Sport

Ballkani historik, regjistron fitoren e parë në fazën e grupeve të Ligës së Konferencës

Ballkani e ka mposhtur si mysafir skuadrën e Sivassporit.

Published

2 years ago

October 7, 2022

Betim Gashi

Kampioni i Kosovës, Ballkani ka arritur sot të shkruajë historinë përsëri, ku është bërë skuadra e parë vendore e cila ka regjistruar një fitore në fazën e grupeve të një gare evropiane.

Ballkani e ka mposhtur si mysafir skuadrën e Sivassporit, fitore kjo e para në fazën e grupeve të Ligës së Konferencës.

Pas plot 98 minutave lojë të zhvilluara, në stadiumin “Yeni 4 Eylül” janë shënuar shtatë gola në ndeshjen mes Sivassporit e Ballkanit, ku ky i fundit mposht skuadrën turke me shifrat 4:3.

Fillimisht, rezultatin e zhbllokoi Fredrik Ulvestad, i cili qysh në minutën e parë të kësaj përballje kalon vendasit në epërsi prej 1:0.

Ndërkaq, Ballkani u rikthye në lojë përmes super golit të Armend Thaqit, i cili barazoi shifrat në 1:1 në minutën e 20’ të ndeshjes.

Por, suharekasit nuk u ndalën me kaq, ku edhe e përmbysën rezultatin kundër Sivassporit përmes golit të Arbër Potokut, i cili kalon Ballkanin në epërsi prej 2:1 në minutën e 31’.

Pjesën e dytë e nisi më mirë kampioni kosovar, ku e gjeti edhe golin e tretë të ndeshjes përmes Meriton Korenicës në minutën e 66’.

Ndërkaq, nëntë minuta më vonë, saktësisht në minutën e 75’, Sivasspori e gjeti golin e dytë të ndeshjes përmes Erdogan Yesilyurt, kurse ky i fundit e barazoi rezultatin në 3:3 për vendasit në minutën e 90+1’ shtesë.

Heroi i ndeshjes së sotme për Ballkanin ishte Ermal Krasniqi, i cili ia siguroi tre pikët e plota skuadrës së tij duke shënuar golin e fundit të ndeshjes, dhe të katërtin për Ballkanin në minutën e 90+4’ shtesë.

Me pikët e reja, Ballkani tani zë vendin e dytë në Grupin G me katër pikë të arkëtuara, aq sa ka edhe Sivasspori në vendin e tretë.

Rezultati final është 4:3 në favor të Ballkanit.

Sport

Barcelona eliminon Atleticon dhe shkon në finalen me Realin, Flick: Ëndërrojmë për tripletën!

Published

39 minutes ago

April 3, 2025

UBT NEWS

Barcelona ka siguruar kalimin në finalen e Kupës së Mbretit, duke mposhtur Atletico Madrid në “Metropolitano”. Fitorja e Barcelonës ka qenë një rezultat i shkëlqyer për trajnerin Hansi Flick, i cili do ta drejtojë ekipin katalanas në finalen e tij të dytë.

Pas ndeshjes, Flick u shpreh shumë i kënaqur me paraqitjen e ekipit: “Ishte një ndeshje me dy pjesë të ndryshme. Në pjesën e parë dominuam, ndërsa në të dytën u mbrojtëm mirë. Të gjithë mund të jenë krenarë për këtë ekip”.

Me këtë fitore, Barcelona ka shtuar shpresat për tripletën këtë sezon. Ata janë në vendin e parë në La Liga, kanë siguruar finalen e Kupës së Mbretit dhe janë ende të pranishëm në çerekfinalet e Champions League. Sidoqoftë, Flick ka paralajmëruar se rruga drejt suksesit është ende e gjatë dhe kërkon përqendrim të vazhdueshëm. “Ëndërrimi është i lejuar, por duhet të qëndrojmë të përqendruar,” tha ai. “Do të kthehemi vonë në shtëpi dhe do të duhet të stërvitemi për ndeshjen kundër Betisit.”

Tifozët e Barcelonës janë të emocionuar nga mundësitë e tripletës, ndërsa ekipi i Flick ka treguar një nivel të lartë loje dhe angazhimi këtë sezon.

Sport

Messi dhe Inter Miami pësojnë humbjen e parë të sezonit

Published

42 minutes ago

April 3, 2025

UBT NEWS

Në një ndeshje emocionuese të Kupës së Kampionëve të CONCACAF, Los Angeles FC shkaktoi humbjen e parë të sezonit për Lionel Messin dhe Inter Miami, duke fituar 1-0 në ndeshjen e parë çerekfinale të turneut. Goli i vetëm i takimit erdhi në minutën e 57-të, kur Nathan Ordaz, një lojtar i kombëtares së El Salvadorit, shënoi pas një goditje të fuqishme që kaloi portierin e Miamit, Oscar Ustari.

Inter Miami, që kishte mbetur i pamposhtur në nëntë ndeshje radhazi në të gjitha kompeticionet, arriti në Los Angeles si skuadra më e formë e Major League Soccer. Pas një pjese të parë të kujdesshme, LAFC rriti ritmin pas pushimit, duke bërë më shumë presion dhe duke arritur të mposhtte ekipin e Messit. Në minutën e 54-t, Ryan Hollingshead humbi një mundësi të artë, por tre minuta më pas Ordaz shfrytëzoi një moment të dobët të Sergio Busquets për të shënuar golin vendimtar.

Messi, që u rikthye si titullar pas një dëmtimi dyjavor, nuk arriti të linte ndikim të madh në ndeshje, ndërsa LAFC dukej më i rrezikshëm, para një turme entuziaste prej 22,207 tifozësh. Mes tyre ndodheshin emra të njohur si Stephen Curry, David Beckham dhe trajneri i kombëtares së Argjentinës, Lionel Scaloni. Ndeshja e kthimit do të zhvillohet javën e ardhshme në Florida./UBTNews/

Sport

S’ndalet Ylli, gjunjëzon edhe Vëllaznimin dhe e largon nga gara për pozitën 4

Published

47 minutes ago

April 3, 2025

Albina Zeneli

E pesta radhazi për Golden Eagle Yllin!

Kjo skuadër po e vazhdon formën fantastike në ProCredit Superligën e Kosovës në basketboll, duke e mposhtur sonte edhe Vëllaznimin në palestrën “13 Qershori” në Suharekë, 86-63.

Seria pozitive e “Xhebrailave” nisi ndaj kampionëve aktualë të Trepçës (82-74), vazhdoi në kryeqytet kundër Prishtinës (62-85), në Suharekë e mposhtën Pejën (72-64) e në Prizren e mundën Bashkimin (78-84).

Nga ana tjetër, gjakovarët që triumfuan në Ligën Unike, tashmë e kanë humbur luftën për pozitën e katërt në kampionat, për të cilën Ylli mbetet në garë vetëm me Pejën.

Basketbollisti më i mirë i ndeshjes ishte Jalen Nesbitt me 19 pikë, 11 kërcime e shtatë asistime. Te mysafirët lojtari më i dalluar ishte Antwan Walker me 21 pikë e 3 kërcime. 24-11 përfundoi 10 minutëshi fillestar, derisa edhe perioda e dytë i takoi ish-kampionëve të Kosovës, 28-22, për të shkuar në pushim me shifrat 52-33.

Aq pikë sa i realizoi Vëllaznimi në çerekun e dytë, të dyja ekipet i shënuan në të tretin, që u mbyll 11-11, kurse edhe i fundit i takoi fituesve të kësaj përballje, 23-19.

Suharekasit me 41 pikë, tani gjenden në vendin e katërt në tabelë, por atë mund ta ruajnë vetëm nëse sonte Peja humb nga Trepça në “Karagaç”, në të kundërtën pejanët e rimarrin këtë pozitë, derisa epilogu përfundmitar mbetet pastaj të vendoset në xhiron e fundit.

Sport

Dardanet fillojnë përgatitjet për ndeshjen me Maqedoninë e Veriut

Published

2 hours ago

April 3, 2025

UBTNews

Kombëtarja e Kosovës në konkurrencën e femrave ka nisur grumbullimin shtatëditor për ndeshjen e tretë në kuadër të Grupit C6 në Ligën e Kombeve kundër Maqedonisë së Veriut.

Dardanet e nisën mbarë këtë edicion, duke shënuar fitore bindëse në Shkup me rezultat 4:0, por më pas pësuan humbje befasuese në Prishtinë ndaj Letonisë (0:1).

Me synimin për t’u rikthyer te fitorja, ekipi ynë ka nisur përgatitjet në Kampin Nacional të FFK-së, në kuadër të grumbullimit që do të zgjasë deri më 8 prill, kur edhe do të zhvillohet ndeshja.

Përzgjedhësi Sami Sermaxhaj ka theksuar se përkundër rezultatit bindës në ndeshjen e parë ndaj Maqedonisë së Veriut, sfida e ardhshme nuk do të jetë e lehtë.

Ai ka kërkuar seriozitet të plotë nga futbollistet dhe angazhim maksimal gjatë këtyre ditëve, me qëllim që ekipi të jetë në formë optimale për ndeshjen që do të zhvillohet në stadiumin “Fadil Vokrri”.

Futbollistet Erëleta Memeti dhe Donjeta Halilaj u shprehën optimiste për paraqitjen e ekipit, duke theksuar se Kosova do të japë maksimumin për ta fituar këtë ndeshje dhe për t’u kthyer në rrugën e fitoreve dhe për të ruajtur gjasat për sukses në Ligën C të Ligës së Kombeve.