Mërgim Vojvoda është një nga futbollistët më të njohur të Kombëtares së Kosovës dhe një prej lojtarëve më të rëndësishëm në repartin defensiv. Ai luan kryesisht si mbrojtës i djathtë, por falë shpejtësisë dhe energjisë së madhe mund të luajë edhe si mesfushor krahu. Karrierën e nisi në Belgjikë, ku luajti për skuadra si Standard Liege, Sint-Truiden dhe Mouscron, para se të transferohej në Serie A te Torino.

Pas disa sezoneve në elitën e futbollit italian, Vojvoda tani është pjesë e Comos, skuadër që po surprizon këtë sezon nën drejtimin e Cesc Fabregas. Ai po kalon formë shumë të mirë, duke kontribuar me gola, asistime dhe paraqitje të rëndësishme për ekipin. Së fundmi, Vojvoda shënoi edhe kundër Juventusit, duke dëshmuar nivel të lartë ndaj një prej klubeve më të forta në Evropë.

Përveç golit ndaj Juventusit, ai regjistroi edhe asist ndaj Lecces për Nico Paz. Forma e tij e mirë po e ndihmon Comon në luftën për top katërshe dhe për një kualifikim historik në Ligën e Kampionëve.

Me fanellën e Kosovës, Vojvoda ka zhvilluar shumë ndeshje dhe vazhdon të jetë një nga lojtarët më të besueshëm të ekipit. Ai njihet për përkushtimin, disiplinën dhe shpirtin luftarak që tregon në çdo ndeshje.

Një burrë i dyshuar është arrestuar në Hungari pasi akuzohet se ka përdorur të dhënat e vjedhura të kartës së kreditit të aktorit Johnny Depp, duke shpenzuar mbi 536 mijë paund gjatë dy viteve të fundit.

Sipas raportimeve, i dyshuari është një 27-vjeçar nga Jordania, i arrestuar në Budapest, ku kishte marrë me qira një apartament. Hetuesit thonë se ai përdori të dhënat e kartës për qindra transaksione online, përfshirë rezervime akomodimi dhe pagesa të tjera dixhitale.

Autoritetet po hetojnë gjithsej 308 transaksione, me një vlerë të përgjithshme prej rreth 619 mijë eurosh. Dyshohet se aktiviteti ka ndodhur nga janari i vitit 2024 deri në dhjetor 2025.

Sipas hetuesve, Johnny Depp nuk kishte dijeni për transaksionet, të cilat u zbuluan vetëm pasi banka vërejti aktivitete të dyshimta në llogarinë e tij.

Hetimi nisi pasi banka kontaktoi autoritetet hungareze dhe FBI-në, ndërsa policia gjurmoi të dyshuarin përmes adresave IP, email-eve dhe një numri telefoni hungarez të lidhur me pagesat.

Gjatë bastisjes në apartamentin ku qëndronte i dyshuari, policia sekuestroi pajisje elektronike që besohet se janë përdorur në mashtrim. Po ashtu, u gjetën edhe substanca të dyshuara narkotike, duke hapur një hetim të veçantë për posedim droge.

I dyshuari ka mohuar të gjitha akuzat, ndërsa gjykata ka urdhëruar paraburgimin e tij deri në përfundim të hetimeve.

Një 21-vjeçar austriak është dënuar me 15 vjet burgim pasi planifikoi një sulm xhihadist në koncertin e Taylor Swift në Vjenë gjatë turneut “Eras Tour” në gusht të vitit 2024.

I riu, i identifikuar si Beran A, u shpall fajtor edhe për disa vepra të tjera që lidhen me terrorizmin. Ai ishte arrestuar pas një informacioni të marrë nga CIA, pak para mbajtjes së koncertit të parë nga tri koncertet e planifikuara në stadiumin Ernst Happel në Vjenë.

Pas alarmit për sulm, të tre koncertet u anuluan menjëherë, duke prekur afro 200 mijë fansa të këngëtares amerikane.

Prokurorët thanë se Beran A ishte radikalizuar dhe kishte shprehur besnikëri ndaj grupit xhihadist ISIS. Sipas tyre, ai kishte tentuar të siguronte armë ilegale, përfshirë një mitraloz dhe një granatë dore, por pa sukses.

Në të njëjtin proces gjyqësor u dënua edhe një tjetër 21-vjeçar nga Sllovakia, Arda K, i cili mori 12 vjet burgim për lidhje me një celulë të ISIS-it, ndonëse nuk kishte qenë i përfshirë drejtpërdrejt në planin për sulmin ndaj koncertit.

Taylor Swift kishte reaguar më herët duke thënë se ngjarja i kishte krijuar “një ndjenjë të re frike”, por falënderoi autoritetet për parandalimin e sulmit.

Kapiteni i kombëtares zvicerane me origjinë shqiptare, Granit Xhaka, është bërë pjesë e një projekti të veçantë marketingu të rrjetit të supermarketeve zvicerane Denner, në prag të Kampionatit Botëror të Futbollit.

Projekti me titull “The Socceritos” është realizuar si një film me metrazh të shkurtër, i cili ndërthur stilin e filmave western me temën e futbollit, duke sjellë një qasje kreative në fushatën promocionale të kompanisë.

Në film, përkrah legjendës së kinemasë Terence Hill, 87 vjeç, luajnë edhe yjet e futbollit zviceran Granit Xhaka dhe Zeki Amdouni, si dhe futbollistja Ana Maria Markoviq.

Sipas skenarit, tre personazhet udhëtojnë në Perëndimin e Egër për të mësuar banorët vendas të luajnë futboll, ndërsa përballen me një kriminel lokal që përpiqet ta ndalojë përhapjen e këtij sporti. Konflikti kulmon me një bast që vendos fatin e futbollit në qytet.

Fushata e Denner synon të lidhë historinë e filmit me identitetin e kompanisë si pionere e dyqaneve me çmime të lira në Zvicër, duke bërë një paralelizëm mes zhvillimit të futbollit dhe modernizimit të rrjetit të saj tregtar.

Xhirimet janë realizuar në Spanjë, në të njëjtat lokacione ku më herët Terence Hill ka xhiruar filmat e tij klasikë western. Projekti është drejtuar nga regjisori zviceran Reto Salimbeni dhe është prezantuar premierë në kinemanë “Corso” në Zürich, para se të shpërndahet në platformat digjitale të Denner.