Barcelona po shqyrton mundësinë për të huazuar sulmuesin korean, Son Heung-min, nga Los Angeles FC, duke përfituar nga një klauzolë e veçantë në kontratën e tijm, e njohur si ligji i Beckham.

Kjo rregullore lejon lojtarët e MLS të kalojnë përkohësisht në klube evropiane gjatë pushimit të kampionatit amerikan, pa e prishur kontratën me ekipin aktual.

Sipas mediave spanjolle, drejtuesit e Barcelonës po e analizojnë seriozisht këtë mundësi, pasi një marrëveshje huazimi do t’u mundësonte të përforcojnë skuadrën pa shpenzime të mëdha.

Për Son-in, një kalim i përkohshëm në Evropë do të ishte ideal për t’u përgatitur në formën më të mirë para Kupës së Botës 2026, ndërsa për Barcelonën do të sillte eksperiencë, gola dhe ndikim të menjëhershëm në ofensivë.

Aktualisht, sulmuesi 33-vjeçar po shkëlqen me Los Angeles FC në MLS, ndërsa ideja e një huazimi në “Camp Nou” shihet si një lëvizje strategjike nga të dyja palët./S.K/KP/

Pas polemikës së fortë në ndeshjen Napoli–Inter, Federata e Gjyqtarëve Italianë (AIA) ka vendosur të pezullojë gjyqtarin Mariani, asistentin Bindoni dhe arbitrin e VAR-it, Marini.

Shkak u bë penalltia e dhënë për Napolin pas një kontakti mes Mkhitaryan dhe Di Lorenzos, që më vonë u konsiderua i gabuar.

Sipas vlerësimit të AIA-s, gabimi ishte “i trefishtë”: Mariani, që ishte pozicionuar mirë, fillimisht e la lojën të vazhdonte, asistenti Bindoni e bindi ta ndryshonte vendimin dhe VAR që nuk ndërhyri për ta korrigjuar situatën.

Përgjegjësitë janë ndarë në 30% për Marianin, 60% për Bindonin dhe 10% për VAR-in.

Pezullimi më i gjatë i takon Bindonit, i cili pritet të mos rikthehet në detyrë deri në fund të nëntorit. Mariani është hequr nga lista e ndeshjeve të javës së 9-të dhe pritet të mungojë edhe në xhiron e ardhshme, për t’u rikthyer më pas ndoshta në Serie B ose si VAR.

Ky nuk është incidenti i parë për gjyqtarin Mariani, i cili edhe më parë ka qenë në qendër të debatit për vendime të diskutueshme në ndeshje të rëndësishme të Serie A./S.K/KP/

Pas humbjes së tretë radhazi, pozita e Igor Tudor në stolin e Juventusit është vënë seriozisht në pikëpyetje. Disfata ndaj Lazios në “Olimpico” ka përkeqësuar krizën e bardhezinjve, të cilët më herët kishin humbur edhe ndaj Como-s (2-0) dhe Real Madridit (1-0) në Ligën e Kampionëve.

Sipas mediave italiane, ndeshja e radhës kundër Udineses do të jetë shansi i fundit për trajnerin kroat.

Në fillim ishte parashikuar që drejtuesit ta gjykonin në katër ndeshjet e ardhshme, por rezultatet negative mund të sjellin një vendim të menjëhershëm.

Tudor, i cili ka kontratë deri në vitin 2027, kritikohet për mungesë ekuilibri dhe për faktin se ekipi nuk ka një identitet të qartë loje. Ndryshimet e shumta taktike dhe rotacionet në formacion kanë krijuar paqartësi në skuadër.

Ndërkohë, drejtuesit e Juventusit kanë nisur të shqyrtojnë emrat e mundshëm për zëvendësim. Në listë gjenden Luciano Spalletti, Roberto Mancini dhe Raffaele Palladino si opsione italiane, ndërsa nga jashtë përmenden Terzic, Rose, Xavi dhe Southgate.

E sigurt mbetet se Thiago Motta, ish-trajner i Juventusit, nuk do të rikthehet. Vendimi përfundimtar për të ardhmen e Tudorit pritet pas ndeshjes me Udinesen./S.K/KP/

Eventi kryesor i natës në Abu Dabi midis Tom Aspinall dhe Cyril Gane për titull në peshat e rënda UFC ishte veçanërisht e vështirë për kampionin britanik.

Dueli u ndërpre qysh në rundin e parë pasi Gane goditi Aspinall në sy, gjë që çoi në reagime kontroverse.

Pas disa minutash rikuperimi, Aspinall i pranoi gjyqtarit dhe mjekut se nuk mund të shihte me njërin sy, andaj ndeshja u shpall pa garë dhe pritet një ndeshje rikthimi në të cilën Tom do të mbrojë rripin e tij të kampionit.

Aspinall donte të largohej nga ringu sa më shpejt për të marrë ndihmë mjekësore.

Pavarësisht kësaj, komentuesi i UFC-së, Daniel Cormier, këmbënguli për një intervistë në tetëkëndësh, gjatë së cilës turma në sallë filloi t’i fishkëllente kampionit. Kjo e zemëroi britanikun, i cili thirri turmën para se të largohej.

Situata u përkeqësua në konferencën për shtyp, ku shefi i UFC-së Dana White tha se “Aspinall nuk donte të luftonte”, duke sugjeruar se kampioni ishte dorëzuar.

Edhe pse Aspinall u dërgua në spital, legjenda e UFC-së dhe anëtari i Sallës së Famës, Chael Sonnen (48), tha se ai duhet ta kishte vazhduar luftën pavarësisht lëndimit.

“Një goditje në sy është e paligjshme, por luftimi me njërin sy është shumë i zakonshëm. Nëse je kampion bote në peshat e rënda, ndonjëherë duhet të luftosh me njërin sy dhe është diçka që duhet ta kapërcesh”, tha ish-boksieri, i cili e filloi karrierën në MMA më 1997, në kategoritë e peshave të lehta dhe të mesme./S.K/KP/