Një mësuese ka humbur jetën këtë të enjte në rrethin Hat Yai, në jug të Tajlandës, pasi një person shkrepi me armë zjarri në shkollën ku ajo punonte. Sipas njoftimeve zyrtare nga administrata provinciale, ngjarja e rëndë nisi të mërkurën kur një 17-vjeçar, duke përdorur një armë të vjedhur nga një punonjës policie, qëlloi mësuesen Sasiphat Sinsamosorn në ambientet e shkollës “Patongprathankiriwat”. Gjatë sulmit mbeti e plagosur edhe një nxënëse, por gjendja e saj shëndetësore ende nuk është bërë e ditur.

Viktima, e cila mbante edhe postin e drejtoreshës së shkollës, u dërgua me urgjencë në reanimacion për t’iu nënshtruar një operacioni, por ndërroi jetë rreth orës 2 të mëngjesit si pasojë e dëmtimeve të organeve të brendshme dhe humbjes së madhe të gjakut.

Stafi i shkollës u shpreh i tronditur përmes një mesazhi ngushëllimi, duke thënë se megjithëse humbja është e madhe, mirësia dhe kujtimet që ajo la pas do të mbeten përgjithmonë në zemrat e tyre.

Sa i përket autorit, i cili tashmë ndodhet në pranga, zyrtarët njoftuan se ai ka një motër që studion në atë shkollë dhe rezulton me histori të abuzimit me substancat, si dhe ishte liruar nga një spital psikiatrik në dhjetor të vitit të kaluar. Ky incident ka rikthyer vëmendjen te problemet me dhunën me armë në Tajlandë, ku raste të tilla nuk janë të rralla; një ndër më të rëndët ishte ai i vitit 2022, ku një ish-polic vrau 36 persona, mes të cilëve 22 fëmijë, në një sulm barbar në një kopsht fëmijësh.

Qyteti i Tumbler Ridge në Kolumbinë Britanike është tronditur nga një prej vrasjeve masive më të rënda në historinë e Kanadasë, ku dhjetë persona kanë mbetur të vdekur. Ngjarja e rëndë ka ndodhur në një komunitet të largët me rreth 2,400 banorë, ndërsa gjashtë prej viktimave u gjetën brenda shkollës së mesme lokale, e cila ka gjithsej vetëm 160 nxënës.

Mes të vdekurve është edhe autorja e dyshuar e sulmit, por policia ende nuk ka bërë të ditur identitetin e saj apo motivet që e shtynë drejt këtij akti të rëndë. Autoritetet vendase mbeten të rezervuara edhe sa i përket identifikimit të viktimave të tjera, duke mos konfirmuar ende nëse mes tyre ka nxënës të mitur, raporton Reuters.

Si pasojë e kësaj tragjedie, Kryeministri i Kanadasë, Mark Carney, ka anuluar menjëherë një udhëtim të planifikuar jashtë shtetit për të menaxhuar situatën emergjente. Ndërkohë që mbulimi i drejtpërdrejtë i ngjarjes vazhdon, vendi po pret me ankth detaje të reja nga hetimet që po zhvillohen në këtë zonë të izoluar të Kanadasë perëndimore. /Reuters/

Presidenti francez Emmanuel Macron i ka bërë thirrje Evropës që të tregoj veten në skenën botërore, duke deklaruar se ka ardhur koha që kontinenti të fillojë të sillet si një “fuqi”.

Përballë kërcënimeve në rritje nga Kina, Rusia dhe tashmë edhe SHBA-ja, ai u shpreh për një grup gazetash evropiane se kontinenti po përballet me një thirrje zgjimi.

Macron shtroi pyetjen nëse Evropa është vërtet gati të shndërrohet në një fuqi në fushat e ekonomisë, financave, mbrojtjes dhe sistemeve demokratike, duke shtuar se në një epokë tjetër kjo do të cilësohej si momenti që kontinenti të “pajisej me pjekurinë e tij”.

Përpara samitit të BE-së në Bruksel, udhëheqësi francez përsëriti thirrjen për kredi të përbashkëta në nivel evropian me qëllim mbledhjen e qindra miliarda eurove të nevojshme për investime industriale.

Ai theksoi se ka ardhur koha për të krijuar një kapacitet të përbashkët borxhi për të financuar shpenzimet e së ardhmes përmes eurobondeve, duke argumentuar se nevojiten programe të mëdha evropiane për projektet më cilësore.

Megjithëse thirrje të tilla në të kaluarën janë pritur medyshas nga Gjermania dhe vende të tjera, të cilat dyshojnë se Franca kërkon të përdorë Evropën për të mbajtur barrën e saj financiare, Macron pranoi se vendi i tij nuk ka pasur gjithmonë një model të balancuar si ekonomitë e veriut.

Ai vuri në dukje se Franca nuk ka ndërmarrë reforma si ato të Portugalisë, Spanjës, Italisë apo Greqisë, të cilat sot po japin rezultate, por argumentoi se tregjet botërore po kërkojnë gjithnjë e më shumë alternativa ndaj dollarit amerikan.

Sipas tij, BE-ja ka nevojë për 1.2 trilionë euro në vit për të investuar në sektorë jetikë si siguria, mbrojtja, energjia e pastër dhe inteligjenca artificiale.

Duke kërkuar mbrojtjen e këtyre industrive, Macron saktësoi se nuk bëhet fjalë për proteksionizëm, por për koherencë, në mënyrë që prodhuesve evropianë të mos u imponohen rregulla që nuk vlejnë për konkurrentët jashtë bllokut.

Ai e përshkroi botën e sotme si një vend në çrregullim ku ndryshimet klimatike po nxitojnë, SHBA-ja nuk është më një garantues i sigurt i sigurisë, Rusia ka ndërprerë energjinë e lirë dhe Kina është kthyer në një rival të ashpër. Në këtë situatë, Macron theksoi se evropianët janë vetëm, por kanë njëri-tjetrin si një forcë prej 450 milionë njerëzish.

Ai përfundoi duke thënë se shndërrimi në fuqi është përmbushja e aventurës evropiane, duke kujtuar se ndonëse shtetet u bashkuan për të ndaluar luftën dhe për të ndërtuar një treg, ato gjithmonë e kishin ndaluar veten të mendonin për pushtetin.

Lidhur me tensionet e fundit me Washingtonin, ai paralajmëroi evropianët që të mos mashtrohen nga tërheqjet e përkohshme të SHBA-së, duke thënë se ekziston një tendencë frikacake për t’u qetësuar pas çdo krize, ndërkohë që rreziqet mbeten reale dhe të vazhdueshme.

Presidenti Donald Trump ka kërcënuar se do të bllokojë hapjen e një ure që lidh SHBA-në me Kanadanë, derisa Uashingtoni të “kompensohet plotësisht për çdo gjë” që i ka dhënë fqinjit të saj verior.

Ura Ndërkombëtare “Gordie Howe”, e cila lidh provincën kanadeze të Ontarios me shtetin amerikan të Miçiganit (Michigan), nuk do të hapet derisa Otava “ta trajtojë Shtetet e Bashkuara me drejtësinë dhe respektin që meritojmë”, shkroi Trump në rrjetet sociale.

Sipas faqes zyrtare të projektit, ura po financohet nga qeveria kanadeze, por do të jetë në pronësi publike të përbashkët mes Kanadasë dhe Miçiganit. /BBC/