Deputeti i Aleancës për Ardhmërinë e Kosovës (AAK), Bekë Berisha, ka komentuar zhvillimet politike pas kërcënimit të rrejshëm me bombë në Kuvend, duke thënë se situata po bëhet e tepërt dhe se vendi ka nevojë për reflektim të përgjithshëm.

Ai paralajmëroi mundësinë e ndryshimit të qëndrimeve në votimin për kryetarin e Kuvendit dhe tha se nuk do të lejojë që hidhërimi politik të bëhet barrë për vendin.

Ai tha se sot mund të propozohet edhe mocioni për kalim në votim të fshehtë.

“Sikur ka ndodhur edhe më përpara, nuk kemi pasur ndonjë shqetësim se është pritur që të jetë i rrejshëm. Kjo situatë besoj që tani është bërë e tepërt dhe na duhet që të reflektojmë të gjithë. Po duket që dojnë me bë një mocion për çështjen e ndërrimit të votimit. Edhe kur dalim në atë pjesën e votimit të hapur, besoj që do të reflektoj unë së pari. Nuk dua që në kurriz të Kosovës të mbaj hidhërim me askënd. As nuk ma determinon mendimin politik as opozita, se unë nuk jam opozitë më së pari, se këtu nuk dihet kush do ta bëjë qeverinë. Do ta shikojmë momentin e parë me gjithë formën se si me dalë nga kjo situatë,” tha Berisha.

Ai shtoi se mungesa e institucioneve për një kohë të gjatë e rrit rrezikun për situata të tilla si alarmi i rremë për bombë, duke e quajtur paralajmërim të kahershëm të tij që nuk ishte marrë seriozisht.

“Kjo ka qenë një alarm i rrejshëm, mirëpo kur nuk ka institucione për një kohë kaq të gjatë, këto mund të bëhen të vërteta pastaj. E kam paralajmëruar edhe përpara dhe e merrshin sikur kiamet atë punë,” u shpreh ai.

Berisha tha se nëse në seancën e ardhshme krijohet shumicë për ta rrëzuar opsionin aktual për kryetar Kuvendi, atëherë do të jetë një hap përpara drejt zgjidhjes.

“Nëse ka sot prezencë të deputetëve që mund të rrëzohet ai opsion, është rrugëdalje dhe është reflektim. Besoj që seancën e ardhshme do ta rrëzojmë, sepse ka njerëz që dëshirojnë që ta rrëzojnë këtë opsion. Kur dalim hapur, pastaj duhet të kryhet punë.”

I pyetur nëse vota e tij do të jetë pro për secilin kandidat për kryetar Kuvendi që do të propozohet nga Lëvizja Vetëvendosje, ai u përgjigj shkurt:

“Po bash kanë të qesin,” tha Berisha.