Një person ka humbur jetën mbrëmë në rrugën “Arshi Pipa” në Prishtinë, pasi ka rënë nga lartësia e një objekti. Ekipi mjekësor në vendin e ngjarjes ka konstatuar vdekjen e viktimës si pasojë e lëndimeve të marra.

Lajmin e ka konfirmuar për UBT News zëdhënësi i Policisë së Kosovës për rajonin e Prishtinës, Enis Pllana:

“Mbrëmë, rreth orës 23:00, Policia ka pranuar informatën se në rrugën ‘Arshi Pipa’ në Prishtinë një person ka rënë nga një lartësi (objekt). Si pasojë e lëndimeve të marra, viktima nuk ka arritur t’u mbijetojë plagëve. Vdekja e viktimës është konstatuar nga ekipi mjekësor në vendin e ngjarjes,” deklaroi Pllana për UBT News.

Ai po ashtu bëri të ditur se organet e rendit kanë nisur hetimet për sqarimin e plotë të rrethanave të ngjarjes:

“Policia, në koordinim me prokurorin e Shtetit, ka nisur hetimet dhe po ndërmerr të gjitha veprimet e nevojshme për sqarimin e rrethanave të rastit,” shtoi ai.

D.L

Gjashtë raste të dhunës në familje janë raportuar brenda një dite në raportin 24-orësh të Policisë së Kosovës, me raste të regjistruara në Prishtinë, Fushë Kosovë, Lipjan dhe Rahovec.

Sipas të dhënave zyrtare të policisë, ndaj shumicës së viktimave është ushtruar dhunë psikike, fizike dhe kanosje.

Në Prishtinë janë raportuar tre raste të ndryshme. Në dy prej tyre, të dyshuarit kanë ushtruar dhunë fizike dhe sulm ndaj viktimave femra, ndërsa në rastin tjetër është ushtruar dhunë psikike dhe kanosje. Në të tre raste, pas intervistimit me urdhër të prokurorit, të dyshuarit janë liruar në procedurë të rregullt.

Një person në Fushë Kosovë është arrestuar dhe dërguar në mbajtje me vendim të prokurorit, pasi dyshohet se ka ushtruar dhunë psikike ndaj një femre.

Në Lipjan është iniciuar një rast për “Dhunë në familje & Sulm” ndaj një viktime femër. Lënda do të trajtohet në procedurë të rregullt në konsultim me prokurorin.

Ndërsa në Rahovec pas një mosmarrëveshjeje, një person ka sulmuar verbalisht dhe ka kanosur një mashkull. I dyshuari ndodhet aktualisht në kërkim policor, ndërsa rasti vazhdon të jetë nën hetime. /E.A/

Partia Demokratike e Kosovës i është drejtuar sërish sot Gjykatës Kushtetuese për të kontestuar ligjshmërinë e vendimit për zgjedhjen e Qeverisë së re të udhëhequr nga Albin Kurti.

Kërkesa zyrtare është dorëzuar nga deputetët e këtij subjekti politik, Përparim Gruda dhe Arian Tahiri, të cilët kërkuan nga Gjykata Kushtetuese që të vlerësojë në tërësi ligjshmërinë e procedurave të ndjekura gjatë votimit në Kuvend.

Sipas përfaqësuesve të PDK-së, mënyra e konstituimit të Kuvendit dhe hapat e ndërmarrë menjëherë pas tij përmbajnë shkelje seriosaze kushtetuese. Nga partia më e madhe opozitare janë shprehur se Albin Kurti dhe Lëvizja Vetëvendosje kanë shkelur afatet kushtetuese me qëllim gjatë këtij procesi.

Kjo lëvizje e PDK-së vjen vetëm një ditë pasi ky subjekt politik dërgoi një tjetër kërkesë në Gjykatën Kushtetuese, e cila lidhej me procedurën e konstituimit të legjislaturës së 11-të ku u zgjodh kryetarja dhe katër nënkryetarët e Kuvendit procedurë kjo që i hap rrugë edhe votimit të kabinetit të ri qeveritar. /Ekonomia online/

Sot, me fillim nga ora 09:00, në Gjykatën Themelore të Prishtinës mbahet seanca e gjykimit në mungesë ndaj 53 të akuzuarve për Masakrën e Mejës, një prej krimit më të rënda të kryera gjatë luftës në Kosovë.

Më 27 prill 1999, në fshatin Mejë të Gjakovës u vranë 376 persona brenda pak orëve, në atë që konsiderohet si ekzekutimi më makabër dhe masakra më e madhe e luftës së viteve 1998-1999.

Gjatë këtij operacioni të planifikuar, forcat serbe bllokuan të gjitha rrugët dytësore duke lënë të hapura vetëm dy akse në drejtim të Mejës. Në orët e hershme të mëngjesit, njësitet e ushtrisë serbe, policia, “beretat e kuqe”, paramilitarët dhe personat e maskuar rrethuan zonën dhe grumbulluan djemtë e burrat e moshave 15 deri në 60 vjeç.

Në këtë sulm u goditën 15 fshatra të rrethit të Gjakovës, ku forcat serbe ekzekutuan shtëpi për shtëpi të gjithë meshkujt e ndalur. Asnjë nga të ndaluarit atë ditë nuk arriti të dilte i gjallë nga Meja.

Pas përfundimit të luftës, një pjesë e trupave të masakruar u gjetën nëpër varreza masive në Kosovë dhe Serbi, ndërsa një pjesë e tyre vazhdojnë të mbeten ende të zhdukur. /E.A/