Granit Xhaka është përballur me pyetje të shumta pas raportimeve se ndaj tij është hapur një hetim nga Prokuroria e Luzernit, nën dyshimin se ka siguruar një certifikatë të falsifikuar të COVID-19.

Sipas “Blick”, kapiteni i Kombëtares së Zvicrës pritet të merret në pyetje nga autoritetet në fillim të tetorit. Xhaka, ndërkohë, i ka mohuar akuzat.

Mesfushori shqiptar foli për herë të parë publikisht për këtë çështje pas ndeshjes së Premier Leagues, ku Sunderland u mposht 5-3 nga Manchester City. Xhaka luajti gjatë gjithë takimit.

Në një prononcim për “NZZ”, ai u tregua i shkurtër kur u pyet për hetimin.

“Për këtë nuk kam koment. Sot luajta futboll dhe për momentin kjo është ajo që ka rëndësi për mua”, deklaroi Xhaka.

I pyetur nëse kjo çështje po e ndikon, 34-vjeçari u përgjigj:

“Aspak, kam kaluar edhe më keq.”

Edhe trajneri i Sunderlandit, Régis Le Bris, nuk pranoi të komentonte rreth hetimit ndaj mesfushorit shqiptar.

“Nuk është fusha ime e ekspertizës. Fusha ime është futbolli. Dhe sa i përket futbollit, ai është shumë i mirë”, tha Le Bris.

Pas përfundimit të ndeshjes, Xhaka do t’i bashkohet Kombëtares së Zvicrës për grumbullimin e radhës gjatë pushimit ndërkombëtar.

Sipas raportimeve të “Blick”, ai pritet të merret në pyetje nga autoritetet e Luzernit në fillim të tetorit.

D.L

Kampionia e Lojërave Mesdhetare, Donjeta Sadiku, do të ngjitet në ring në Kampionatin Evropian të Boksit “Sofia 2026”, që po zhvillohet në Bullgari.

Boksierja kosovare do të garojë në kategorinë deri në 60 kilogramë, ndërsa në duelin e radhës do të përballet me rusen Alina Pushkar.

Përballja mes Sadikut dhe Pushkar është planifikuar të zhvillohet nga ora 13:30, në ringun “A”.

Sadiku vjen në këtë garë pas një periudhe të suksesshme në arenën ndërkombëtare. Ajo u shpall kampione e Lojërave Mesdhetare “Taranto 2026”, duke fituar medaljen e artë për Kosovën.

Tani, boksierja kosovare synon të vazhdojë me paraqitje të mira edhe në Kampionatin Evropian, në një tjetër sfidë të rëndësishme në karrierën e saj.

D.L

Ish-futbollisti i Republikës së Irlandës, Kevin Kilbane, ka kritikuar vendimin e Federatës së Futbollit të Irlandës për të zhvilluar ndeshjet ndaj Izraelit, duke thënë se federata do të pendohet që nuk zgjodhi bojkotin.

Kilbane, i cili ka zhvilluar 111 ndeshje me përfaqësuesen irlandeze dhe 324 paraqitje në Premier League, e ka shprehur qëndrimin e tij në një shkrim të publikuar të hënën në “Irish Times”.

Sipas tij, Irlanda nuk është dashur të luajë ndaj Izraelit, pavarësisht vendit ku zhvillohen ndeshjet.

“Republika e Irlandës nuk duhet të luajë kundër Izraelit. As në Dublin, as në Hungari dhe përfundimisht jo në ndeshjen ‘vendase’ në Serbi. Jo përderisa forcat izraelite po kryejnë gjenocid”, ka shkruar Kilbane.

Ai ka argumentuar se Irlanda do të mund t’i përballonte pasojat e një vendimi të tillë dhe se Federata e Futbollit të Irlandës do ta kishte mbështetjen e tij si ish-futbollist i përfaqësueses.

“Më pëlqen të mendoj se edhe zëra të tjerë do ta kishin mbështetur atë, nëse UEFA do të kishte vendosur sanksione të rrepta. Ose ndonjë sanksion”, ka shkruar ai.

Kilbane ka thënë se një vendim i tillë do të kërkonte “guxim të vazhdueshëm” nga federata irlandeze, përballë kritikave që, sipas tij, do të vinin nga Izraeli dhe aleatët e tij.

Ish-mesfushori irlandez beson se një bojkot do ta paraqiste Federatën e Futbollit të Irlandës si një organizatë sportive me një qëndrim të qartë moral. Ai gjithashtu ka shprehur bindjen se UEFA nuk do ta përjashtonte Irlandën dhe as nuk do ta dënonte rëndë, nëse një qëndrim i tillë do të mbështetej edhe nga federata të tjera.

“Por fillimisht duhet të mbash qëndrim. Nuk besoj se do të ishim lënë në baltë. Refuzimi për të luajtur kundër Izraelit do të kishte nxitur një zinxhir reagimesh mbështetëse, të ngjashëm me atë që përjetoi javën e kaluar reperi Macklemore”, ka shkruar Kilbane.

Irlanda dhe Izraeli janë pjesë e të njëjtit grup në Ligën e Kombeve të UEFA-s, së bashku me Kosovën dhe Austrinë.

Irlanda do të përballet me Kosovën të enjten në Prishtinë, ndërsa të dielën Izraeli do ta presë Irlandën në Debrecen të Hungarisë. Ndeshja e kthimit, ku Irlanda figuron si vendase, do të zhvillohet më 4 tetor në Baçka Topola të Serbisë, në terren neutral.

Ndërkohë, nga Federata e Futbollit të Irlandës kanë deklaruar se UEFA ka refuzuar kërkesën që Irlanda dhe Izraeli të ndahen në shortet e ardhshme.

Sipas drejtuesve të federatës irlandeze, UEFA e ka arsyetuar vendimin me faktin se “Irlanda dhe Izraeli nuk ishin asnjëherë në konflikt direkt”.

D.L

Këtë të shtunë nis zyrtarisht edicioni i ri i Superligës së Kosovës në basketboll, ku që në xhiron e parë tifozët do të kenë mundësi të ndjekin një nga përballjet më të mëdha të basketbollit vendor.

Sfidën e parë të kampionatit do ta hapë derbi i madh ndërmjet Sigal Prishtinës dhe Pejës. Ndeshja do të zhvillohet nesër, me fillim nga ora 17:00, në Pallatin e Rinisë dhe Sporteve në Prishtinë.

Të dyja skuadrat hyjnë në këtë sezon me synime të mëdha për titullin kampion, ndërsa përballja hapëse premton spektakël dhe rivalitet të lartë në parket.

D.L