Sport

​Basketboll/ Fillojnë ethet e Kupës së Kosovës

Published

on

Nga kjo mesjavë fillojnë ndeshjet e Kupës së Kosovës në basketboll te meshkujt. Shorti ishte hedhur pas shtatë xhirove të zhvilluara sipas sistemit të Bergerit.

Përballja kryesore do të zhvillohet ndërmjet rivalëve të vjetër, Pejës dhe Sigal Prishtinës. Takimet ndërmjet këtyre dy skuadrave gjithmonë kanë qenë interesante dhe kështu pritet edhe të mërkurën mbrëma. Po ashtu të mërkurën zhvillohet sfida ndërmjet Vëllaznimit dhe Golden Eagle Yllit.

Të enjten do të përballen Proton Cable Prizreni me Trepçën, si dhe Bora me Bashkimin.

Javën e ardhshme do të zhvillohen ndeshjet e kthimit, ku do të përcaktohet se kush do të kalojë në gjysmëfinale.

Në këtë edicion të kësaj gare, edhe gjysmëfinalet zhvillohen me sistem vajtje-ardhje, ndërsa finalja zhvillohet në shkurt të vitit të ardhshëm.

KUPA E KOSOVËS (ÇEREKFINALET)

E mërkurë

19:00 Peja – Sigal Prishtina

19:00 Vëllaznimi – Golden Eagle Ylli

E enjte

19:00 Proton Cable Prizreni – Trepça

19:00 Bora – Bashkimi

Lajmet

​FIFA po e mendon një propozim që mund të ndryshojë futbollin

Published

on

Edicioni i 100-vjetorit të Kupës së Botës, që do të zhvillohet në vitin 2030, mund të sjellë një risi të madhe me pjesëmarrjen e 64 ekipeve.

Sipas The Athletic, ideja tashmë nuk është vetëm një spekulim, por një propozim konkret i diskutuar në një takim të mbajtur në selinë amerikane të FIFA-s në Trump Tower, New York.

Në samit morën pjesë presidenti i FIFA-s, Gianni Infantino, sekretari i përgjithshëm Mattias Grafstrom dhe një delegacion i nivelit të lartë nga Amerika e Jugut, i kryesuar nga presidenti i CONMEBOL-it, Alejandro Domínguez.

Të pranishëm ishin gjithashtu presidentët e Paraguait dhe Uruguait, si dhe krerët e federatave të futbollit të Argjentinës, Paraguait dhe Uruguait.

Presidenti argjentinas Javier Milei mungoi për shkak të një takimi me Donald Trump.

Zgjerimi mendohet si një mënyrë për të nderuar edicionin e parë të Botërorit, i zhvilluar në Uruguaj më 1930, duke i dhënë më shumë peshë vendeve të Amerikës së Jugut- Argjentinës, Paraguait dhe Uruguait që aktualisht parashikohet të organizojnë vetëm nga një ndeshje hapëse, përpara se turneu të zhvendoset në Spanjë, Portugali dhe Marok.

Megjithëse po shqyrtohet për herë të parë në mënyrë zyrtare, që ideja është hedhur që në mars nga kreu i Federatës së Uruguait, Ignacio Alonso, në një mbledhje të Këshillit të FIFA-s.

Por jo të gjithë e shohin pozitivisht këtë mundësi. Presidenti i UEFA-s, Aleksander Ceferin, e ka cilësuar si “të tmerrshme”, ndërsa kreu i CONCACAF-it, Victor Montagliani, shprehu rezerva duke kujtuar se ende nuk është zhvilluar as Botërori i parë me 48 ekipe.

Vendimi final do të varet nga balancimi i interesave sportive, financiare dhe organizative mes FIFA-s dhe konfederatave kontinentale.

Nëse miratohet, Botërori i vitit 2030 do të hyjë në histori jo vetëm për jubileun e tij të 100-vjetorit, por edhe si turneu më i madh ndonjëherë në futbollin botëror./S.K/KP/

Continue Reading

Lajmet

​Messi shkëlqen me dy gola, Inter Miami siguron fazën eliminatore në MLS

Published

on

Lionel Messi ishte protagonist absolut i Inter Miamit në fitoren bindëse 4-0 ndaj New York City FC, duke e dërguar skuadrën nga Florida zyrtarisht në fazën “play-off” të Kupës MLS.

Superylli argjentinas shënoi dy gola dhe asistoi në një tjetër, duke e çuar në 24 numrin e golave këtë sezon në 23 ndeshje, dy më shumë se rivali Denis Bouanga i LAFC, duke kryesuar kështu listën e golashënuesve të kampionatit amerikan.

Luis Suarez u rikthye pas një pezullimi prej tre ndeshjesh dhe gjeti rrugën e rrjetës nga penalltia, ndërsa Baltazar Rodriguez shënoi golin e parë për Miamin në minutën e 43-të, pas një aksioni të kombinuar me Messin dhe Sergio Busquets.

Messi vulosi suksesin me dy perla personale në minutat e 74-t dhe 86-të, duke treguar sërish klasin e tij në stadiumin “City Field” të Nju Jorkut.

Miami aktualisht mban vendin e tretë në Konferencën Lindore, pesë pikë pas liderit Philadelphia, por me dy ndeshje më pak të luajtura, duke mbetur ende në garë për trofeun “Supporters’ Shield”.

Messi, që do të luajë për herë të dytë në “play-off”-et e MLS, ka shënuar dhe asistuar në tri ndeshje radhazi, duke forcuar kandidaturën e tij për çmimin Lojtari më i Vlefshëm i vitit 2025./S.K/KP/

Continue Reading

Lajmet

​Superliga e Kosovës sjell sot përballje të forta

Published

on

Superliga e Kosovës në futboll sot rikthehet me pesë duele interesante në kuadër të javës së gjashtë, ku nga ora 15:00 do të zhvillohen katër ndeshje.

Ndeshjet që do të zhvillohen janë: Dukagjini- Llapi, Ballkani-Drita, Gjilani-Drenica dhe Malisheva- Ferizaj.

Spektakli i futbollit sonte do të mbyllet në mbrëmje me derbin e kryeqytetit, ku nga ora 20:15 Prishtina do të përballet me Prishtinën e Re.

Këto përballje pritet të kenë ndikim të madh në renditjen e Superligës, duke shtuar rivalitetin në garën për kreun dhe mbijetesën.

Aktualisht, Prishtina është lidere e tabelës me 10 pikë, aq sa ka edhe Dukagjini në vendin e dytë./S.K/KP/

Continue Reading

Lajmet

Arteta tregon kur rikthehet Havertz

Published

on

By

Trajneri i Arsenalit, Mikel Arteta, ka dhënë një përditësim inkurajues për Kai Havertz, duke e përshkruar mesfushorin si një “shembull të ndryshëm” ndërsa vazhdon të punojë për të rifituar formën e tij të plotë fizike.

26-vjeçari ka qenë jashtë fushave që nga mesi i gushtit për shkak të një dëmtimi në gju që pësoi në stërvitje, vetëm pak ditë pas fitores 1-0 të Arsenalit ndaj Man United në ndeshjen e parë .

Havertz nuk pritet të rikthehet në fushë deri në fund të nëntorit, por Arteta ka thënë se ai mund të kthehet brenda “javëve” dhe jo brenda “muajve”.

“Me Kai-n, e dimë se do të jenë muaj me të. Nuk e di nëse mund të jenë javë, nuk i dihet kurrë sepse ky është Kai dhe ai është një ekzemplar tjetër”, u tha trajneri gazetarëve përpara ndeshjes së tyre në Kupën e Ligës me Port Vale.

“Na mungon vërtet. Shpresojmë që ai të kthehet, dhe do të kthehet edhe për një kohë të gjatë, kështu që është shumë e rëndësishme të kujdesemi për atë gju. Deri më tani, ai po përparon mjaft mirë.”

“Topçinjtë” do të luajnë ndeshjen e radhës kundër Newcastle të dielën, më 28 shtator./D.B/KP

Continue Reading

Të kërkuara