Në Shkup po mbahet një samit dyditor mes liderëve të Ballkanit Perëndimor dhe përfaqësuesve të Bashkimit Evropian, me fokus në zbatimin e Planit të Rritjes për rajonin dhe avancimin e bashkëpunimit ekonomik përmes Tregut të Përbashkët Rajonal.

Pjesëmarrës në këtë takim janë liderë të vendeve të rajonit, përfshirë kryeministrin në detyrë të Kosovës, Albin Kurti, presidentin e Serbisë, Aleksandar Vuçiq, kryeministrin e Shqipërisë, Edi Rama, kryeministrin e Malit të Zi, Milojko Spajiq, dhe kryetaren e Këshillit të Ministrave të Bosnje e Hercegovinës, Borjana Krišto. Ata janë bashkuar nga përfaqësues të lartë të BE-së, si dhe të institucioneve ndërkombëtare si BERZH dhe Banka Botërore.

Samiti, i cili nisi dje me një darkë zyrtare të organizuar nga kryeministri i Maqedonisë së Veriut, Hristijan Mickoski, në ambientet e “Winery Kamnik”, vazhdon sot në hotelin “Hilton Double Tree”. Takimi përfshin dy panele diskutimi, ku liderët diskutojnë progresin në implementimin e Planit të Rritjes dhe prezantojnë propozime për nisma të reja rajonale.

Ngjarja do të përmbyllet me një konferencë për media dhe një drekë zyrtare. Samiti shihet si një mundësi për të forcuar integrimin ekonomik dhe politik mes vendeve të rajonit dhe për të avancuar procesin drejt integrimit evropian.

Sot, me fillim nga ora 09:00, në Zubin Potok është mbajtur ceremonia solemne e vendosjes së gurthemelit për ndërtimin e stacionit të ri policor, projekt ky i iniciuar dhe mbështetur nga Policia e Kosovës.

Ky investim synon të forcojë më tej praninë institucionale të policisë në këtë komunë veriore dhe të përmirësojë nivelin e sigurisë për qytetarët.

“Ky stacion policor do të forcojë prezencën e Policisë në Zubin Potok dhe do të përmirësojë sigurinë për qytetarët,” thuhet në njoftimin zyrtar të Policisë së Kosovës.

Vazhdimi i seancës për konstituimin e Kuvendit të ri të Kosovës do të mbahet sot nga ora 11:00.

Tridhjetenëntë vazhdimet e deritanishme kanë dështuar për formimin e legjislaturës së nëntë të dalë nga zgjedhjet e nëntë shkurtit.

Përveç betimit të deputetëve të zgjedhur, Kuvendi i ri ka mbetur i pa konstituar në mungesë të zgjedhjes së kryetarit të ri dhe nënkryetarëve.

Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe NISMA nuk po i japin votën kandidates së propozuar për kryetare nga Lëvizja Vetëvendosje, Guxo e Alternativa.

Albulena Haxhiu në gjashtë tentime ka dështuar të kalojë provimin dhe në mungesë të kësaj Lëvizja Vetëvendosje, Guxo e Alternativa po kërkojnë komision për votim të fshehtë, për të cilën gjë Aleanca për Ardhmërinë e Kosovës ka kërkuar interpretim nga Gjykata Kushtetuese. Kjo e fundit përmes një aktgjykimi ka vendosur të enjten, më 26 qershor, që Kuvendi duhet të konstituohet brenda tridhjetë ditësh.

Kujtojmë, zgjedhjet parlamentare janë mbajtur më nëntë (9) shkurt. Mbledhja e parë për konstituimin e Kuvendit të ri është mbajtur më pesëmbëdhjetë (15) prill. Që nga ajo datë çdo dyzetetetë (48) orë po mbahen vazhdime të seancës konstituive pa arritur ndonjë rezultat konkret.

Prokuroria Themelore në Pejë njofton se në koordinim me Inspektoratin Policor të Kosovës, pas grumbullimit të provave dhe analizimit të tyre, kanë arrestuar sot tre zyrtarë policorë, të cilët dyshohen se gjatë arrestimit të një personi kanë tejkaluar autorizimet e tyre dhe kanë keqtrajtuar fizikisht të njëjtin derisa i njëjti ishte i prangosur.

“Me urdhër të prokurorit të shtetit, tre të dyshuarit (zyrtarë policorë) janë ndaluar për 48 orë për veprën penale “Keqtrajtim gjatë ushtrimit të detyrës zyrtare ose autorizimeve publike”, thuhet në njoftim, raporton “Betimi për Drejtësi“.

Bëhet e ditur se hetuesit e IPK-së me autorizim të Prokurorisë Themelore në Pejë do të ndërmarrin edhe veprime tjera hetimore drejt ndriçimit të plotë të të gjitha rrethanave që ndërlidhen me këtë rast.

Një ditë më parë, Inspektorati Policor i Kosovës (IPK) njoftoi se i ka rekomanduar Policisë së Kosovës suspendimin e tre zyrtarëve policorë të Stacionit Policor të Klinës.

Në njoftim thuhej se incidenti ku dyshohet se janë përfshirë tre zyrtarët policorë raportohet të ketë ndodhur më 28 qershor 2025 në rrugën “Ismail Qemajli” në qytetin e Klinës, përkatësisht në oborrin e shtëpisë së një qytetari.

“Bazuar nga të gjeturat e hetimit fillestar ekziston dyshimi se zyrtarët policorë kanë tejkaluar autorizimet e tyre gjatë përdorimit të forcës ndaj një qytetari përderisa në deklaratat e tyre dhe në raportet zyrtare është prezantuar një version që rezulton të jetë në kundërshtim të plotë me pamjet e incizuara dhe provat faktike. Në bazë të kompetencave të përcaktuara me Ligjin për Inspektoratin Policor të Kosovës, hetuesit e IPK-së kanë rekomanduar suspendimin ndaj tre zyrtarëve policorë të përfshirë si të dyshuar për veprën penale “Keqtrajtim gjatë ushtrimit të detyrës zyrtare ose autorizimeve publike”, njoftoi IPK-ja.