Banka Botërore ka miratuar sot një financim shtesë prej 29.5 milionë dollarë për projektin e përmirësimit të sektorit të shëndetësisë në Shqipëri.

Ky financim do të ndihmojë në adresimin e dëmeve të shkaktuara në objekte të kujdesit shëndetësor nga tërmeti i nëntorit të vitit 2019 si dhe do të përmirësojë procesin e modernizimit dhe reformat në disa shërbime spitalore publike, raporton atsh.

Shqipëria ka bërë progres në drejtim të rritjes së jetëgjatësisë të popullsisë së saj, por sistemi shëndetësor i vendit duhet të përmirësohet ndjeshëm për të përmbushur nevojat aktuale shëndetësore si rezultat i një periudhe të gjatë tranzicioni demografik dhe epidemiologjik.

Për këtë qëllim, Qeveria shqiptare ka ndërmarrë reforma për menaxhimin, planifikimin dhe financimin e shërbimeve shëndetësore publike. Projekti i Bankës Botërore për Përmirësimin e Sektorit të Shëndetësisë ka luajtur rol kyç në këtë drejtim, duke mbështetur rehabilitimin e tre spitaleve, zbatimin e Sistemit të Informacionit Shëndetësor në katër spitale rajonale dhe rindërtimin e spitalit të Laҫit, i cili u shkatërrua nga tërmeti i nëntorit 2019.

Dëmet e shkaktuara nga tërmeti në disa spitale e kanë bërë të domosdoshme ndërhyrjen urgjente për përmirësimin e infrastrukturës dhe furnizimin e tyre me pajisje të reja mjekësore.

Financimi shtesë do të ndihmojë në përballimin e këtyre nevojave, dhe më konkretisht për rehabilitimin e Spitalit të Krujës, Spitalit Rajonal të Lezhës dhe disa spitaleve e njësive në Qendrën Spitalore Universitare Nënë, Spitalit Psikiatrik, Departamentit të djegies dhe kirurgjisë plastike, dhe Spitalit të përgjithshëm pediatrik. Gjithashtu, do të furnizohen me pajisje të reja mjekësore Spitali i Pediatrisë dhe Spitali i Laçit.

Menaxher i Zyrës së Bankës Botërore për Shqipërinë, Emanuel Salinas ka thënë se ky rehabilitim i infrastrukturës dhe furnizimi me pajisje të reja mjekësore për spitalet rajonale do të shërbejë në aftësimin e tyre për ofrimin e shërbimeve cilësore.

“Rehabilitimi i infrastrukturës kryesore dhe furnizimi me pajisje të reja mjekësore për spitalet rajonale dhe ato bashkiake do të shërbejë për aftësimin e tyre për ofrimin e shërbimeve cilësore dhe eficiente të kujdesit shëndetësor për qytetarët shqiptarë”, ka thënë Salinas,

Financimi shtesë po mbështet edhe zbatimin e Sistemit të Informacionit Shëndetësor në të gjithë rrjetin e spitaleve rajonale, i cili do të bëjë të mundur një koordinim dhe integrim më të mirë të shërbimeve me qëllim përmirësimin e vazhdimësisë dhe cilësisë së kujdesit shëndetësor.