Lajmet

Berisha dhe Balje i drejtohen Supremes për vendimin e PZAP-së

Published

5 years ago

March 9, 2021

Betim Gashi

Partitë e komuniteteve boshnjake dhe egjiptiane kanë dorëzuar ankesë në Gjykatën Supreme lidhur me vendimin e djeshëm të Panelit Zgjedhor për Ankesa dhe Parashtresa për zgjedhjet e 14 shkurtit.

Ani pse u shprehën të kënaqur me vërtetimin, siç thanë se ka pasur orkestrim të votave në vendbanimet serbe për subjekte të caktuara, kërkuan nga Gjykata Supreme të anulojë votat në tërë vendbanimet me shumicë serbe të Iniciativës Rome dhe asaj boshnjake të Adriana Hoxhiqit.

PZAP vendosi që t’i hiqen votat Iniciativës Rome që i kishte marrë në Leposaviq, Novobërdë, Ranillug, Partesh dhe Kllokot, por në kërkesën drejtuar Supremes u kërkua që vendim i njëjtë të merret edhe për komunat Graqanicë, Mitrovicë Veriore , Lipjan e Kamenicë.

Kryetari i Partisë Liberale Egjiptiane, Veton Berisha deklaroi se në Graçanicë ka ndodhur orkestrimi më i madh i votave dhe se vendimi i PZAP që vlen për disa komuna dhe për disa të tjera jo është i pakuptueshëm.

“Jemi të kënaqur për bazën e ankesës sonë, bazën e shqetësimit ku nga PZAP është konfirmuar se ka pasur orkestrim të votave. Vendimi është meritor, është konstatuar ajo që kemi thënë. Ndërsa sot kemi ardhur të ankimojmë vendimin e PZAP-së që ka marrë për vetëm për disa komuna. Ndërsa ankesa ka qenë për të gjitha komunat që i kemi pretenduar. Sot në Supreme jemi për të njëjtën çështje dhe dukuri, por për tri komunat e tjera që nuk kanë qenë të përfshira, e më e rëndësishmja Graçanica që nuk ka qenë e përfshirë në vendimin e PZAP si njëra ndër komunat kryesore ku ka qenë orkestrimi më i madh. Ka mbetur vota akoma për Iniciativën Rome, e cila mbetet legjitime brenda Kuvendit nëse mbetet kështu. Nuk ka të bëjë a do të hyjë unë në Kuvend apo jo, por nuk ka pikë kuptimi nëse vendoset për një dukuri, por vendoset pjesërisht për disa komuna po, e disa jo. E njëjta gjë ka ndodhur edhe në Mitrovicë Veriore pasi PZAP nuk e ka trajtuar atë fare”, tha ai.

Ndërsa, udhëheqësja e listës Bashkimi Socialdemokrat boshnjak, Duda Balje konfirmoi se në bazë të vendimit të PZAP ajo do të jetë sërish deputete. Por ankimoi një pjesë vendimit të PZAP për të anuluar votat e iniciativës së Hoxhqiq në tërë komunat serbe, e disa jo.

“Ne si përfaqësues të boshnjakëve jam të kënaqur. Kemi vetëm dy pika jo të qarta, për të cilat mendoj se është problemi teknik. Edhe me votat që i ka marrë në disa komuna serbe, ato janë anuluar pjesërisht. Ne kemi bërë një analizë që e kemi në padi se sa boshnjakë janë duke jetuar atje. Tash po presim. Këtu është një moment ku shteti i Kosovës duhet të na mbrojë neve komuniteteve pasi ne synojmë vetëm vendet që garantohen me Kushtetutë. A do të jem deputete? Nëse Gjykata Supreme mendon njëjtë si PZAP, po”, tha Balje.

Zgjedhjet parlamentare u mbajtën më 14 shkurt.

Rajoni

Rektori Hajrizi viziton UniMarconi në Romë

Published

1 day ago

November 8, 2025

Driton Iseni

Gjatë vizitës zyrtare në Itali, Rektori i UBT-së, Prof. Dr. Edmond Hajrizi, zhvilloi një vizitë në Universitetin UniMarconi, i pari institucion digjital i i akredituar në Itali.

Me këtë rast, Rektori Hajrizi u takua me Rektorin e UniMarconi-t, Prof. Marco Abate, me Prof. Ulrike Haider-Quercia, udhëheqëse e Shkollës së Doktoratës, si dhe me Prof. Francesco Gaspari, përgjegjës për bashkëpunimin ndërkombëtar.

Të dy rektorët shkëmbyen përvoja rreth zhvillimit të universiteteve moderne, bashkëpunimeve ndërkombëtare dhe mundësive për forcimin e partneritetit ndërmjet dy institucioneve në fusha të ndryshme, si mobiliteti akademik, studimet e përbashkëta, projektet kërkimore dhe inovacioni.

Lajmet

Bellingham dhe Foden rikthehen në kombëtaren e Anglisë

Published

2 days ago

November 7, 2025

UBT News

Jude Bellingham dhe Phil Foden janë rikthyer në skuadrën e Anglisë për ndeshjet kualifikuese të Kupës së Botës kundër Serbisë dhe Shqipërisë.

Trajneri Thomas Tuchel ka ftuar për herë të parë mesfushorin e Bournemouthit, Alex Scott, i cili ka bërë paraqitje mbresëlënëse këtë sezon. Nga ana tjetër, Jack Grealish dhe Danny Welbeck nuk janë përfshirë në listë, ndërsa mungojnë edhe Ollie Watkins dhe Myles Lewis-Skelly.

Bellingham, që kishte munguar në grumbullimin e kaluar për shkak dëmtimi, është rikthyer në formë me Real Madridin, duke shënuar tre gola në katër ndeshjet e fundit. Edhe Foden ka shkëlqyer me Manchester Cityn, ku shënoi dy herë në Ligën e Kampionëve kundër Borussia Dortmund.

“Jemi të kënaqur që janë rikthyer. Të dy kanë qenë vendimtarë për klubet e tyre dhe tani mund të ndihmojnë edhe kombëtaren,” tha Tuchel.

Anglia kryeson Grupin K me 18 pikë pas gjashtë ndeshjeve, ndërsa përballet me Serbinë në Wembley të enjten dhe me Shqipërinë në Tiranë të dielën.

Skuadra e Anglisë:

Portierë: Henderson, Pickford, Pope

Mbrojtës: Burn, Guehi, James, Konsa, O’Reilly, Quansah, Spence, Stones

Mesfushorë: Anderson, Bellingham, Henderson, Rice, Rogers, Scott, Wharton

Sulmues: Bowen, Eze, Foden, Gordon, Kane, Rashford, Saka./S.K/KP/

Sport

Vdes në moshën 24 vjeçare lojtari i Cowboys, Marshawn Kneeland

Published

2 days ago

November 7, 2025

UBT News

Sipas autoriteteve ligjore, ka vdekur mbrojtësi i Dallas Cowboys, Marshawn Kneeland në moshën 24 vjeçare. Ekipi lëshoi një deklaratë të enjten duke mos përmendur shkakun e vdekjes.

“Me trishtim të madh, Dallas Cowboys njoftojnë se Marshawn Kneeland ndërroi jetë tragjikisht këtë mëngjes. Marshawn ishte një shok skuadre i dashur dhe anëtar i organizatës sonë. Mendimet dhe lutjet tona në lidhje me Marshawn janë me të dashurën e tij Catalina dhe familjen e tij.”, thuhet në njoftim.

Cowboys kanë vënë në dispozicion burime këshillimi për të gjithë lojtarët, trajnerët dhe stafin.

Lojtarët aktualisht janë në javën e pushimit dhe nuk janë planifikuar të stërviten përsëri deri të hënën.

Policia e DPS-së gjeti automjetin e Kneeland të rrëzuar në Dallas Parkway në drejtim të jugut pranë Warren Parkway. Sipas raportit, Kneeland iku nga vendi i ngjarjes në këmbë dhe oficerët kontrolluan zonën me ndihmën e K-9 dhe njësive të dronëve.

Ndërsa autoritetet po kërkonin Kneeland, një dispeçer u tha oficerëve se njerëzit që e njihnin kishin marrë një mesazh në grup nga Kneeland duke i thënë lamtumirë. Përafërsisht tre orë më vonë, Kneeland u gjet i vdekur./S.K/NFL/

Rajoni

Profesorët e UBT-së përfaqësojnë institucionin në konferencën ndërkombëtare të projektit COWEB në Sarajevë

Published

2 days ago

November 7, 2025

Driton Iseni

Profesorët Dr. Engelbert Zefaj dhe Dr. Mentor Shaqiri përfaqësuan UBT-në në konferencën punuese ndërkombëtare të projektit COWEB, e cila u mbajt në Sarajevë, në ambientet e International Burch University.

Gjatë konferencës, përfaqësues nga universitete partnere të rajonit prezantuan punimet dhe rezultatet e tyre kërkimore, duke ndarë përvoja mbi zhvillimin e praktikave të reja në mësimin virtual bashkëpunues.

Në këtë kuadër, profesori i UBT-së Dr. Engelbert Zefaj mbajti një prezantim me temën: “Kultura dhe Ndërkulturaliteti në Mësimin Virtual Bashkëpunues (VCL): Ndikimet Pedagogjike dhe Vlerësimi i Studentëve”, ku theksoi rëndësinë e bashkëpunimit ndërkulturor dhe ndikimin pozitiv të tij në përmirësimin e përvojës së të nxënit.

Projekti COWEB ka për qëllim ndërtimin e kapaciteteve në institucionet e arsimit të lartë në Ballkanin Perëndimor për bashkëpunim ndërkombëtar virtual, duke promovuar pedagogji inovative dhe bashkëkrijimin e përmbajtjeve digjitale që forcojnë aftësitë dhe kompetencat e shekullit XXI.

Nëpërmjet pjesëmarrjes aktive në këtë projekt, UBT vazhdon të dëshmojë rolin e tij si një ndër institucionet lidere në avancimin e metodave bashkëkohore të mësimdhënies dhe në nxitjen e bashkëpunimit akademik ndërkombëtar në rajonin e Ballkanit Perëndimor.