Muajin e kaluar, UEFA i kishte dhënë FIFA-s afat deri më 2 nëntor për të publikuar detajet e këtij propozimi kontrovers dhe për t’iu përgjigjur më shumë se 100 pyetjeve që lidhen me qeverisjen dhe procesin e vendimmarrjes në organizatë.

Kjo kërkesë erdhi pas një mbledhjeje të Këshillit të FIFA-s, në të cilën presidenti Gianni Infantino kërkoi falje, por nuk dha shpjegime lidhur me mënyrën se si ishte hartuar propozimi. Ai kërkoi që pyetjet të dorëzoheshin me shkrim.

Vetëm pak orë para përfundimit të afatit të caktuar nga UEFA, sekretari i përgjithshëm i FIFA-s, Mattias Grafstrom, u dërgoi një njoftim anëtarëve të Këshillit, duke bërë të ditur se ata do të kenë mundësi t’i shqyrtojnë dokumentet vetëm në kushte të veçanta dhe personalisht, në selinë e FIFA-s në Cyrih.

Sipas tij, kjo procedurë synon të ruajë detyrimet e konfidencialitetit. Anëtarëve të Këshillit u është kërkuar që brenda dy javëve të ardhshme të regjistrojnë interesimin e tyre për të pasur qasje në dokumente.

Megjithatë, ende nuk është bërë e ditur se cilat dokumente do të vihen në dispozicion.

BBC Sport raporton se FIFA e konsideron të parealizueshëm afatin dyjavor të UEFA-s për t’iu përgjigjur më shumë se 100 pyetjeve. Kjo për shkak të angazhimeve të fundit të organizatës në përgatitjen e një Kupe të re të Botës për të rinj në Azerbajxhan, si dhe organizimit të një Kongresi të jashtëzakonshëm më vonë gjatë këtij muaji.

Nga ana tjetër, UEFA nuk ka përcaktuar se çfarë hapash do të ndërmarrë nëse FIFA nuk i përmbush kërkesat brenda afatit. Megjithatë, synimi i saj është të shtojë presionin ndaj Infantinos përpara 18 nëntorit, datë kur përfundon afati për kandidatët që dëshirojnë të konfirmojnë kandidaturën e tyre kundër tij në zgjedhjet presidenciale të FIFA-s vitin e ardhshëm.

Foto: Foto: Associated Press

D.L

Unai Emery do të rikthehet këtë javë në Barcelonë, për herë të parë në Ligën e Kampionëve, që nga humbja historike e PSG-së ndaj Barcelonës në vitin 2017, në një nga përmbysjet më të mëdha në historinë e futbollit evropian.

Të martën, nga ora 21:00, Aston Villa e drejtuar nga Emery do të përballet me Barcelonën në “Camp Nou”, në një nga ndeshjet më interesante të xhiros së katërt të Ligës së Kampionëve.

Skuadra angleze po kalon një formë të shkëlqyer në këtë garë dhe aktualisht renditet në pozitën e dytë në tabelën me 36 skuadra, prapa Paris Saint-Germainit.

Pikërisht me PSG-në, Emery kishte përjetuar një nga momentet më të vështira të karrierës së tij në Barcelonë, në mars të vitit 2017.

Skuadra franceze kishte fituar ndeshjen e parë të një të tetës së finales me rezultat 4:0, por Barcelona arriti një përmbysje të jashtëzakonshme, duke fituar 6:1 në ndeshjen e kthimit dhe duke siguruar kualifikimin me rezultat të përgjithshëm 6:5. Kjo përballje mbetet e njohur si “Remontada”.

Që nga ajo kohë, Emery nuk është rikthyer në “Camp Nou” në kuadër të Ligës së Kampionëve, ndërsa këtë herë do të paraqitet me një Aston Villa që po zhvillohet më shpejt se pritshmëritë.

Barcelona, kundërshtarja më e vështirë e Emeryt

Përballja e së martës do të jetë edhe një tjetër kapitull në rivalitetin e gjatë mes Emeryt dhe Barcelonës.

Gjatë karrierës së tij, trajneri spanjoll është përballur 30 herë me katalunasit, ndërsa skuadrat e tij kanë regjistruar vetëm tri fitore.

Dy prej tyre janë veçanërisht të paharrueshme: fitorja 4:0 e PSG-së në vitin 2017 dhe triumfi 2:0 i Villarrealit në “Camp Nou”, në maj të vitit 2022.

Ndërkohë, Aston Villa synon të vazhdojë formën pozitive edhe në këtë edicion të Championsit, ku ka regjistruar fitore radhazi dhe ka realizuar 12 gola. Nicolas Jackson është një prej futbollistëve që po spikat në repartin ofensiv.

Manchester Unitedi kërkon reagim ndaj Romës

Një tjetër përballje interesante e së martës do të zhvillohet në “Old Trafford”, ku Manchester Unitedi do të përballet me Romën.

Skuadra angleze po kalon një periudhë të vështirë, duke u renditur në vendin e 20-të në Ligën e Kampionëve dhe në pozitën e 17-të në Premier League.

Përballja me italianët shihet si një mundësi për reagim, ndërsa Roma nuk ka rezultate të mira në ndeshjet evropiane të zhvilluara në Angli. Skuadra italiane ka fituar vetëm një nga 21 përballjet e tilla.

Kane synon rekordin e Ronaldos

Vëmendje të veçantë do të ketë edhe Harry Kane, i cili synon të barazojë një rekord të Cristiano Ronaldos në Ligën e Kampionëve.

Portugezi mban rekordin për më së shumti ndeshje radhazi me gol në këtë garë, me 11 të tilla, gjatë të cilave realizoi 17 gola.

Sulmuesi anglez i Bayern Munichut është aktualisht në seri prej dhjetë ndeshjesh radhazi me gol në Champions, duke regjistruar 13 realizime.

Të martën, Bayerni do të ketë një sfidë të vështirë në udhëtim ndaj Atletico Madridit, ku Kane do të kërkojë ta vazhdojë ecurinë pozitive. Ai ka luajtur më parë në stadiumin “Metropolitano”, por nuk ka arritur të shënojë.

Ndërkohë, të mërkurën në program janë edhe disa përballje interesante, ku lideri i Premier Leagues, Arsenali, do të luajë në udhëtim ndaj Slavia Pragës, ndërsa Real Madridi do të përballet me AEK-un e Athinës.

Një tjetër ndeshje që pritet me interes është ajo mes Liverpoolit dhe Fenerbahçes, ku anglezët do të kërkojnë fitoren e parë në udhëtim ndaj një skuadre turke në historinë e tyre në Kupën Evropiane dhe Ligën e Kampionëve.

D.L

Mbrojtësi kosovar Ron Raçi mund të largohet nga Hajduku i Splitit gjatë afatit kalimtar të janarit, pasi nuk është i kënaqur me minutazhën që po merr në skuadrën kroate.

Lajmi është bërë i ditur nga mediumi kroat “Nogometne Vijesti”, sipas të cilit 24-vjeçari po shqyrton mundësinë e largimit në kërkim të më shumë hapësirës për lojë.

Raçi së fundmi ka humbur vendin e titullarit te Hajduku, ndërsa në pesë ndeshjet e fundit në të gjitha garat nuk ka luajtur asnjë minutë, duke qëndruar në bankën rezervë.

Paraqitjen e fundit, qendërmbrojtësi kosovar e kishte më 10 tetor, në përballjen ndaj Dinamos së Zagrebit.

Gjatë këtij edicioni, Raçi ka regjistruar gjithsej 792 minuta lojë dhe ka realizuar një gol.

Pavarësisht situatës aktuale, mbrojtësi ka pasur paraqitje pozitive me fanellën e Hajdukut, ndërsa trajneri Gonzalo Garcia kishte shprehur më herët publikisht vlerësimin për cilësitë e reprezentuesit të Kosovës.

Raçi iu bashkua klubit nga Spliti në verën e vitit të kaluar, duke u transferuar nga Prishtina për shumën prej 300 mijë eurosh.

Megjithatë, kontrata e tij me Hajdukun është e vlefshme deri në verën e vitit 2029, ndaj mbetet të shihet se si do të zgjidhet e ardhmja e tij gjatë afatit kalimtar dimëror.

D.L

Trepça po kalon një moment shumë të mirë në FIBA Europe Cup, ku ka regjistruar tri fitore radhazi dhe tashmë synon ta vazhdojë serinë pozitive edhe në përballjen e radhës.

Skuadra mitrovicase ka shënuar fitoren e tretë radhazi, pasi në Tbilisi mposhti BC Batumi 2010 me rezultat bindës 70:91, në kuadër të Grupit A.

“Xehetarët” e kontrolluan ndeshjen nga fillimi deri në fund, duke mbajtur epërsinë gjatë gjithë takimit dhe duke mos e vënë në diskutim fitoren.

Më i dalluari te Trepça ishte Drilon Hajrizi me 20 pikë, tetë kërcime dhe shtatë asistime. Kontribut të rëndësishëm dhanë edhe Shawn Jones dhe Kenny Hasbrouck, të cilët realizuan nga 17 pikë secili.

Tashmë, mitrovicasit do të kenë një sfidë shumë më të vështirë, pasi të mërkurën përballen me liderin e grupit, Trierin, me synimin për ta regjistruar fitoren e katërt radhazi në këtë garë evropiane.

Një tjetër sukses do të ishte një hap i rëndësishëm për Trepçën në vazhdimësinë e garës.

D.L