Lajmet

Boris Johnson nën akuza se zyra e tij organizoi festë gjatë karantinës

Atëherë, ishte e ndaluar të takohesh me më shumë se një person nga një familje tjetër në vende publike.

Published

4 years ago

January 11, 2022

UBT news

Kryeministri britanik Boris Johnson po përballet me zbulime të reja të një feste në Downing Street gjatë karantinës së parë të koronavirusit, kohë kjo kur tubimet shoqërore ishin të ndaluara.

Një email i zbuluar supozohet se tregon një zyrtar të lartë nga zyra e Johnson që ftoi më shumë se 100 staf në një festë në kopsht në maj të vitit 2020, me një propozim që secili të sillnin pijen e tyre. Raportet në mediat e Mbretërisë së Bashkuar sugjerojnë se kryeministri mori pjesë në ngjarje me gruan e tij, Carrie.

Sipas ITV News, sekretari kryesor i Johnson, Martin Reynolds u dërgoi një email më 20 maj rreth 100 njerëzve, duke i ftuar ata për një pije në distancë.

“Pas asaj që ka qenë një periudhë tepër e ngarkuar, menduam se do të ishte mirë të shfrytëzonim sa më shumë motin e mrekullueshëm dhe të pinim disa pije, me distancë sociale në kopshtin No10 këtë mbrëmje”, pretendohet se tha ai.

“Ju lutemi bashkohuni me ne nga ora 6 pasdite dhe sillni pijen tuaj!”

Në fund të dhjetorit, Guardian publikoi një foto që tregonte Johnson dhe këshilltarët e tij duke pirë verë në kopshtin e Downing Street, për të cilën gazeta tha se ndodhi në maj 2020. Zyrtarët nga zyra e kryeministrit kishin thënë se ishte një takim pune.

“Është e neveritshme”, tha nënkryetarja e Partisë Laburiste të opozitës, Angela Rayner. “Në kohën kur shumë njerëz nuk mund të shihnin të dashurit e tyre që po vdisnin, popullit britanik iu tha të bënin gjënë e duhur për t’i mbajtur njerëzit të sigurt dhe për t’u kujdesur për të afërmit e tyre”, tha ajo për Sky News.

“Ne ishim në një kohë krize dhe kishim nevojë për një udhëheqje të mirë dhe ajo që morëm është dikush që ishte i mirë për të thënë gënjeshtra… Unë mendoj se publiku britanik tani ka duruar mjaft”.

Një hetim i brendshëm tashmë është duke u zhvilluar për pretendimet se festat janë mbajtur në Downing Street rreth Krishtlindjeve të vitit 2020./UBTNews/

Vendi

Mbi 100 gramë kokainë dhe marihuanë kapen në Vërmicë

Published

16 hours ago

June 19, 2026

UBT News

Dogana e Kosovës, në bashkëpunim me Policinë e Kosovës, ka zbuluar dy raste të substancave narkotike gjatë kontrolleve në Pikën Kufitare të Vërmicës.

Në rastin e parë, gjatë kontrollit të një automjeti që po hynte në Kosovë, janë gjetur 104.90 gramë substancë e dyshuar si kokainë, e fshehur në çantën personale të një udhëtari.

Ndërkaq, në rastin e dytë janë zbuluar 5.53 gramë substancë e dyshuar si marihuanë, e fshehur në bagazhin e një automjeti. Gjatë kontrollit është gjetur edhe një thikë kuzhine e padeklaruar.

Rastet janë proceduar për hetime të mëtejshme nga autoritetet kompetente.

/A.K/

Vendi

Mbyten dy vajza të mitura në Tale

Published

17 hours ago

June 19, 2026

UBTNews

Një ngjarje e rëndë ka ndodhur mesditën e sotme në plazhin e Tales, ku dy vajza të mitura, të moshës 11 dhe 9 vjeçe, janë mbytur në det.

Sipas njoftimit zyrtar të Policisë, tragjedia ka ndodhur rreth orës 12:50. Pas marrjes së informatës, zyrtarët policorë kanë dalë menjëherë në vendngjarje dhe, në bashkëpunim të ngushtë me pushuesit e tjerë, kanë bërë të mundur gjetjen dhe nxjerrjen e trupave të pajetë në breg.

“Në bashkëpunim me pushuesit, është bërë e mundur gjetja dhe nxjerrja e trupave të pajetë në breg“, thuhet në njoftimin e policisë. /E.A/

Vendi

Dyshime për cilësinë: Bllokohen mbi 1 mijë e 400 infuzione në Spitalin e Mitrovicës

Published

18 hours ago

June 19, 2026

UBTNews

Shërbimi Spitalor Klinik dhe Universitar i Kosovës (ShSKUK) ka njoftuar se ka bllokuar përkohësisht 1,432 njësi të një produkti mjekësor në Spitalin Rajonal “Sami Haxhibeqiri” në Mitrovicë, pas dyshimeve se ai mund të mos jetë brenda specifikave të kërkuara të cilësisë.

Bëhet fjalë për infuzionet e llojit Compound Sodium Lactate (500 ml). Alarmi u ngrit fillimisht nga farmacistja përgjegjëse e spitalit, gjë që vuri në lëvizje Inspektoratin Farmaceutik dhe Agjencinë e Kosovës për Produkte dhe Pajisje Medicinale (AKPPM).

Pas një inspektimi të dytë të kryer më 17 qershor, autoritetet urdhëruan bllokimin e menjëhershëm të këtij kontingjenti deri në pranimin e rezultateve nga analizat laboratorike. ShSKUK ka njoftuar opinionin publik se ky është një masë parandaluese dhe se mbetet e përkushtuar për të garantuar sigurinë e plotë të pacientëve dhe cilësinë e barnave nëpër spitalet publike. /E.A/

Lajmet

KQZ gati për rezultatet përfundimtare: Përfundon rinumërimi i 185 vendvotimeve

Published

19 hours ago

June 19, 2026

UBTNews

Komisioni Qendror i Zgjedhjeve (KQZ) ka përmbyllur zyrtarisht procesin e rinumërimit për të gjitha 185 vendvotimet e kontestuara. Sipas zëdhënësit të KQZ-së, Valmir Elezi, procesi ka përfunduar sot në orën 12:00 dhe të dhënat e reja tashmë janë përditësuar në platformën zyrtare të rezultateve.

Me këtë hap, KQZ-ja ka mbyllur teknikisht të gjitha aktivitetet e administrimit të votave dhe është gati për shpalljen e rezultateve përfundimtare të zgjedhjeve të 7 qershorit.

Megjithatë, përpara shpalljes zyrtare, duhet të respektohen afatet ligjore për ankesat e mundshme. Elezi sqaroi se sot përfundon afati për ankesat lidhur me administrimin e numërimit nga dita e mërkurë (17 qershor), ndërsa po ashtu do të pritet nëse do të ketë ankesa për procesin e rinumërimit të përmbyllur sot.

Për më tepër, para se të procedohet tutje, KQZ-ja do të kërkojë një konfirmim zyrtar nga Paneli Zgjedhor për Ankesa dhe Parashtresa (PZAP) për të vërtetuar nëse ka ndonjë ankesë tjetër ende në shqyrtim.

Në fund, Qendra e Numërimit dhe Rezultateve (QNR) do të hartojë një raport të detajuar për gjetjet në secilin prej 185 vendvotimeve. Ky raport synon të konfirmojë se procesi i parë i numërimit nëpër komuna është zhvilluar me saktësi dhe në përputhje të plotë me vullnetin e shprehur të qytetarëve, raporton Ekonomia Online. /Ekonomia Online/ /E.A/