Guvernatori i Bankës Qendrore të Kosovës, Ahmet Ismaili deklaroi se rregullorja e BQK-së e cila përcakton që euroja të jetë valuta e vetme që mund të përdoret për pagesa me para të gatshme në gjithë vendin ka krijuar efekte pozitive.

Në një konferencë për media të enjten, derisa ka prezantuar aktivitet e këtij institucioni për vitin 2024, ka theksuar se unifikimi i sektorit dhe ndërprerja e financimeve të paligjshme ka kontribuar dukshëm në këtë drejtim.

“Rregullorja është në fuqi, i ka krijuar efektet e veta pozitive për krejt sektorin. Besoj që i kemi përafruar vlerësimet e ardhshme të pritshme sa i përket Kosovës, të mos harrojmë se me anëtarësim në Këshill të Evropës do t’i nënshtrohemi vlerësimit i cili është një vlerësim që i vendos shtetet në lista të zezë ose jo. Dhe unifikimi i sektorit dhe ndërprerja e financimeve të pa ligjshme ka kontribuar dukshëm, substancialisht në këtë drejtim”, tha ai.

BQK-ja kishte fuqizuar rregulloren e re më 1 shkurt të viti. Ajo e përcakton euron si valutë të vetme për kryerjen e pagesave me para të gatshme.

Disa komuna të vendit po ballafaqohen me reduktime të energjisë elektrike ditëve të fundit. Nga kompania Kosovare për Distribuim me Energji Elektrike në Kosovë (KEDS) kanë thënë se për shkak të konsumit të lartë të rrymës, po shkaktohen ngarkesa në rrjetin elektroenergjetik të KEDS-it në disa vende në Kosovë, duke çuar në djegie të tyre në disa raste.

Zëdhënësi i KEDS-it, Lulzim Krasniqi thekson për KosovaPress se aktualisht rajoni i Ferizajt po përballet me reduktime të energjisë elektrike. Ai thekson se për shkak të këtyre sfidave në rrjet dhe ngarkesave, furnizimi me energji elektrike është i kufizuar. Sipas tij, konsumi këto ditë ka shkuar deri në 1.500 megavat orë energji elektrike.

Krasniqi ka thënë po ashtu se rrjeti shpërndarës i KEDS-it është për furnizim me energji elektrike shtëpitë dhe bizneset, por për ngrohje.

“Aktualisht po vazhdon të mbetet sfidë rajoni i Ferizajt, për shkak të këtyre mbi ngarkesave, ku furnizimi i energjisë elektrike në disa lokacione është i kufizuar. Megjithatë, sipas informatave së shpejti atje do të vihet në funksion, nënstacioni i ri, me të cilin besojmë se do të zgjidhet kjo sfidë për rajonin e Ferizajt. KEDS, apelon për mbështetje të konsumatorëve dhe i fton ata që të kursejnë sa më shumë energjinë elektrike… Po shkon deri në 800 MË në orë, por kërkesa është tepër e lartë dhe diferenca në mes të prodhimit dhe konsumit po importohet…00:49 Një numër i konsumatorëve i caktuar i tyre e përdorin energjinë elektrike si të vetmin burim për ngrohje e çka po qon tek ngarkesat e mëdha në rrjet. Në fakt rrjeti jonë shpërndarës nuk është i paraparë për ngrohje, është i projektuar për të furnizuar me energji elektrike shtëpitë, bizneset, në bazë të kërkesave, por jo edhe për ngrohje… Konsumi ka shkuar deri në 1 mijë e 500 megavat për orë”, ka thënë Krasniqi.

Anëtari i Kryesisë së LDK-së Visar Azemi ka kritikuar Qeverinë e vendit se nuk ka vizion dhe as plan për zgjedhjen e problemit për furnizim me energji elektrike.

“Çdo hapësirë tjetër që lejohet nga qeveria, që ka të bëjë me tregti me Serbinë përmes Martinit dhe Nagipit është një dështim i plotë. Qeveria për katër vite ka treguar se nuk ka as vizion dhe as plan të zgjidhjes së problemit të energjisë elektrike. Madje, ka vendosur njerëzit më jo profesional në udhëheqjen e institucioneve të sektorit të energjisë për t’i dështuar ato dhe për ta degraduar tërë këtë sektor”, thotë ai.

Edhe Naim Bujupi ekspert i energjisë ka thënë se reduktimet e energjisë elektrike vijnë kryesisht nga rritja e kërkesës për furnizim me energji elektrike, kryesisht për ngrohje.

“Arsyet për ndërprerje janë rritja e kërkesës për furnizim me energjie elektrike në rrjetin e distribucionit, kryesisht janë të mbingarkuara linjat dhe konsumatorët në rrjetin distributiv dhe kjo ka shkaktuar ndërprerje të furnizimit me energji elektrike në shumë pjesë të Republikës së Kosovës. Kjo ndodh për shkak se shumë qytetarë e shfrytëzojnë energjinë elektrike për ngrohje, tashmë jemi dëshmitarë që edhe shumë mërgimtarë vijnë në Kosovë dhe shumica e tyre përdorin energjinë elektrike për ngrohje. Arsyeja tjetër është se viteve të fundit kemi një tendencë rritëse të përdorimit të pompave termike dhe klimave inverter që shfrytëzohen për ftohje dhe ngrohje dhe kjo ka bërë që të mbingarkohet rrjeti tejmase në nivelin distributiv”, thekson ai.

Me uljen e temperaturave në ditët e fundit janë shtuar edhe reduktimet e energjisë elektrike në vend, sidomos në Fushë-Kosovë, Rahovec dhe në Pejë.

Mbi 3 mijë pjesëtarë të Policisë së Kosovës (PK) iu janë nënshtruar kontrolleve mjekësore sistematike. Ndërkaq, janë kryer mbi 2 mijë e 100 kontrolle mjekësore psikologjike për rekrutët e rinj të Policisë së Kosovës. Këto shërbime janë kryer në kuadër të Marrëveshjes së bashkëpunimit mes PK-së dhe Shërbimit Spitalor Klinik Universitar të Kosovës (SHSKUK) për shërbime mjekësore dhe psikologjike të personelit policor dhe rekrutëve.

Në një konferencë të përbashkët për media mes Policisë së Kosovës dhe Shërbimit Spitalor Universitar të Kosovës u theksua se ofrimi i shërbimeve mjekësore specialistike në kuadër të kësaj marrëveshjeje ka ndikuar në ruajtjen e mirëqenies shëndetësore për të gjithë të punësuarit e PK-së.

Drejtori i Qendrës Klinike Universitare të Kosovës, Osman Hajdari tha se janë të gatshëm të ofrojnë këto shërbime edhe në vitet vijuese si dhe për të rritur nivelin e shërbimeve.

“Ajo se çfarë është më e veçantë e vitit 2024 është se për 150 për qind kemi shtim të shërbimeve shëndetësore për pjesëtarët e Policisë së Kosovës. Mbi 3 mijë pjesëtarë të Policisë së Kosovës iu kanë nënshtruar kontrolleve sistematike. Si Shërbim Spitalor në nivel të Kosovës me të gjitha organet e sigurisë me të cilat kemi marrëveshje bashkëpunimi dhe ofrimin e këtyre shërbimeve në këtë rast edhe Policinë e Kosovës, jemi të gatshëm për të ofruar këto shërbime edhe në vitet vijuese, për të rritur edhe nivelin e shërbimeve. Përpos një memorandumi që e kemi të dakorduar ne jo rrallë herë kemi dalë jashtë këtij memorandumi për të ofruar për nevojat dhe për obligime ose detyra specifike të cilat kanë qenë kërkesa të departamentit të Policisë së Kosovës”, tha Hajdari.

Ndërkaq, drejtoresha e Departamentit të Shërbimeve Shëndetësore në Policinë e Kosovës, Lendita Kajtazi vlerësoi se kjo marrëveshje mes PK-së dhe SHKUK-së ka rezultuar e suksesshme. 

“Marrëveshja e bashkëpunimit mes Policisë së Kosovës dhe Shërbimit Spitalor Klinik Universitar të Kosovës për ofrimin e shërbimeve mjekësore, psikologjike për personelin policor dhe rekrutët vlerësojmë se ka rezultuar me rezultat jashtëzakonisht të mirë. Bazuar në natyrën e punës në ndikim, nën presion psikofizik të personelit policor për të garantuar një siguri të përgjithshme në vend, ofrimi i shërbimeve mjekësore specialiste në kuadër të QKUK-së dhe të spitaleve rajonale të SHKUK-së ka ndikuar në ruajtjen e mirëqenies shëndetësore për të gjithë të punësuarit e Policisë së Kosovës, duke ndikuar kështu në rritjen e efikasitetit, në përmbushjen e detyrave zyrtare të tyre për të ruajtur sigurinë e përgjithshme në Republikën e Kosovës”, potencoi Kajtazi.

Kajatazi potencoi se përveç kontrollimit mjekësor sistematik, janë realizuar edhe testime mjekësore periodike për të gjithë pjesëtarët e Njësive të Specializuara të Policisë së Kosovës.

Ndër të tjera, ajo tregoi edhe numrin e pjesëtarëve që kanë marrë këto shërbime.

“Përveç kontrollimit mjekësor sistematik kemi arritur të realizojmë testime mjekësore periodike për të gjithë pjesëtarët e njësive të specializuara të Policisë së Kosovës. Në raportin përmbledhës nëntor 2023 dhe dhjetor 2024 bazuar në memorandum mirëkuptimi në fjalë kemi arritur të realizojmë 3 mijë e 78 kontrollime mjekësore sistematike. Po ashtu kemi arritur kontrollime mjekësore psikologjike për rekrutët e rinj të PK-së, 2 mijë 148. Kontrollime mjekësore psikologjike për rekrutët, minoritetet 170. Po ashtu, pjesëtarë të Departamentit të Njësive të Specializuara të Policisë së Kosovës kanë kryer testime mjekësore psikologjike në QKUK 549. Ekzaminime mjekësore të avancuara kanë qenë të realizuara për punonjësit e Policisë ku ka pasur nevojë dhe rekomandime”, tha Kajtazi.

Ndërkaq, në kuadër të pyetjeve nga gazetarët, drejtori i QKUK-së, Osman Hajdari tha se janë me prioritet të gjitha kategoritë e sistemit të sigurisë, duke shtuar se në këtë rast anashkalohen edhe listat e pritjes.

“Jo vetëm për pjesëtarët e Policisë së Kosovës, por edhe për pjesëtarët e FSK-së dhe kategoritë e tjera të sistemit të sigurisë në Kosovë, natyrisht që janë me prioritet dhe anashkalohet lista e pritjes sidomos tek rastet urgjente”, theksoi Hajdari.

Marrëveshja e bashkëpunimit mes PK-së dhe SHSKUK-së për shërbime mjekësore dhe psikologjike të personelit policor dhe rekrutëve është nënshkruar në nëntor të vitit 2023.

Gjykata Themelore në Prishtinë ka dënuar me 15 vjet burgim Çedomir Aksiqin për krime lufte të kryera në komunën e Shtimes.

Gjykimi ndaj tij është zhvilluar në mungesë dhe ai është dënuar për krime që, sipas aktakuzës, janë kryer në periudhën janar-maj 1999, raporton Betimi për Drejtësi.

Në nëntor të vitit 2023 nisi gjykimi ndaj Arsiqit.

Ky është rasti i parë i një gjykimi të tillë, pasi gjykimet në mungesë lejohen me Kodin e ri të Procedurës Penale të Republikës së Kosovës.

Në seancën e parë, Prokuroria tha se kishte shfrytëzuar të gjitha mundësitë ligjore që Arsiq të ishte i pranishëm në gjykatë, por nuk ishte arritur.

Sipas aktakuzës, që u ngrit majin e vitit të kaluar, Çedomir Aksiq, së bashku me pjesëtarë të tjerë të forcave serbe, kishte urdhëruar dëbimin e banorëve të lagjes në pikën e quajtur “Kodra e Gështenjave”, vend midis fshatrave të Mulapolc, Reçak dhe Petrovë, në komunën e Shtimes.

Në aktakuzë thuhet se ata më pas kishin djegur shtëpitë e të dëmtuarave duke u shkaktuar kështu dëme morale dhe materiale.

Në vendin e quajtur “Lugu i Neshës”, në Petrovë të Shtimes, Çedomir Aksiq është akuzuar se e kishte ekzekutuar një person, familjen e të cilit paraprakisht e ndaluar.

Gjithashtu, sipas aktakuzës, Aksiq kishte marrë pjesë në vrasjen e Hajriz Brahimit, Hakin Muratit, Sabri Muratit, Arif Muratit, Ahmet Mustafes, Sadik Mujotës, Skënder Halitit dhe Hanumshahe Mujotës, në Reçak.

Sipas aktakuzës, Aksiq është i lindur në Shtime, por adresa e tij aktuale është në Serbi.

Ndryshe, sipas Kodit të Procedurës Penale gjykimet në mungesë parashihen të mbahen në rastet kur i akuzuari heq dorë vetë nga drejta për të qenë i pranishëm në shqyrtimet gjyqësore.

Një gjykim i tillë mund të mbahet kur Prokuroria dhe Gjykata t’i kenë shtjerrë të gjitha mjetet për sigurimin e prezencës së të akuzuarit.

Sipas Kodit të Procedurës Penale, neni 303, gjyqtari ose kryetari i trupit gjykues mban seancë dëgjimore për të përcaktuar përse i akuzuari mungon dhe për të vlerësuar çdo sqarim apo dëshmi, nëse i akuzuari ka vendosur vullnetarisht të mungojë në gjykim.

Aty thuhet, po ashtu, se për marrjen e këtij vendimi, gjyqtari ose kryetari i trupit gjykues merr parasysh nëse janë bërë përpjekje të arsyeshme për ta gjetur të akuzuarin.

Por, gjykime të këtij lloji më herët ishin kritikuar nga Fondi për të Drejtën Humanitare në Prishtinë. Nga ky Fond kanë argumentuar se fillimisht viktimat mund të jenë të kënaqura me drejtësinë, por më pas ata zhgënjehen pasi edhe kur ndonjë i akuzuar dënohet, më pas e kuptojnë se ai nuk do të arrestohet.

Në luftën e viteve 1998-1999 mbi 13.000 civilë besohet se janë vrarë në Kosovë, ndërsa mijëra të tjerë janë zhdukur. Të pagjetur, edhe sot e kësaj dite, mbeten mbi 1.600 persona – shumica prej të cilëve shqiptarë./REL/