Lajmet

​Beteja e Koshares ndër betejat më epike dhe më të përgjakshme

Betejën e Koshares, Quni e quan si një ndër betejat më epike dhe të përgjakshme.

Published

2 years ago

on

Deputetët dhe pjesëmarrësit në Betejën e Koshares kanë dhënë kujtime, detaje e vlerësime mbi atë se çka ndodhi në betejën më epike, por edhe më të përgjakshme të UÇK-së.

Hysen Berisha në emër të PDK-së, i cili ka marrë pjesë në betejën e Koshares, tha se Kosharja i dha një dimension të sigurtë fitores së lirisë ndaj krimit shtetëror dhe barbarisë serbe ndaj shqiptarëve. Ai duke përmendur bazat ushtarake serbe që ishin neutralizuar, ka thënë se aty u mposht ushtria hyjnore siç e cilësonin në Serbi.

“Koshares që e mposhti atë ushtrinë hyjnore si e cilësonte Millosheviqi duke ia marrë që në sulmin e parë kazermën ushtarake për të vazhduar luftimet edhe për atë në Qaf të Morinës, ndërkohë shumë më herët, qysh në shtatorin 98, tërësisht ishte neotrtalizuar kazerma Vejnoviq në tre kufi. Po kështu, me vendosmërinë e pa kthyeshme të luftëtarëve tanë ishte neutralizuar edhe posta ushtarake verore e 7 korrikut në drejtimin e Hasit, Gjakovës dhe Kukësit…..të dashur vëllezër të armës në veçanti ju nëna të dëshmorëve, iu kërkojmë falje nëse në këto përvjetore, me raportimet tona nuk jemi satisfaksion për dhimbjen tuaj të lirisë, kurse ata do të jenë kudo me ne”, tha ai.

Ish-luftëtari që mori pjesë në betejën e Koshares dhe njëkohësisht deputeti i Lidhjes Demokratike të Kosovës, Anton Quni tha se kanë dalur fitimtarë nga kjo betejë bashkë me luftëtarët e tjerë. Ai potencoi se nga data 9 prill deri kur u tërhoqën forcat serbe më 15 qershor, ata përjetuan momente shumë të vështira gjatë përballjes me forcat e ushtrisë serbe. Por, pavarësisht kësaj, Quni tha se çdo ditë e më shumë ishin më të fortë dhe më të vendosur për liri dhe pavarësi.

Betejën e Koshares, Quni e quan si një ndër betejat më epike dhe të përgjakshme.

“Në përpjekjen tonë për arritjen e qëllimit dhe rezistencën e armikut për të ruajtur territoret e okupuara do të zhvillohej një ndër betejat më epike dhe të përgjakshme. Nga 9 prilli deri më 15 qershor kur përfundimisht u tërhoqën forcat serbe përjetuam shumë momente të vështira. Por, pas çdo vështirësie ne i gëzoheshim fitoreve. Çdo ditë ishim më të fortë e më të vendosur. Ne po përparonim çdo ditë e më shumë. Rritej numri i luftëtarëve, sigurohej armatimi dhe municioni, specializoheshin njësitet e ndryshme, dominonin terrenin dhe bashkëvepronin më mirë. Të gjitha këto i arrinim në kushte apline, borë e mjegull, ngrica e netë të gjata…Ne ishim fitimtarë, ne nuk u zmbrapsëm asnjë pëllëmbë, ne vetëm marshonim përpara. Mësymjen deri në fitore i përjetuam me dhimbje, humbjen më të dashurit tanë, strategët Agim Ramdani, Salih Çekaj, humbëm komandantët Xhemajl Fetahajn, Abaz Thaçin e Ali Hasin. Gjithsej 114 luftëtarë kishin kaluar në përjetësi. Mbrapa çdo njërit është një histori”, tha Quni.

Kurse deputetja e AAK-së, Time Kadrijaj e cila gjatë asaj kohe shëronte plagët e të plagosurve, falënderoi Shqipërinë, pasi ishin të bekuar që kishin mbështetjen e tyre.

“Të gjithë këta dëshmorë e 423 të plagosur u trajtuan nga ekipi mjekësore ose njësia e shëndetësisë që kanë pas rol të shumëfishtë, edhe si luftëtarë, edhe si mjek, të cilët sipas rregullave do të duhej të vendoseshin diku në prapavi, por kjo nuk ka ndodhur sepse mjekët e kanë marrë rrezikun dhe barabartë me ushtarët kanë qëndruar në vijat e para të frontit”, tha ajo.

E në emër të Lëvizjes Vetëvendosje, deputeti Enver Haliti tha se qëllimi i luftëtarëve në këtë betejë, ishte thyerja e kufirit dhe dërgimi i armëve për luftëtarët tjerë në Kosovë, por edhe për t’i dhënë goditjen e fundit ushtrisë serbe.

Related Topics:
Continue Reading

Lajmet

Nis zbatimi i Ligjit për të huajt dhe Ligjit për automjete

Published

37 minutes ago

on

January 16, 2026

By

Zëvendëskryeministri në detyrë i Kosovës, Besnik Bislimi, ka bërë të ditur se nga sot do të nisë zbatimi i Ligjit për të huajt dhe Ligjit për automjetet.

Ai theksoi se zbatimi i këtyre ligjeve do të zhvillohet në disa faza.

Në fazën e parë, vizitorët që hyjnë në Kosovë përmes vendkalimeve kufitare do të pajisen me materiale informuese lidhur me procedurat dhe rregullat specifike që parashihen me ligjet e reja.

Sipas Bislimit, kjo fazë e parë do të zgjasë deri më 15 mars, periudhë gjatë së cilës qytetarët dhe vizitorët do të kenë mundësi të informohen dhe të përshtaten me ndryshimet ligjore.

Pas përfundimit të kësaj periudhe, do të fillojë zbatimi i plotë i të gjitha procedurave dhe rregullave të përcaktuara me Ligjin për të huajt dhe Ligjin për automjetet.

Continue Reading

Lajmet

Sot mbahet seanca e radhës gjyqësore në rastin “Banjska”

Published

39 minutes ago

on

January 16, 2026

By

Të premten në Gjykatën Themelore do mbahet seanca e radhës gjyqësore në rastin e njohur si “Banjska”.

Pavarësisht ndryshimeve në trupin gjykues, seanca do të zhvillohet sipas planifikimit.

Rasti deri tani është udhëhequr nga gjykatësi Arben Hoti, i cili ka qenë kryetar i trupit gjykues. Mirëpo, pas avancimit të tij në pozitën e gjyqtarit në Gjykatën e Apelit, lënda do t’i kalojë një gjyqtari tjetër. Nga Gjykata Themelore ende nuk është bërë e ditur se kujt do t’i ndahet rasti.

Ndërkohë, Gjykata Themelore kishte kërkuar mendim nga Gjykata Supreme lidhur me mundësinë e vazhdimit të gjykimit në mungesë, pas propozimit të prokurorit special Naim Abazi. Megjithatë, Gjykata Supreme ka sqaruar se nuk jep mendime juridike për dilemat procedurale të shkallës së parë, duke refuzuar kështu të japë opinion për këtë çështje.

Si rrjedhojë, Gjykata Themelore në Prishtinë ka refuzuar propozimin që gjykimi për 42 të akuzuarit e tjerë, 41 persona fizikë dhe një person juridik, të vazhdojë në mungesë.

Për këta të pandehur është lëshuar letërreshtim ndërkombëtar dhe pritet arrestimi dhe ekstradimi i tyre për zhvillimin e procedurës penale.

Deri më tani, procedura penale është veçuar vetëm për tre të akuzuarit që ndodhen në paraburgim: Blagoje Spasojeviq, Vladimir Toliq dhe Dushan Maksimoviq.

Seanca e shqyrtimit gjyqësor ndaj tyre është mbajtur më 17 prill 2025, ku të tre janë deklaruar të pafajshëm, ashtu si edhe në shqyrtimin fillestar të mbajtur më 9 tetor 2024.

Në seancën e prillit, fjalën hyrëse e kanë dhënë prokurori special, mbrojtja dhe pala e dëmtuar.

Aktakuza për këtë rast është ngritur më 11 shtator 2024 dhe ka të bëjë me sulmin terrorist të 24 shtatorit 2023 në Banjskë të Zveçanit. Sipas aktakuzës së Prokurorisë Speciale të Republikës së Kosovës, të akuzuarit dyshohet se përmes përdorimit të dhunës dhe armatimit të rëndë kanë tentuar të shkëpusin pjesën veriore të Kosovës dhe ta bashkojnë atë me Serbinë.

Si pasojë e këtij sulmi, është vrarë zyrtari policor Afrim Bunjaku, janë rrezikuar jetët e zyrtarëve të tjerë policorë dhe të popullatës civile. Aktakuza ngarkon gjithsej 44 persona fizikë dhe një person juridik, “RAD D.O.O”, ndërsa listës së të akuzuarve i prin Milan Radoiçiq, i cili më herët kishte marrë përsipër përgjegjësinë për sulmin terrorist.

Continue Reading

Lajmet

Rinumërohen 216 vendvotime nga 914 gjithsej

Published

42 minutes ago

on

January 16, 2026

By

Në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.

Nga fillimi i këtij procesi (e martë, 13 janar 2026, ora 18:00) dhe deri më tani janë rinumëruar 216 nga 914 vendvotime, të cilat u takojnë komunave të ndryshme, si: Deçan (5), Gjakovë (15), Gllogoc (7), Gjilan (13), Dragash (57), Istog (6), Kaçanik (44), Klinë (5), Fushë Kosovë (3) dhe Mitrovicë e Jugut (3).

Nga rezultatet e deritanishme prin VV-ja me 46.16%, duke u pasuar nga PDK 20.94% e LDK e treta me 11.16% dhe AAK ka marr 5.06%.

Continue Reading

Lajmet

Deklaratat përmbyllëse në Hagë, ditët që mund të përcaktojnë epilogun

Published

16 hours ago

on

January 15, 2026

By

Dhomave të Specializuara në Hagë ka njoftuar se më 9 deri më 13 dhe më 16 dhe 18 shkurt, do të paraqiten para gjykatës deklaratat përmbyllëse në gjykimin e Hashim Thaçit, Kadri Veselit, Rexhep Selimit dhe Jakup Krasniqit.

Seancat janë planifikuar të mbahen nga ora 09:00 deri në orën 16:30.

“Rendi i ditës më poshtë buron nga Njoftimi i Trupit Gjykues në lidhje me Mbylljen e Procedurës së Paraqitjes së Provave i datës 18 dhjetor 2025. Ky rend dite bazohet në vlerësimet aktuale dhe mund të ndryshojë, për shembull nëse një palë ka nevojë për më pak kohë seç mendohej. E hënë, 9 shkurt: Deklarata Përmbyllëse e Prokurorisë. E martë, 10 shkurt: Deklarata Përmbyllëse e Prokurorisë; Deklarata Përmbyllëse e Mbrojtjes së Viktimave. E mërkurë, 11 shkurt: Deklarata Përmbyllëse e Mbrojtjes së Thaçit; Deklarata Përmbyllëse e Mbrojtjes së Veselit. E enjte, 12 shkurt: Deklarata Përmbyllëse e Mbrojtjes së Veselit; Deklarata Përmbyllëse e Mbrojtjes së Selimit. E premte: 13 shkurt: Deklarata Përmbyllëse e Mbrojtjes së Selimit; Deklarata Përmbyllëse e Mbrojtjes së Krasniqit. E hënë, 16 shkurt: Deklarata Përmbyllëse e Mbrojtjes së Krasniqit; pyetje të mundshme nga Trupi Gjykues. E mërkurë, 18 shkurt: Përgjigje nga palët dhe deklarata nga të akuzuarit”, thuhet në njoftim.

Historiku i çështjes

Aktakuza fillestare kundër katër të akuzuarve u konfirmua më 26 tetor 2020, dhe u ndryshua më 3 shtator 2021, 29 prill 2022, dhe 30 shtator 2022. Versioni me më pak redaktime i aktakuzës u dorëzua më 27 shkurt 2023. Kjo është aktakuza në fuqi në këtë çështje.

Secili prej të akuzuarve akuzohet mbi bazën e përgjegjësisë penale individuale për gjashtë akuza që lidhen me krime lufte.

Në aktakuzë thuhet se krimet për të cilat janë ngritur akuza janë kryer nga të paktën marsi deri në shtator 1999 dhe kanë ndodhur në disa vende në Kosovë dhe në Kukës dhe Cahan, në veri të Shqipërisë.

Pas arrestimit të tyre nga Prokurori i Specializuar, Hashim Thaçi, Kadri Veseli, Rexhep Selimi dhe Jakup Krasniqi u transferuan në objektin e paraburgimit të Dhomave të Specializuara të Kosovës në Hagë më 4 dhe 5 nëntor 2020.

Gjykimi filloi më 3 prill 2023 me deklaratën hyrëse të Zyrës së Prokurorit të Specializuar (ZPS). ZPS-ja përfundoi paraqitjen e provave të saj më 15 prill 2025. Mbrojtja e Viktimave që përfaqëson 155 viktima pjesëmarrëse, paraqiti provat e saj në korrik 2025, dhe Mbrojtja e Thaçit dhe Mbrojtja e Krasniqit paraqitën provat e tyre nga shtatori deri në dhjetor 2025. Trupi Gjykues mbylli procedurën e paraqitjes së provave më 19 dhjetor 2025. Në këtë çështje, 134 dëshmitarë kanë dhanë dëshmi në gjykatë, 125 të thirrur nga Prokuroria, dy të thirrur nga Mbrojtja e Viktimave dhe shtatë të thirrur nga Mbrojtja. Gjithashtu, 164 deklarata dëshmitarësh u pranuan vetëm në formë të shkruar.

Pas deklaratave përmbyllëse, Trupi Gjykues do të vijojë me kuvendimet për nxjerrjen e aktgjykimit. Aktgjykimi duhet të shpallet brenda 90 ditësh nga mbyllja e paraqitjes së provave. Në rast se për shkak të rrethanave kërkohet kohë shtesë, ky afat mund të zgjatet me 60 ditë të tjera.

Data dhe ora e gjithë seancave publike të planifikuara mund të gjendet në kalendarin e gjykatës në faqen e internetit të DHSK-së. Ndryshimet e mundshme të seancave të planifikuara të përshkruara në këtë informim do të pasqyrohen në kalendar.

Continue Reading

Të kërkuara