Sekretari amerikan i Shtetit, Marco Rubio, ka bërë të ditur se administrata e drejtuar nga presidenti i SHBA-së, Donald Trump, po e riorganizon Departamentin amerikan të Shtetit (DASH).

Ky vendim u mor, sipas Rubios, në mënyrë që të eliminohen zyrat që administrata e Trumpit i konsideron të tepërta dhe për të shkurtuar disa programe që thotë se nuk përputhen me interesat e SHBA-së.

“Kjo qasje do të fuqizojë Departamentin që nga themeli, nga zyrat te ambasadat”, tha Rubio në një deklaratë, duke i përshkruar lëvizjet si pjesë e agjendës së Trumpit për ta vendosur SHBA-në në rend të parë, si prioritet.

“Funksionet specifike për rajone do të konsolidohen për ta rritur funksionalitetin, zyrat e tepërta do të hiqen dhe programet jo-statutore, që nuk janë në përputhje me interesat thelbësore kombëtare të Amerikës, do të pushojnë së ekzistuari“, tha Rubio.

Punën që më parë e kryente nënsekretari për Siguri Civile, të Drejtat e Njeriut dhe Demokraci tani do të vendoset nën një koordinator të ri për Ndihmën e Jashtme dhe Çështjet Humanitare, shtoi ai.

Rubio, i cili shërben edhe si mbikëqyrës i administratës së shkatërruar të USAID-it, kritikoi rritjen e departamentit ndër vite, duke e quajtur atë “të fryrë, burokratik dhe të paaftë për të kryer misionin e tij thelbësor diplomatik në këtë epokë të re të konkurrencës së fuqive të mëdha”.

Ky riorganizim vjen pasi Trump në shkurt urdhëroi ndryshime në Shërbimin e Jashtëm të SHBA-së – trupit diplomatik të vendit – për të siguruar që ajo të ndiqte agjendën e tij të politikës së jashtme.

Zyrtarët amerikanë në mars thanë se departamenti po përgatitej gjithashtu të mbyllte gati një duzinë konsullatash. Por, në njoftimin e Rubios nuk u tha asgjë për konsullata.

Zëvendëspresidenti i Shteteve të Bashkuara, JD Vance, deklaroi gjatë një vizite zyrtare në Indi se administrata e Presidentit Donald Trump është e përkushtuar për të “ribalancuar tregtinë globale”, në një përpjekje për të ndërtuar një sistem tregtar më të drejtë dhe të qëndrueshëm.

Në një deklaratë për mediat pas takimit me kryeministrin indian Narendra Modi, Vance konfirmoi se dy udhëheqësit kishin finalizuar termat e referencës për negociatat tregtare mes dy vendeve. Kjo nismë, sipas tij, synon të thellojë partneritetin ekonomik dhe të forcojë bashkëpunimin strategjik SHBA-Indi.

“Ne duam të bashkëpunojmë me njerëz dhe vende që njohin natyrën historike të momentit në të cilin ndodhemi – nevojën për të ndërtuar një sistem tregtie që është i balancuar, i hapur, i drejtë dhe i qëndrueshëm,” deklaroi Vance.

Ai theksoi gjithashtu se Amerika nuk kërkon që aleatët e saj të ndjekin një model të vetëm politik apo ekonomik:

“Partnerët e Amerikës nuk duhet të duken si Amerika. Por ne duhet të kemi qëllime të përbashkëta.”

Duke iu përgjigjur kritikëve të politikave tregtare të Trump, Vance tha se ato nuk kanë të bëjnë me kthimin pas në kohë, por me riformësimin e sistemit global për të përfituar nga mundësitë e së ardhmes:

“Presidenti Trump nuk kërkon të rikthejë vendet e punës të së kaluarës, siç pretendojnë disa. Ai po punon për të ribalancuar tregtinë globale në mënyrë që Amerika dhe aleatët e saj, përfshirë Indinë, të ndërtojnë një të ardhme që ia vlen për të gjithë njerëzit tanë.”

Kjo vizitë vjen në një kohë të rëndësishme për marrëdhëniet dypalëshe SHBA-Indi, që gjithnjë e më shumë po shihen si bosht i bashkëpunimit ekonomik dhe gjeostrategjik në Indo-Paqësor.

Rripi i Gazës është shndërruar në një “tokë dëshpërimi” pas 50 ditësh të një bllokade totale nga autoritetet izraelite, e cila ka ndalur të gjitha furnizimet me ndihma humanitare dhe mallra jetike për popullsinë palestineze. Kështu deklaroi Philippe Lazzarini, Komisioneri i Përgjithshëm i Agjencisë së Kombeve të Bashkuara për Ndihmën dhe Punët për Refugjatët Palestinë (UNRWA).

Në një postim në rrjetin social X, Lazzarini theksoi se “uria në enklavë po përhapet dhe po thellohet – kjo është një situatë e krijuar qëllimisht nga njeriu.” Ai shtoi se ndihma humanitare është shndërruar në “mjet pazari dhe armë lufte”, ndërsa miliona civilë mbeten të bllokuar pa akses në kujdes shëndetësor apo ndihma bazë.

Sipas Lazzarinit, mbi 2 milionë palestinezë, shumica prej tyre gra dhe fëmijë, janë privuar nga ndihma mjekësore. Ndërkohë, rreth 3,000 kamionë me ndihma emergjente të UNRWA-s janë të gatshëm për të hyrë në Gaza, por pengohen nga bllokada e vendosur.

Kriza humanitare përkeqësohet më tej pas rifillimit të operacioneve ushtarake izraelite më 18 mars, kur Forcat Mbrojtëse të Izraelit (IDF) nisën një seri sulmesh ajrore mbi objektivat e Hamasit në Gaza. Kjo erdhi pas përfundimit të një armëpushimi që ishte vendosur në janar, pasi – sipas zyrës së kryeministrit Benjamin Netanyahu – Hamasi hodhi poshtë propozimet e ndërmjetësuara nga SHBA.

Zyra e Netanyahu deklaroi se qëllimi i operacioneve është sigurimi i lirimit të pengjeve dhe çmontimi i infrastrukturës së Hamasit. Megjithatë, përfaqësues të Hamasit dhe kritikë të tjerë në rajon kanë akuzuar Shtetet e Bashkuara për mbështetje të ofensivës izraelite dhe për përshkallëzimin e krizës humanitare.

Autoritetet zvicerane kanë shtuar tetë media ruse në listën e tyre të sanksioneve, thuhet në një dokument të publikuar në faqen e internetit të Sekretariatit të Shtetit për Çështjet Ekonomike të vendit (SECO).

Ndër të tjera, lista e sanksioneve përfshin faqen e lajmeve në internet Lenta.ru, kanalin televiziv Zvezda dhe gazetën Krasnaya Zvezda, si dhe agjencinë e lajmeve News Front, faqen e internetit SouthFront, RuBaltic.ru dhe Fondacionin Strategic Culture. Ai specifikoi se kufizimet do të hyjnë në fuqi më 23 prill.

Më 24 shkurt, Bashkimi Evropian prezantoi paketën e 16-të të sanksioneve individuale dhe ekonomike kundër Rusisë. Në kuadër të kësaj pakete, Brukseli pezulloi licencat e transmetimit të një sërë mediash ruse, duke përfshirë Eurasia Daily, News Front, SouthFront, RuBaltic.ru, Lenta,ru, Zvezda dhe Fondacionin Strategic Culture.