Përgatitja e juristëve të së ardhmes kërkon jo vetëm njohuri të thella teorike, por edhe përvoja praktike që i ndihmojnë studentët të kuptojnë nga afër funksionimin e institucioneve shtetërore dhe proceseve vendimmarrëse. Pikërisht në këtë frymë, Fakulteti Juridik i UBT-së vazhdon të organizojë aktivitete akademike dhe profesionale që lidhin mësimin në auditor me praktikën institucionale.

Në kuadër të angazhimit për mësimdhënie bashkëkohore dhe përvojë praktike, studentët e vitit të parë të Fakultetit Juridik të UBT-së, nën udhëheqjen e profesorëve Mervete Shala, Xhavit Shala dhe Behar Selimi, realizuan një vizitë studimore në Kuvendin e Republikës së Kosovës.

Vizita u zhvillua pas një aktiviteti simulues të organizuar në Kampusin Dukagjini të UBT-së, ku studentët rikrijuan procedurat e mbledhjeve të Qeverisë dhe Kuvendit, duke demonstruar njohuritë e fituara në procesin e hartimit, diskutimit dhe miratimit të projektakteve, si dhe procedurat parlamentare që lidhen me shqyrtimin e ligjeve dhe ndryshimeve kushtetuese.

Ky kombinim i simulimeve akademike me vizitat në institucionet qendrore paraqet një nga format më efektive të mësimit praktik që Fakulteti Juridik i UBT-së ofron për studentët e tij, duke u mundësuar atyre të kuptojnë në mënyrë konkrete funksionimin e sistemit juridik dhe kushtetues të vendit.

Gjatë vizitës në Kuvendin e Republikës së Kosovës, studentët u pritën nga zyrtarë të lartë për marrëdhënie me publikun, të cilët prezantuan historikun e parlamentarizmit në Kosovë, organizimin dhe kompetencat e Kuvendit, procedurat legjislative për hartimin dhe miratimin e ligjeve, si dhe mekanizmat e mbikëqyrjes parlamentare përmes komisioneve të specializuara.

Një pjesë e rëndësishme e vizitës ishte debati interaktiv i zhvilluar me studentët, ku u trajtuan tema me interes të veçantë për formimin e tyre profesional, përfshirë historinë e demokracisë parlamentare, procesin e vendimmarrjes në Kuvend, sfidat e sigurimit të kuorumit dhe shumicës së nevojshme për ndryshimet kushtetuese, procedurat për zgjedhjen dhe shkarkimin e Qeverisë dhe Presidentit të Republikës së Kosovës, si dhe mekanizmat institucionalë për tejkalimin e krizave parlamentare.

Po ashtu, studentët diskutuan mbi rëndësinë e pjesëmarrjes qytetare në procesin e hartimit të legjislacionit, duke fituar një perspektivë më të gjerë mbi raportin ndërmjet institucioneve demokratike dhe qytetarëve.

Vizita u mundësoi studentëve të njihen nga afër edhe me ambientet e punës së Kuvendit, duke përfshirë sallën plenare dhe sallat ku zhvillohen mbledhjet e komisioneve parlamentare, çka e bëri përvojën edhe më të vlefshme nga aspekti profesional dhe akademik.

Studentët vlerësuan lart këtë aktivitet, duke theksuar se përvoja e fituar i ndihmoi të kuptojnë më mirë aspektet praktike të së drejtës kushtetuese dhe funksionimin e institucioneve demokratike. Ata shprehën mirënjohje për mikpritjen dhe gatishmërinë e zyrtarëve të Kuvendit për të ndarë përvojat dhe njohuritë e tyre profesionale.

Përmes aktiviteteve të tilla, Fakulteti Juridik i UBT-së vazhdon të dëshmojë përkushtimin e tij në ofrimin e një edukimi cilësor, që ndërthur teorinë me praktikën dhe i përgatit studentët për sfidat reale të profesionit juridik. Vizitat studimore, simulimet institucionale dhe bashkëpunimi me institucionet publike mbeten pjesë e rëndësishme e filozofisë akademike të programit, duke krijuar mundësi të vazhdueshme për zhvillimin profesional të studentëve dhe përgatitjen e tyre për tregun e punës dhe jetën institucionale.

Prokuroria Speciale e Republikës së Kosovës ka ngritur aktakuzë ndaj gjashtë personave të nacionalitetit serb, të dyshuar për përfshirje në organizimin dhe vendosjen e barrikadave në veri të vendit gjatë vitit 2022.

Sipas aktakuzës, të pandehurit dyshohet se kanë marrë pjesë në planifikimin dhe realizimin e bllokimit të rrugëve në komunat veriore të Kosovës, duke vendosur automjete dhe pengesa të tjera në infrastrukturën rrugore. Këto veprime, sipas prokurorisë, kanë pasur për qëllim pengimin e lëvizjes së lirë të qytetarëve dhe institucioneve shtetërore.

Barrikadat në veri u vendosën në një periudhë tensionesh të shtuara politike dhe të sigurisë në fund të vitit 2022, duke shkaktuar situatë të ndërlikuar në terren dhe duke kërkuar ndërhyrje të institucioneve të sigurisë dhe praninë e mekanizmave ndërkombëtarë, përfshirë KFOR-in, për të ruajtur rendin dhe stabilitetin.

Prokuroria Speciale thekson se për këtë rast janë mbledhur prova materiale dhe dëshmi që lidhen me përfshirjen e të akuzuarve në organizimin e barrikadave, dhe se rasti tashmë ka kaluar në procedurë gjyqësore.

Të pandehurit do të përballen me proces në gjykatat kompetente, ku do të shqyrtohen akuzat dhe provat e paraqitura nga prokuroria. /Ekonomia online/ /E.A/