Policia e Kosovës sot ka vendosur gurthemelin për ndërtimin e stacionit policor në Zubin Potok.

Në këtë ceremoni ka marrë pjesë edhe ministri në detyrë, Xhelal Sveçla i cili ky stacion modern do të ketë infrastrukturën e nevojshme për pjesëtarët e Policisë sonë dhe burim i sigurisë e adresë e raportimit për të gjithë qytetarët pa dallim.

“Sigurisë më të lartë po ia shtojmë edhe infrastrukturën më të mire”, ka shkruar Sveçla.

Ai ka thënë se mbeten të përkushtuar në ruajtjen e sigurisë së qytetarëve, qetësisë publike e, pa dyshim, edhe sovranitetit e integritetit territorial të vendit tonë.

Ndryshe, vlera e përgjithshme e kontratës për ndërtimin e këtij objekti është mbi një milion euro.

Sot në Kosovë pritet të zhvillohen një sërë aktivitetesh dhe ngjarjesh të rëndësishme institucionale dhe publike.

Në Zubin Potok, Policia e Kosovës ka vendosur gurthemelin për ndërtimin e stacionit të ri policor, një investim që synon të rrisë sigurinë në këtë komunë dhe të forcojë praninë policore. Në këtë ceremoni morën pjesë ministri në detyrë i Punëve të Brendshme, Xhelal Sveçla, zëvendësdrejtori i Përgjithshëm i Policisë së Kosovës, si dhe zyrtarë të tjerë të lartë të PK-së.

Në qytetin e Gjilanit, kryetari i komunës Alban Hyseni ka vendosur gurthemelin për ndërtimin e Shkollës së Mesme të Mjekësisë, një projekt që pritet të përmirësojë infrastrukturën arsimore dhe të ofrojë kushte më të mira për nxënësit në fushën e mjekësisë.

Ndërkohë, në Prishtinë, Institucioni i Avokatit të Popullit do të mbajë një tryezë të rrumbullakët me temë “Liria e mediave dhe siguria e gazetarëve”, ku do të diskutohen sfidat që ballafaqohen profesionistët e medias dhe nevoja për garantimin e një ambienti të sigurt për punën e tyre.

Në Kuvendin e Kosovës do të zhvillohet seanca konstituive, ku partitë politike pritet të diskutojnë për zhbllokimin e procesit të konstituimit të përbërjes së re parlamentare.

Po ashtu, në mbrëmje, në kompleksin e Ambasadës së Shteteve të Bashkuara të Amerikës në Prishtinë do të organiziohet një pritje solemne nga e Ngarkuara me Punë e SHBA-së, znj. Anu Prattipati, për të shënuar 249-vjetorin e Pavarësisë së Shteteve të Bashkuara.

Forca e Sigurisë së Kosovës (FSK) ka njoftuar se në kuadër të përgatitjeve për validimin e Regjimentit të tretë të këmbësorisë, Kompania e armëve ka realizuar ushtrimin fushor “Tango Mike”.

Sipas njoftimit ushtrimi i Komandës së Forcave Tokësore (KFT) është realizuar me qëllim të vlerësimit të kapaciteteve operacionale dhe aftësive taktike të togjeve, si dhe testimin e funksionimit të komandës dhe ndërlidhjes në kushte të ngjashme me ato reale të betejës.

“Në këtë ushtrim janë validuar togjet e kompanisë, duke u vlerësuar në aspektin e dislokimit në terren, lëvizjes taktike, vendosjes në pozicione mbrojtëse dhe mbështetje me zjarre për njësitë operacionale të këmbësorisë”, thuhet në njoftim.

Policia e Kosovës ka arrestuar mbrëmë një person për sulm ndaj personit zyrtar dhe armëmbajtje pa leje në Kaçanik.

Sipas policisë, rreth mbrëmë rreth orës 23:00, në rrugën “Vëllezërit Çaka” në Kaçanik, ka ndodhur një rast i sulmit ndaj personave zyrtarë.

“Menjëherë, policët e rendit dhe hetuesit rajonalë kanë reaguar ndaj thirrjes dhe pas intervistimit të viktimave dhe dëshmitarëve, është kuptuar se derisa policët në detyrë, gjatë tentativës për arrestimin e një personi të dyshuar, janë sulmuar nga ky i fundit”, njofton policia.

Sipas policisë, i dyshuari, gjatë rezistencës, ka goditur zyrtarët policorë me shqelma në pjesën e këmbëve.

“I dyshuari është shoqëruar në stacionin policor në Kaçanik dhe pas intervistimit në prani të avokatit mbrojtës, ka pranuar veprën penale për të cilën ngarkohet”, njofton policia.

Në komunikatë thuhet po ashtu se, ai ka pranuar se posedonte dy thika që janë gjetur në veturën e tij.

Lidhur me rastin është njoftuar prokurori i shtetit, i cili ka autorizuar hetuesit rajonalë të ndërmarrin të gjitha veprimet hetimore dhe ka urdhëruar ndalimin e të dyshuarit B.M, 21 vjeç, për 48 orë.