Sport

Besiktasi shpërthen pas humbjes, në shënjestër edhe Fidan Aliti

Published

3 weeks ago

August 24, 2026

UBTNews

Besiktasi ka reaguar ashpër pas humbjes 1:0 ndaj Alanyasporit, në ndeshjen e vlefshme për xhiron e dytë të Superligës së Turqisë.

Klubi nga Stambolli ka shprehur pakënaqësi të madhe me vendimet e gjyqtarëve, veçanërisht me gjyqtarin kryesor Adnan Deniz Kayatepe dhe disa prej vendimeve të tij gjatë takimit.

Në qendër të polemikave ishte edhe kapiteni i Alanyasporit, Fidan Aliti. Besiktasi publikoi një video në rrjetet sociale me disa nga situatat e diskutueshme ku ishte i përfshirë mbrojtësi kosovar.

Një nga rastet më të diskutuara ishte përplasja mes Alitit dhe sulmuesit belg Leandro Trossard në zonën e rreptësisë. Besiktasi pretendon se ndaj Trossardit është përdorur forcë e palejueshme dhe se Aliti duhej të ndëshkohej me karton të kuq.

Në pamjet e publikuara nga klubi shihet kontakti mes dy futbollistëve, ndërsa Trossard pas ndeshjes pretendoi se ishte goditur me shuplakë.

“VAR-i ishte aty dhe, nëse do të ishte përdorur siç duhet, vendimi duhej të ndryshonte qartë. Mendoj se kundërshtari më goditi me shuplakë. Ishte karton i kuq i pastër. Vendimi duhej të ndryshohej”, deklaroi Trossard.

Gjyqtari Kayatepe e ndërpreu lojën pas incidentit, por VAR-i nuk ndërhyri për ta ndryshuar vendimin.

Besiktasi kontestoi edhe anulimin e një goli të tij, duke pretenduar se nuk kishte faull ndaj Alitit në zonë. Klubi turk publikoi gjithashtu një moment tjetër ku Aliti shihet duke e kapur për fanelle Dusan Vlahovicin, teksa sulmuesi po tentonte të futej në zonën e rreptësisë.

Përmes një komunikate zyrtare, Besiktasi kritikoi ashpër ekipin e gjyqtarëve dhe kërkoi që Kayatepe dhe zyrtarët e tjerë të përfshirë të mos gjykojnë më ndeshjet e klubit.

“Adnan Deniz Kayatepe, vendimet skandaloze të të cilit nga gjysmëfinalja e kaluar e Kupës janë ende të freskëta në kujtesën tonë, ka shtuar edhe një tjetër turp në bilancin e tij. Lojtari kundërshtar e goditi Trossardin me shuplakë para gjithë botës. Gjyqtari nuk e pa incidentin, ndërsa VAR-i mbeti i heshtur”, thuhet në reagimin e Besiktasit.

Klubi nga Stambolli pretendon gjithashtu se goli i tij u anulua për një faull që nuk ekzistonte, ndërsa ka kontestuar edhe ndërhyrjen e Alitit ndaj Vlahovicit.

Në këtë takim, Florent Hadërgjonaj ishte protagonist për Alanyasporin, duke asistuar në golin e vetëm të ndeshjes. Ndërkohë, Milot Rashica e ndoqi takimin nga banka rezervë e Besiktasit.

Referimi në futbollin turk vazhdon të jetë temë e debatit të madh, ndërsa ankesat ndaj gjyqtarëve kanë nisur që në xhirot e para të sezonit të ri.

D.L

Sport

Lutfi Dalipi ftohet te Zvicra U21 për kualifikimet e Evropianit 2027

Published

3 hours ago

September 17, 2026

UBTNews

Përzgjedhësi i Zvicrës U21, Alex Frei, ka publikuar listën prej 25 lojtarësh për fazën e fundit të kualifikimeve të Kampionatit Evropian 2027, i cili do të mbahet në Shqipëri dhe Serbi.

Ekipi zviceran do të zhvillojë tre ndeshje: kundër Luksemburgut në Lugano, si dhe dy përballje në udhëtim ndaj Islandës dhe Francës.

Për herë të parë në këtë nivel është ftuar 20-vjeçari Lutfi Dalipi, i cili luan te Vaduzi i huazuar nga Young Boys.

Mesfushori me origjinë nga Presheva dhe Portugalia po kalon një formë të mirë në Superligën zvicerane me tre gola e shtatë asistime, ndërsa më parë është kontaktuar edhe nga Shqipëria e Kosova.

Përveç Dalipit, pjesë e listës janë edhe Samuel Krasniqi, si dhe Labinot Bajrami e Dorian Derbaci që rikthehen te përfaqësuesja U21.

D.L

Sport

Tre shqiptarë të ftuar nga Murat Yakin te Zvicra për Ligën e Kombeve

Published

5 hours ago

September 17, 2026

UBTNews

Përzgjedhësi i Zvicrës, Murat Yakin, ka publikuar listën prej 25 lojtarësh për katër ndeshjet e ardhshme të Ligës së Kombeve kundër Maqedonisë së Veriut, Skocisë dhe Sllovenisë, ku ndeshja e dytë ndaj Maqedonisë së Veriut do të luhet më 6 tetor.

Pjesë e këtij grumbullimi janë tre futbollistë shqiptarë: kapiteni i Sunderlandit, Granit Xhaka, mesfushori i Milanit, Ardon Jashari, si dhe mbrojtësi i Bragës, Adrian Bajrami.

Ky i fundit rikthehet te përfaqësuesja e Zvicrës pasi ishte grumbulluar për herë të fundit në nëntor të vitit të kaluar për kualifikueset e Kupës së Botës ndaj Suedisë dhe Kosovës.

D.L

Sport

Gruda ftohet nga Gjermania, përfshihet në listën e dytë të Kloppit

Published

6 hours ago

September 17, 2026

UBTNews

Përzgjedhësi i Gjermanisë, Jürgen Klopp, ka publikuar të enjten dy lista me futbollistët e grumbulluar për katër ndeshjet e ardhshme të Ligës së Kombeve.

Në mesin e tyre është edhe futbollisti shqiptar, Brajan Gruda, i cili është përfshirë në listën e dytë të përfaqësueses gjermane.

Gruda, 22-vjeçar, është huazuar te Leipzigu nga Brightoni dhe tashmë ka marrë ftesën e parë nga Kombëtarja e Gjermanisë.

Lista e parë do të jetë në dispozicion për ndeshjet ndaj Holandës dhe Greqisë, ndërsa lista e dytë, në të cilën bën pjesë Gruda, është grumbulluar për sfidat ndaj Serbisë dhe Greqisë.

Për Jürgen Kloppin, kjo do të jetë ndeshja e parë në krye të “Panzerëve”, pasi ai u emërua përzgjedhës i Gjermanisë, duke zëvendësuar Julian Nagelsmannin, i cili u largua pas përfundimit të Botërorit.

D.L

Sport

Pas 53 vjetësh, Sunderlandi rikthehet në Evropë me fitore, Xhaka shkëlqen

Published

9 hours ago

September 17, 2026

UBTNews

Një natë për t’u mbajtur mend në Sunderland.

Në rikthimin e tij në garat evropiane pas 53 vjetësh, klubi anglez e nisi aventurën në Europa League me një fitore të madhe para tifozëve të tij në “Stadium of Light”.

Sunderlandi triumfoi 1:0 ndaj AZ Alkmaarit, në një ndeshje ku protagonist ishte edhe kapiteni Granit Xhaka.

Mesfushori shqiptar e luajti të gjithë takimin dhe me paraqitjen e tij ishte ndër lojtarët më të spikatur të ekipit vendas.

Heroi i mbrëmjes ishte Enzo Le Fée, i cili në minutën e 66-të realizoi nga pika e bardhë për t’i dhënë Sunderlandit tri pikët në ndeshjen e parë të fazës së ligës.

Pas më shumë se pesë dekadash mungesë, Sunderlandi u rikthye në Evropë me një fitore dhe një natë të paharrueshme për tifozët e tij.

D.L