Një studim i fundit i realizuar nga Save the Children ka zbuluar se 78% e fëmijëve në Kosovë besojnë se bullizmi është një problem i përhapur në institucionet arsimore. Vlerësohet se ky fenomen ka pasoja të rënda në shëndetin emocional dhe psikologjik të fëmijëve, duke çuar shpesh në ankth, depresion dhe ulje të vetëvlerësimit. Përveç ndikimeve të drejtpërdrejta në mirëqenien e fëmijëve, bullizmi ka efekt negativ edhe në arritjet akademike dhe marrëdhëniet shoqërore të tyre.

Për të luftuar këtë problem dhe për të mbrojtur mirëqenien e fëmijëve, është e domosdoshme të ketë një bashkëpunim më të ngushtë ndërmjet shkollave, familjeve dhe institucioneve shtetërore. Edukimi i fëmijëve mbi rreziqet e bullizmit dhe përdorimin e përgjegjshëm të mediave sociale, veçanërisht në platformat si TikTok, është një hap thelbësor për të parandaluar ndikimet negative që sjell ky fenomen.

Profesoresha dhe psikologia klinike, Violeta Zefi, thekson se ky rezultat është një thirrje për veprim të menjëhershëm dhe përkushtim të madh nga prindërit, mësimdhënësit, shkollat dhe institucionet, për të krijuar një mjedis sa më të sigurt për fëmijët në Kosovë.

Çfarë do të thotë për shoqërinë kosovare që 78% e fëmijëve besojnë se bullizmi është një problem i pranishëm në shkollat e tyre?

Fakti që 78% e fëmijëve në Kosovë besojnë se bullizmi është një problem i pranishëm në shkollat e tyre reflekton disa aspekte shqetësuese dhe të rëndësishme për shoqërinë kosovare. Fillimisht, kjo përqindje tregon se një pjesë e madhe e fëmijëve përballen me një mjedis shkollor që nuk është gjithmonë i sigurt dhe mbështetës për ta. Po ashtu, ky rezultat tregon se fëmijët janë të vetëdijshëm për problemin e bullizmit dhe përgjithësisht janë të hapur për të diskutuar për të. Ky është një hap i rëndësishëm drejt adresimit të tij, pasi identifikimi i një problemi mund të trajtohet më lehtë dhe pa pritur gjatë. Rezultati flet për një thirrje të qartë për ndërhyrje dhe përkushtim më të madh nga prindërit, mësimdhënësit, shkollat dhe institucionet shtetërore për të krijuar një mjedis të sigurt, ku çdo fëmijë të ndihet i respektuar dhe i mbrojtur.

Si mund të ndikojë përhapja e bullizmit në shkolla dhe në rrjetet sociale, si TikTok, në zhvillimin emocional dhe psikologjik të fëmijëve në Kosovë?

Përhapja e bullizmit në shkolla dhe në rrjetet sociale si TikTok mund të ketë pasoja serioze dhe afatgjata në zhvillimin emocional dhe psikologjik të fëmijëve në Kosovë. Bullizmi krijon ndjenja të thella pasigurie dhe ul vetëvlerësimin e fëmijëve, duke i bërë ata të ndihen të pavlerë ose të padëshiruar. Kur bullizmi ndodh publikisht në rrjetet sociale, si TikTok, ndikimi mund të përforcohet, pasi audienca më e gjerë ka mundësi të rrisë ndjenjat negative edhe më tej. Po ashtu, fëmijët që përjetojnë bullizëm shpesh tërhiqen nga shoqëria për të shmangur dhimbjen dhe përqeshjet. Ky izolim social mund të pengojë zhvillimin e aftësive të tyre për të krijuar dhe mbajtur marrëdhënie të shëndetshme.

Ndikimi psikologjik i bullizmit shpesh manifestohet me simptoma të ankthit dhe depresionit. Fëmijët mund të ndihen të stresuar, të frikësuar ose të pafuqishëm përballë situatave të tilla. Rrjetet sociale, mund të përkeqësojnë këtë gjendje, duke e bërë të pamundur që fëmijët të shkëputen nga mjedisi i bullizmit. Përjetimi i bullizmit në shkolla mund të çojë në mungesë motivimi, përqendrim të ulët dhe rezultate të dobëta nëmësimnxënie. Kjo përkeqësohet kur bullizmi vazhdon edhe jashtë shkollës, përmes platformave sociale.

Fëmijët që përballen me bullizëm shpesh shfaqin sjellje destruktive si një mënyrë për të përballuar stresin, duke përfshirë vetë-dëmtimin. Gjithashtu, bullizmi mund të krijojë tensione në marrëdhëniet familjare, pasi fëmijët shpesh mund të ndihen të pa kuptuar ose të paaftë për të shprehur ndjenjat e tyre.

Përderisa TikTok është identifikuar si platforma më e rrezikshme për bullizmin online në Kosovë, çfarë hapash mund të merren për të rritur sigurinë dhe mbrojtjen e fëmijëve në këtë platformë?

Është shumë i rëndësishëm edukimi për përdorimin e mediave sociale. Prindërit dhe mësimdhënësit duhet të mësojnë fëmijët të përdorin rrjetet sociale në mënyrë të përgjegjshme dhe të kuptojnë rreziqet e bullizmit online. Po ashtu, duhet të zhvillohen programe që rrisin ndërgjegjësimin për bullizmin dhe ndikimin e tij, duke krijuar një mjedis më mbështetës dhe të sigurt për fëmijët. E një rëndësie të veçantë është edhe mbështetja psikologjike. Këshillimi dhe ndihma psikologjike për fëmijët që përjetojnë bullizëm janë thelbësore për rikuperimin e tyre emocional.

Si mund të kontribuojnë shkollat, prindërit dhe institucionet për të krijuar një mjedis më të sigurt për fëmijët, duke adresuar dhe luftuar bullizmin, si në shkolla ashtu edhe online?

Shkollat, prindërit dhe institucionet mund të luajnë role të rëndësishme për të krijuar një mjedis më të sigurt për fëmijët dhe për të luftuar bullizmin, si në shkolla ashtu edhe online.

Është shumë i rëndësishëm hartimi dhe zbatimi i programeve kundër bullizmit. Të edukohen nxënësit mbi efektet e bullizmit përmes trajnimeve dhe aktiviteteve ndërgjegjësuesenë shkolla. Prindërit duhet të ndërtojnë komunikimit të hapur më fëmijet. Të krijojnë një mjedis ku fëmijët ndihen të sigurt për të ndarë përvojat e tyre. Po ashtu, të monitorojnë përdorimin e rrjeteve sociale, përkatësisht të edukojnë dhe mbikëqyrin aktivitetin online të fëmijëve për t’i mbrojtur nga bullizmi virtual.

Institucionet duhet të hartojnë politika mbrojtëse që do të fokusoheshin në adresimin e bullizmin në shkolla dhe online. Po ashtu, institucionet të bëjnë të mundur që secila shkollë të ketë shërbim psikologjik.

Ndihma psikologjike për fëmijët që përjetojnë bullizëm është thelbësore për rikuperimin e tyre emocional. Bashkëpunimi në mes të gjitha palëve, prindërve, shkollave dhe institucioneve është krucial për rezultate pozitive. Ofrimi i mbështetjes psikologjike për fëmijët që përballen me bullizëm është një hap i rëndësishëm për të siguruar zhvillimin e tyre emocional dhe për të ndihmuar në rikuperimin nga dëmet psikologjike që bullizmi mund të shkaktojë. Vetëm nëpërmjet ndërgjegjësimit, edukimit dhe bashkëpunimit të të gjitha palëve të shoqërisë mund të luftojmë bullizmin dhe të sigurohemi se cdo fëmijë të ndihet i sigurt dhe i mbrojtur në mjedisin shkollor.

 

 

Gazetare: Dea Berisha

 

 

 

 

 

 

 

 

 

 

 

Ukraina dhe Shtetet e Bashkuara janë gati të nënshkruajnë një protokoll për Marrëveshjen e Bashkëpunimit për Tregtinë dhe Investimet në fillim të janarit 2025.

Kjo çështje u diskutua në një takim midis zëvendëskryeministrit të parë dhe ministres së Ekonomisë së Ukrainës, Yulia Svyrydenko dhe përfaqësueses së Tregtisë së SHBA, Katherine Tai në Uashington më 4 dhjetor, raporton Ukrinform, duke cituar portalin qeveritar.

Palët diskutuan përditësimin e Marrëveshjes së Bashkëpunimit për Tregtinë dhe Investimet (TICA), e cila u miratua në vitin 2008 dhe shprehën dëshirën e tyre të përbashkët për të nënshkruar një protokoll të marrëveshjes në të ardhmen e afërt, duke përfshirë anekset për anti-korrupsionin dhe praktikat e mira rregullatore.

“Ukraina është gati të nënshkruajë protokollin e kësaj marrëveshjeje në fillim të janarit 2025. Ky është një hap i rëndësishëm drejt krijimit të një mjedisi transparent biznesi dhe tërheqjes së investimeve në Ukrainë, veçanërisht në kontekstin e rindërtimit të pasluftës,” tha Svyrydenko.

Marrëveshja parashikon thjeshtimin e procedurave tregtare midis Ukrainës dhe Shteteve të Bashkuara, veçanërisht duke reduktuar barrierat tregtare, duke përmirësuar aksesin në treg, duke nxitur zhvillimin e eksporteve dhe importeve të mallrave dhe shërbimeve dhe duke mbajtur kushte të hapura dhe të drejta për të bërë biznes.

Dokumenti parashikon krijimin e përbashkët të kushteve të favorshme për investimet e huaja, sigurimin e mbrojtjes së investimeve dhe forcimin e bashkëpunimit dypalësh për investime. Ai përmban gjithashtu seksione për mbështetjen e nismave dhe projekteve të përbashkëta në sektorë të ndryshëm të ekonomisë, duke përfshirë energjinë, infrastrukturën dhe sektorin e bujqësisë.

Ai gjithashtu ofron mbështetje teknike dhe këshilla për Qeverinë e Ukrainës për zbatimin e reformave ekonomike, veçanërisht në kontekstin e përmirësimit të mjedisit institucional dhe kuadrit ligjor për zhvillimin e biznesit dhe tërheqjen e investimeve.

Palët diskutuan gjithashtu rishikimin e vazhdueshëm të masave antidumping kundër importeve të çelikut ukrainas në Shtetet e Bashkuara. Svyrydenko vuri në dukje se ishte e rëndësishme që prodhuesit ukrainas të çelikut të kishin akses më të madh në tregun amerikan.

Puna për përditësimin e marrëveshjes filloi në nëntor 2022 gjatë takimit të njëmbëdhjetë të Këshillit të Tregtisë dhe Investimeve SHBA-Ukrainë.

Sot, besimtarët e krishterë po festojnë me devotshmëri Shën Kollin, një nga shenjtorët më të nderuar të krishterizmit, që mbart me vete një mesazh dashurie dhe mbrojtjeje për besimtarët. Kjo festë, që ka një rëndësi të veçantë në traditën e krishterë shqiptare, simbolizon jo vetëm besimin e thellë fetar, por edhe një pjesë të rëndësishme të historisë dhe trashëgimisë kulturore të vendit tonë.

Në këtë ditë, Drejtoria Rajonale e Trashëgimisë Kulturore Shkodër ka sjellë në vëmendje një nga objektet më të shenjta të kultit të krishterë në Shqipëri: Katedralen e Shën Nikollit në Lezhë. Ky monument i kulturës (kategoria I) është një dëshmi e jashtëzakonshme e artit dhe historisë fetare shqiptare. E ndërtuar në shekullin XIV, katedralja është një perle e arkitekturës mesjetare, me përmasa impozante prej 17 x 8 metrash. Ndër elementët më të veçantë që kjo faltore ruan, janë afresket e lashta, ku spikat imazhi i Shën Nikollit, mbrojtësi i besimtarëve dhe simboli i bujarisë e mirësisë.

Katedralja e Shën Nikollit, e cila është një hapësirë e shenjtë, ka një lidhje të ngushtë me historinë kombëtare. Ajo nuk është vetëm një vend adhurimi, por një simbol i besimit të thellë dhe një objekt i rëndësishëm historik, pasi në këtë vend të shenjtë, më 17 janar të vitit 1468, u varros heroi ynë kombëtar, Gjergj Kastrioti Skënderbeu. Ky moment, i njohur në historinë e shqiptarëve, e ktheu këtë katedrale në një pikë pelegrinazhi, një vend ku shqiptarët vinin për të nderuar figurën e madhe të Skënderbeut dhe për të kujtuar luftën e tij për lirinë dhe pavarësinë e kombit.

Duke kaluar shekuj, Katedralja e Shën Nikollit ka mbijetuar si një dëshmi e fortë e identitetit tonë kombëtar. Ajo nuk është vetëm një vend ku bashkohen besimi dhe fryma fetare, por edhe një trashëgimi kulturore që lidh ngushtë historinë e kombit shqiptar me të kaluarën e tij të lavdishme. Sot, kjo katedrale qëndron si një simbol i qëndresës dhe vazhdimësisë së identitetit shqiptar, duke bashkuar traditën fetare dhe historinë kombëtare, duke u bërë një pikë kyçe për çdo shqiptar që dëshiron të ruajë dhe nderojë vlerat e tij më të thella shpirtërore dhe historike.

Në këtë ditë të shënuar, festa e Shën Kollit na kujton se traditat tona fetare dhe historike janë thelbi i identitetit tonë kombëtar, dhe se çdo monument, si Katedralja e Shën Nikollit, është një testament i përhershëm i atij identiteti të vyer./UBTNews/

Kohëve të fundit ka bërë bujë lajmi ku shkruhej që kënga “Mora Fjalë” nuk mund të këndohet nga “Tifozat Kuq e Zi”, pasi atyre u është ndaluar kjo gjë.

Vetë “Tifozët Kuq e Zi”, kanë reaguar nëpërmjet një postimi në rrjetet sociale, duke shkruar se askush nuk mundet dot të imponojë asgjë dhe se do të vazhdojnë t’i këndojnë Shqipërisë me zemër e pasion. “Tifozat Kuq e Zi” kanë theksuar se askush nuk mund të imponojë asgjë mbi ta dhe se do të vazhdojnë t’i këndojnë Shqipërisë me zemër e pasion.

Në reagimin e plotë, ata sqarojnë se grupi nuk ka një “Grup Kryesie” siç është pretenduar nga disa individë të paautorizuar, të cilët janë shfaqur në media. Ata gjithashtu kanë njoftuar se çdo kërkesë për pjesëmarrje në media duhet të dërgohet në adresën zyrtare të emailit [email protected] dhe se çdo deklaratë tjetër do të konsiderohet si qëndrim personal, jo si përfaqësim i grupit.

Grupi theksoi gjithashtu se për 21 vjet askush nuk ka mundur t’i ndalojë dhe se do të vazhdojnë të këndojnë këngët e tyre atdhetare, duke shprehur krenari dhe dashuri për Shqipërinë.

“Tifozat Kuq e Zi” mbyllën reagimin me një thënie: “O sa mirë me qenë Shqiptar!”/UBTNews/