Lajmet

Bislimi për Rregulloren e re të BQK-së: Qeveria do të dalë me një listë masash

Numri dy i Qeverisë foli edhe për Rregulloren e re të Bankës Qendrore të Kosovës.

Published

2 years ago

on

Zëvendëskryeministri i Kosovës, Besnik Bislimi, ka deklaruar se ekzekutivi ka ndërmarrë disa hapa që e mbështesin ekonominë në komunat veriore, ndërsa këto komuna i sheh me potencial për gjenerimin e energjisë së ripertritshme.

Në tryezën e organizuar nga Qendra për Dialog Humanitar me temën “Zhvillimi ekonomik për serbët në Kosovë”, numri dy i Qeverisë foli edhe për Rregulloren e re të Bankës Qendrore të Kosovës. Me këtë vendim, Bislimi tha se ka për synim rritjen e sigurisë të sistemit bankar dhe sistemit të pagesave.

Bislimi ka shtuar se elementi i parë ka qenë proporcion tejet i madh i shfrytëzimit të monedhave 500 euro në qarkullim. Ai tha se përvojat e muajit të kaluar, kanë treguar se rregullorja e BQK-së ishte e qëlluar.

“Hapi i parë është mbështetja që i ofrojmë ndërmarrjeve, ne këtë e bëjmë përmes programeve të mbështetjes së subvencioneve ne mënyre indirekte. Një mbështetje tjetër që e bëjmë është edhe përmes rritjes së ekonomisë. Mbështetja tjetër është edhe fuqizimi i kërkesës agregate. Dhe shtylla e katërt është mbështetja direkte e projekteve infrastrukturore e cila mbështet përmes tri kanaleve. Kemi dizajnuar një projekt shumë të madh të BE-së, një program i cili do të mbështeste bashkëpunimin dhe koordinimin e komunave me shumicë serbe me komunat tjera”, tha ai.

E sa i përket Rregullores së BQK-së për dinarin serb, zëvendëskryeministri ka deklaruar se nuk ka pasur qëllim që të merret me as një monedhë dhe se ky vendim është marrë për t’i mbrojtur qytetarët nga paratë false. Ai ka shtuar se e treta ka qenë çështja e importimit e eksportimit të monedhave në tërësi, përfshirë edhe dollarëve amerikanë, lekëve shqiptarë e dinarit serb.

“Të gjitha monedhave në Kosovës, për të cilat duhet vendosur një ligjshmëri. Kjo është kërkesë e Procesit të Berlinit, ku kërkohet përdorimi i mekanizmit SEPA nga të gjitha vendet e Ballkanit Perëndimor, e nuk mund të anëtarësohesh këtu pa arritur të konsolidosh sistemin e pagesave brenda territorit të Kosovës. Jemi të vetëdijshëm se në afatshkurtër, zbatimi i kësaj mase do të krijojë vështirësi për një pjesë të qytetarëve që kanë marrë e vazhdojnë të marrin mbështetje financiare nga Republika e Serbisë. BQK-ja ka nxjerrë një varg aktivitete e masa që synojnë të zbusin këtë ndikim. Në ditët në vijim edhe Qeveria do të dalë me listë prej 10 masave”, ka shtuar Bislimi.

E ministri për Kthim dhe Komunitete, Nenad Rashiq, foli për masat që i ka ndërmarrë Qeveria e Kosovës për ndihmesën nga komunitetit serb që jetojnë në Kosovë.

“Mbi të gjitha dua të ju kujtoj që në vitin e kaluar kemi publikuar për herë të parë konkurs publik, kishim rreth 3500 qytetarë që kishin aplikuar. Nga këto 3500 persona ka pasur kategori të ndryshme por që një numër të tyre të madh kemi arritur që t’a pranojmë aplikimin, për ndërtim shtëpish. Kemi dashur që për herë të par të i qasemi problemin dhe jo ta bëjmë ad-hoc që të kemi konkurse. Vitin e kaluar për herë të parë kemi nisur punën për data bazën për të gjithë të kthyerit. Shkurti i viti të kaluar ka treguar që ne jemi të hapur dhe ka treguar që të gjitha ata që kanë të drejt mund të na drejtohen. Dhe strategjia që është miratuar që ka një peshe financiare rreth 32 milionë euro, në 4 vitet e ardhshme do të jetë për kategoritë nga këto 32 milionë euro do të kemi edhe programin ekonomik dhe për kthim”, deklaroi ai.

Gordana Doriq, nga Shoqata e Grave Afariste “Avenija”, tha se gjendja ekonomike në mjediset serbe është kaotike, ndërsa vendimet që i ka ndërmarrë Qeveria i quajti të tmerrshme. Tha se me këto vendime po ndihmon me largimin e serbëve.

“Për sa i përket gjendjes ekonomike në gjendja është kaotike dhe kjo po zgjatë për shumë vite. Këto fjalë që i dëgjova janë tregime të bukura por sinqerisht nuk kanë për të dhënë ndonjë efekt të madh që seriozisht do të ndodh zhvillimi ekonomik në mjediset serbe. Ne në këto vite, nuk kemi ndjerë këtë për më tepër qeveria e tashmë edhe hapat që po i ndërmerr për këto dy vite është e tmerrshme. Ajo po e fuqizon largimin e serbëve nga këto dhe jo fuqizimin e serbeve. Është dëmtuar ekonomia edhe me këto vendime shkelin edhe shumë marrëveshje të tjera. Ndalimi i dinarit sa do që ka arsye ky është vendim ad-hoc, me ndërprerjen e dinarit ju krijoni një situatë kaotike”, tha ajo.

Related Topics:
Continue Reading

Lajmet

PZAP refuzon ankesat për rinumërim, KQZ pret afatin për ankim në Gjykatën Supreme

Published

3 hours ago

on

June 22, 2026

By

Komisioni Qendror i Zgjedhjeve (KQZ) ka bërë të ditur se do të presë përfundimin e të gjitha procedurave ankimore para shpalljes së rezultateve përfundimtare të zgjedhjeve të parakohshme për Kuvendin e Kosovës.

Kjo vjen pasi Paneli Zgjedhor për Ankesa dhe Parashtresa (PZAP) ka refuzuar ankesat e paraqitura nga kandidatët për deputetë, Bekim Haxhiu nga PDK-ja dhe Qëndrim Kryeziu nga LDK-ja, të cilët kishin kërkuar rinumërim të votave.

Sipas vendimit të PZAP-it, ankesat janë vlerësuar si të pabazuara dhe nuk është urdhëruar rinumërim shtesë.

Zëdhënësi i KQZ-së, Valmir Elezi, ka konfirmuar se institucioni është njoftuar me vendimet, por ka theksuar se palët kanë të drejtë ankese në Gjykatën Supreme brenda afatit ligjor prej 48 orësh.

Sipas KQZ-së, vetëm pas plotfuqishmërisë së vendimeve do të vlerësohet nëse ekzistojnë obligime konkrete për zbatim nga ana e institucionit. Nëse nuk do të ketë vendime të tjera që ndikojnë në proces, atëherë KQZ do të procedojë me shpalljen e rezultateve përfundimtare të zgjedhjeve.

Kujtojmë se Bekim Haxhiu kishte kërkuar rinumërim të plotë të votave të kandidatëve të PDK-së, duke argumentuar se gjatë rinumërimeve të deritanishme janë evidentuar mospërputhje në numërim dhe se diferencat e ngushta mes kandidatëve mund të ndikojnë në renditjen përfundimtare. Megjithatë, PZAP nuk e ka mbështetur këtë kërkesë. /A.K/

 

Continue Reading

Lajmet

Përurohet “Oda e Zejtarëve” në Çarshinë e Vjetër të Gjakovës

Published

3 hours ago

on

June 22, 2026

By

Në Çarshinë e Vjetër të Gjakovës është përuruar “Oda e Zejtarëve”, një projekt i dedikuar promovimit të zejeve tradicionale dhe ruajtjes së trashëgimisë kulturore të qytetit.

Lajmin e ka bërë të ditur kryetari i Komunës së Gjakovës, Ardian Gjini, i cili ka vlerësuar rëndësinë e këtij investimi për zhvillimin kulturor dhe turistik të komunës.

“Sot, në Çarshinë e Vjetër të Gjakovës, përuruam Odën e Zejtarëve – një projekt i veçantë për qytetin dhe trashëgiminë tonë kulturore”, ka deklaruar Gjini.

Sipas tij, projekti do t’u shërbejë zejtarëve lokalë si një hapësirë e dedikuar për promovimin e zejeve tradicionale, ndërsa të rinjtë dhe vizitorët do të kenë mundësi të njihen më nga afër me këtë pjesë të rëndësishme të trashëgimisë kulturore.

Investimi është realizuar në kuadër të projektit “Ndërlidhja e turizmit përmes trashëgimisë kulturore dhe zgjidhjeve inteligjente në Lezhë dhe Gjakovë”, i financuar nga Programi IPA Cross-Border Shqipëri–Kosovë.

Kryetari Gjini ka theksuar se zhvillimi i turizmit dhe fuqizimi i ofertës kulturore të Gjakovës mbeten ndër prioritetet kryesore të qeverisjes lokale./A.K/

Continue Reading

Lajmet

Siparantum Kids sjell mbrëmje artistike në Prishtinë për Festën Ndërkombëtare të Muzikës

Published

3 hours ago

on

June 22, 2026

By

Në kuadër të Festës Ndërkombëtare të Muzikës, Siparantum Kids organizoi një mbrëmje të veçantë artistike në zemër të Prishtinës, duke sjellë para publikut performanca të zërave të rinj.

Me një program të përzgjedhur muzikor, fëmijët interpretuan këngë korale dhe përcollën mesazhe bashkimi, gëzimi dhe shprese, duke dëshmuar fuqinë e muzikës si një gjuhë universale që lidh njerëzit përtej kufijve.

Sipas Ambasadës Franceze në Kosovë, e cila ka mbështetur këtë aktivitet kulturor, çdo tingull, buzëqeshje dhe duartrokitje e mbrëmjes ishte një festë e talentit, kreativitetit dhe dashurisë për artin.

Ngjarja mblodhi artdashës dhe qytetarë të shumtë, duke e kthyer Prishtinën në një hapësirë feste dhe promovimi të kulturës përmes muzikës.

/A.K/

Continue Reading

Lajmet

“Toy Story 5” drejt një debutimi rekord në kinema

Published

3 hours ago

on

June 22, 2026

By

Filmi i ri i Disney dhe Pixar, “Toy Story 5”, pritet të jetë një nga premierat më të suksesshme të vitit 2026, pasi ka shënuar rezultate mbresëlënëse që në para-shfaqje.

Sipas raportimeve, vazhdimi i shumëpritur i sagës së animuar ka arkëtuar rreth 15.2 milionë euro në para-shfaqje, duke regjistruar rezultatin më të mirë të vitit dhe të dytin më të lartë ndonjëherë për një film të animuar.

Parashikimet tregojnë se filmi mund të arkëtojë nga 126 deri në 130 milionë euro gjatë fundjavës së hapjes në Amerikën e Veriut, ndërsa disa analiza e vendosin këtë shifër edhe mbi 140 milionë euro.

“Toy Story 5” pritet të tejkalojë debutimin e “Toy Story 4”, duke vendosur një rekord të ri për serinë. Në tregjet ndërkombëtare, filmi synon të arkëtojë rreth 117 milionë euro, duke e çuar totalin global të fundjavës së parë në mbi 239 milionë euro.

Në këtë kapitull të ri, Buzz, Woody, Jessie dhe lodrat e tjera përballen me sfida të reja, ku teknologjia shfaqet si antagonisti kryesor përmes tabletit inteligjent Lilypad.

Në kastin e zërave rikthehen aktorët Tom Hanks, Tim Allen dhe Joan Cusack, ndërsa pjesë e filmit janë edhe Conan O’Brien dhe Greta Lee.

Me një buxhet prej rreth 217 milionë eurosh, “Toy Story 5” konsiderohet një nga projektet më të mëdha të Disneyt për këtë vit dhe pritet të shënojë sukses të madh në arkat kinematografike./BBC/

/A.K/

Continue Reading

Të kërkuara