edhe federatat e Bosnjë-Hercegovinës, Rumanisë dhe Anglisë. /E.A/

Continue Reading

Vendi

Komisioni Hetimor për rastin e Arlinda Zekajt interviston sot tre zyrtarë institucionalë

Published

on

By

Komisioni Hetimor Parlamentar për veprimet dhe mosveprimet institucionale lidhur me vrasjen e Arlinda Zekajt dhe trajtimin e dhunës ndaj fëmijëve dhe grave në familje, do të vazhdojë sot me intervistimin e zyrtarëve përgjegjës.

Në mbledhjen që nis në orën 09:00 në ambientet e Kuvendit të Kosovës, para anëtarëve të këtij komisioni pritet të japin dëshmitë e tyre drejtoresha e Drejtorisë për Mirëqenie Sociale në Komunën e Pejës, Albulena Mujaj-Bajraktaraj, zyrtarja për Barazi Gjinore në po këtë komunë, Samka Drançolli, si dhe drejtori i departamentit në Ministrinë për Punë, Familje dhe Vlerat e Luftës Çlirimtare, Blerim Shabani.

Këto intervistime vijnë në kuadër të hetimeve parlamentare për të zbardhur përgjegjësitë e institucioneve para ngjarjes tragjike në Vitomiricë të Pejës, ku viktima u vra nga ish-kunati i saj, vetëm dy ditë pasi para këtij komisioni dëshmoi edhe kryetari i Komunës së Pejës, Gazmend Muhaxheri.

Ndërkaq, krahas punimeve të këtij komisioni, në Kuvendin e Kosovës sot me fillim nga ora 10:00 do të mblidhet edhe Komisioni për Çështje të Sigurisë dhe Mbrojtjes, i cili do të zhvillojë një takim të përbashkët me Komitetin për Mbrojtje dhe Siguri të Odës Ekonomike Amerikane. /E.A/

Continue Reading

Lajmet

Samiti Britani–BE në Bruksel, pritet marrëveshje për lëvizjen e të rinjve dhe tregtinë

Published

on

By

Andy Burnham do të qëndrojë sot në Bruksel për të marrë pjesë në samitin mes Mbretërisë së Bashkuar dhe Bashkimit Evropian, në një përpjekje për të riformësuar marrëdhëniet e Britanisë me bllokun evropian. Gjatë këtij takimi, i cili pritet të nisë zyrtarisht më vonë gjatë mëngjesit të sotëm me ceremoninë e mirëseardhjes, në tryezë janë edhe marrëveshje të reja në fushën e ushqimit dhe tregtisë.

Një nga pikat kryesore që pritet të miratohet është skema e lëvizshmërisë së të rinjve. Sipas burimeve të BBC-së, kjo marrëveshje do t’u mundësojë 100 mijë të rinjve nga Bashkimi Evropian që të udhëtojnë, punojnë dhe studiojnë në Mbretërinë e Bashkuar çdo vit, ndërsa e njëjta kuotë do të vlejë edhe për të rinjtë britanikë që duan të shkojnë në Evropë. Megjithatë, Downing Street ende nuk ka komentuar mbi detajet e këtij plani.

Këto zhvillime vlerësohen si paketa më e madhe e ndryshimeve në raportet me Brukselin që nga koha e Brexit-it, ndonëse në thelb mbeten një sërë rregullimesh të pjesshme. Siç komenton redaktori politik i BBC-së, Chris Mason, këto hapa ende nuk përbëjnë një rishikim të plotë e rrënjësor të marrëdhënieve mes Mbretërisë së Bashkuar dhe Bashkimit Evropian. /BBC/

 

Continue Reading

Të kërkuara