Interi po hyn në fazën më delikate të Kampionatit Botëror për Klube 2025 me disa dilema në repartin ofensiv, por edhe me lajme pozitive.

Sulmuesi francez, Markus Turam, ka tejkaluar problemet muskulore të pësuara gjatë ndeshjes me Monterein dhe është rikthyer në stërvitje të plotë, duke respektuar plotësisht programin e rikuperimit të hartuar nga stafi mjekësor i klubit.

Ndërkohë, trajneri Kristian Kivu do të duhet të bëjë pa shërbimet e mesfushorit Davide Fratezi për ndeshjen e sotme. Fratezi vazhdon të vuajë nga problemet fizike dhe nuk është rikuperuar në kohë për këtë sfidë të rëndësishme në fazën e 1/8-ave.

Një tjetër çështje që mban pezull kampin zikaltër është gjendja e sulmuesit të ri, Françesko Pio Espozito. Lajmi i mirë është se ekzaminimet kanë përjashtuar çdo dëmtim të rëndë, bëhet fjalë vetëm për një lodhje muskulore. Espozito u ndal gjatë seancës së fundit stërvitore, por do të përpiqet të jetë të paktën mes të grumbulluarve për ndeshjen. Kështu, Kivu mund të detyrohet të hedhë menjëherë në fushë Markus Turam përkrah kapitenit Lautaro Martinez.

Sa i përket mesfushës, Kivu do të vazhdojë t’i besojë Asllanit regjinë, ndërsa përkrah tij do të jenë Barela dhe Mkhitarian. Në krahë do të vendosen Dumfris e Dimarko, ndërsa treshja para Zomerit do të përbëhet nga Darmian, Açerbi dhe Bastoni.

Cristiano Ronaldo ka firmosur një kontratë të re dyvjeçare me klubin saudit Al-Nassr, duke u bërë sportisti më i paguar në botë. Sipas të përditshmes zvicerane “Blick”, kjo marrëveshje kap vlerën totale prej rreth 565 milionë eurosh, duke përfshirë paga, shpërblime dhe përfitime personale luksoze.

Paga vjetore e Ronaldos në këtë kontratë është afërsisht 200 milionë euro, ndërsa ai do të marrë edhe një pagesë për nënshkrim prej 27 milionë eurosh menjëherë, dhe 15 milionë të tjera nëse qëndron edhe në sezonin e dytë. Përveç kësaj, portugezi ka siguruar 15% aksione në klub, me vlerë rreth 36 milionë euro, si dhe një marrëveshje sponsorizimi për tregun aziatik me vlerë 66 milionë euro.

Bonuset për performancën në fushë janë gjithashtu të larta: për çdo gol Ronaldo do të marrë 88 mijë euro, për asist 44 mijë euro, ndërsa për fitimin e titullit kampion një bonus prej 9.4 milionë eurosh. Bonuset për fitimin e Champions League Aziatik dhe për golashënuesin më të mirë arrijnë respektivisht në 7.2 dhe 4.7 milionë euro.

Kontrata përfshin edhe shërbime dhe përfitime personale të nivelit të lartë, përfshirë avion privat në dispozicion 24/7, staf prej 16 personash që përfshin kuzhinier, trajner fitnesi dhe staf sigurie, vila luksoze në Riad, si dhe pushime të paguara në destinacionet e zgjedhura nga ylli portugez.

Kjo marrëveshje jo vetëm që vendos Ronaldon në majë të listës së sportistëve më të paguar në histori, duke tejkaluar kontratat e yjeve si Lionel Messi dhe LeBron James, por gjithashtu përfaqëson një pjesë të strategjisë së Arabisë Saudite për zhvillim sportiv dhe ekonomik, të njohur si “Vision 2030”.

Drita ka zyrtarizuar transferimin e futbollistit Vesel Limaj.

Limaj ka nënshkruar kontratë dy vjeçare me Kampionin e Kosovës, me mundësi vazhdimi edhe për një vit tjetër.

Ai së fundmi ishte pjesë e Malishevës, derisa ka luajtur edhe për Ballkanin.

Drita do ta ketë në dispozicion mesfushorin kosovar nga data 1 korrik.

Përzgjedhësi i Kosovës në futboll, Franco Foda, ka zbuluar arsyen pse refuzoi një ofertë fitimprurëse nga Emiratet e Bashkuara Arabe.

Foda në një intervistë dhënë për KOHËN, e cila do të transmetohet e plotë në emisionin Sporti TOTAL të KTV-së, të dielën nga ora 22:15, ka pranuar se ka pasur ofertë për të marrë drejtimin e një klubi arab.

Por ka theksuar se ka plane të mëdha me Kosovën. Foda me Federatën e Futbollit të Kosovës ka kontratë deri më 30 nëntor të vitit 2025.

Vazhdimi i kontratës do të varet nga rezultatet e kualifikimeve për Kupën e Botës 2026.

“Nuk dua të flas për Al Wahdan. Për mua është me rëndësi kontrata që kam me Federatën e Kosovës deri më 30 nëntor 2025. Nëse kualifikohemi në Botëror vazhdohet kontrata deri 30 qershor 2026. Kjo është për mua me rëndësi. Ne në vitin e fundit kemi zhvilluar diçka me lojtarët, me federatën. Janë kualifikimet për Botëror para derës. Kemi mundësi të kualifikohemi në Botëror. Për këtë ka qenë me rëndësi për mua këtë kontratë ta përmbushi. Ndihem shumë mirë këtu në Kosovë, njerëzit janë shumë të sjellshëm dhe të mirë. Jemi pranuar mirë. Për këtë kam vendosur të mbetem në Kosovë”, ka thënë Foda.

Ai thotë se ka ndier përgjegjësi ndaj lojtarëve dhe Federatës për të vazhduar punën te Kosova.

“Pas dy muajsh e kemi ndeshjen e parë në Zvicër, në eliminatoret për Botëror. Është shumë me rëndësi që t’iu përmbahesh kontratave, dhe përgjegjësitë që i ke si trajner. Por, ka normalisht interesim dhe oferta kur je i suksesshëm. Kështu është biznesi i futbollit”, ka shtuar Foda.

59-vjeçari, Foda e mori drejtimin e Kosovës në shkurt të vitit 2024.

Nën drejtimin e Fodas, Kosova i ka shënuar nëntë fitore, ka edhe katër humbje. Një humbje e ka me rezultat zyrtar ndaj Rumanisë. Dy fitoret më të rëndësishme janë ndaj Islandës në plejofin e Ligës së Kombeve. Falë dy fitoreve, Kosova edicionin e ardhshëm paraqitet për herë të parë në Ligën B të Ligës së Kombeve. Foda ka folur edhe për takimin që pati me presidentin e FFK-së, Agim Ademi, në Vjenë.

Ai ka theksuar se me presidentin Ademi kanë diskutuar rreth së ardhmes së Kosovës.

“Flas shumë shpesh me presidentin, është shumë normale. Në radhë të parë jam trajner i përfaqësueses A të Kosovës, por për mua personalisht është me rëndësi që në përgjithësi në futbollin e Kosovës të zhvillohen gjërat më tutje. Kemi shikim për të tërësinë e madhe. Angazhohemi pos me përfaqësuesen A, edhe me ekipet e të rinjve U21 dhe U19. Për mua është me rëndësi që së bashku këtu të krijojmë një ide të lojës, identitet për çfarë dëshiron të qëndrojë futbolli kosovar. Ka shumë tema për të cilat flas rregullisht me presidentin. E në këtë bisedë në Vjenë ka qenë edhe për të ardhmen. Çfarë duam të zhvillojmë tutje ne këtu në Federatën e Kosovës së bashku”, ka theksuar tekniku gjerman.

Prej shtatorit, për Kosovën fillojnë kualifikimet për Botërorin 2026. Ndeshjen e parë e ka më 5 shtator ndaj Zvicrës në udhëtim. Më 8 shtator e pret Suedinë në Prishtinë. Në grupin B është edhe Sllovenia. Për gjasat e Kosovës për kualifikim historik në Botëror në një grup me Zvicrën, Suedinë e Slloveninë, se kush është lider te Kosova, se çfarë mendimi ka për Granit Xhakën e Ardon Jasharin dhe kush do të jenë prurjet e reja, do t’i mësoni gjatë intervistës që do të transmetohet në mbrëmjen e së dielës në Kohavision.