Kryetari i Federatës së Futbollit të Kosovës, Agim Ademi është rikthyer të flasë për situatën me selektorin e Kombëtares së Kosovës, Franco Foda.

Trajneri gjerman e ka marrë ofertë të majme e joshëse nga Emiratet e Bashkuara Arabe, përkatësisht nga ekipi Al Wahda.

Kreu i FFK-së, në televizionin publik – RTK ka treguar se do të flasë sy me sy me selektorin, për ta parë disponimin e tij dhe për të vendosur bashkërisht për të ardhmen e tij.

Ndonëse ka kontratë me FFK-në deri në fund të kualifikimeve, nuk përjashtohet mundësia që Foda ta lë Kosovën ende pa i nisur kualifikimet e Botërorit 2026.

“Franco Foda ka pasur edhe më parë oferta, por kjo që ka tani thjesht është shumë e mirë ekonomikisht.”

“Kam biseduar me Fodën, ai është në pushime. Të mërkurën kthehet dhe do të ulemi të bisedojmë ose këtu ose në Vjenë. Ai e ka një kontratë deri në fund të kualifikimeve dhe është obligues ndaj kontratës tonë, me mundësi të vazhdimit edhe për dy vjet tjera. Nëse kualifikohemi me automatizëm i vazhdohet. Kjo është klauzola që e kemi pasur.”

Xhudistja kosovare Laura Fazliu ka zhvilluar një paraqitje të denjë në Kampionatin Botëror të xhudos që po mbahet në Budapest, duke arritur deri në çerekfinale të kategorisë deri në 63 kilogramë, raporton KosovaPress.

Në luftën e parë, Fazliu tregoi dominim të plotë ndaj xhudistes nga Uzbekistani, Marjona Nurulloeva, duke fituar me Ippon. Më pas, në luftën e dytë, ajo mposhti italianen Carlotta Avanzato, ku pas një përballjeje të fortë, realizoi një hedhje vendimtare në minutën e fundit për të siguruar kualifikimin në çerekfinale.

Megjithatë, në këtë fazë, Laura u ndal nga kampionia olimpike dhe botërore nga Brazili, Rafaela Silva. Edhe pse u përball me një rivale me përvojë të madhe, Laura tregoi luftë të fortë dhe karakter të madh.

Tani ajo do të ketë një mundësi tjetër për të siguruar medaljen e bronztë, pasi do të garojë në repesazh.

Ludovic Magnin është trajner i ri i kampionit të Zvicrës, Baselit. Magnini e zëvendëson Fabio Celestinin, që e udhëhoqi skuadrën drejt triumfit në kampionat dhe në Kupë të Zvicrës.

46-vjeçari Magnin ka firmosur për dy vjet dhe punën e fillon më 20 qershor.

Magnin deri më tani e ka udhëhequr skuadrën e Lausannes. Më herët punoi tek Altachu në Austri dhe te Zurichu.

Si futbollist, për Zvicrën i ka luajtur 62 ndeshje. Ka luajtur për Yverdonin, Luganon e Zurichun në Zvicër dhe Werder Bremenin e Stuttgartin në Gjermani. Ishte mbrojtës i majtë.

Xherdan Shaqiri e Albian Ajeti janë prej lojtarëve kryesorë të Baselit. Taulant Xhaka i ka dhënë fund karrierës, ndërsa Leon Avdullahu u transferua te Hoffenheimi në Bundesligë.

Real Madridi ka qenë aktiv në afatin kalimtar të verës deri më tani. Pas një sezoni zhgënjyes 24/25 ku Los Blancos dështuan në shumë fronte, Carlo Ancelotti u shkarkua, u zëvendësua nga ish-lojtari Xabi Alonso.

Gjigantët spanjollë kanë punuar shumë për të përmirësuar skuadrën e tyre përpara Kupës së Botës për Klube dhe pikërisht këtë e kanë bërë, duke nënshkruar tashmë me Trent Alexander-Arnold, Dean Huijsen dhe Franco Mastantuono.

Ata pritet të nënshkruajnë me mbrojtësin e majtë të Benfica-s, Alvaro Carreras, në muajt e ardhshëm, ndërsa mund të ketë edhe prurje tjera. Ardhjet e verës nënkuptojnë se Alonso tani ka në dispozicion një ekip të pasur.

Sipas gazetarit spanjoll Manu Carreno, 43-vjeçari tashmë e ka në mendje formacionin e tij më të mirë titullar përpara sezonit të ri. Pasi zbuloi formacionin formues në programin sportiv radiofonik El Larguero të Cadena SER, Carreno tha:

“Ky është formacioni titullar që Xabi Alonso ka në mendje tani, jo për Kupën e Botës për Klube në Shtetet e Bashkuara, por për fillimin e La Ligës”.

Formacioni pritet të jetë një rreshtim 4-4-2, ku në portë parashihet Thibaut Courtois, ndërsa mbrojtja do të formohej nga Trent Alexander-Arnold, Dean Huijsen, Eder Militao/Antonio Rudiger dhe Alvaro Carreras.

Mesfusha qendrore do të formohet nga Aurelien Tchouameni dhe Federico Valverde, ndërsa në krah pritet të vendosen Jude Bellingham dhe Franco Mastantuono.

Në sulm, Alonso do t’i besojë dy yjeve kryesor të skuadrës: Kylian Mbappe dhe Vinicius Junior.