Një ekspozitë unike me materiale nga periudha e krijimit të Krahinës Autonome të Korçës është çelur nga Shoqata e Koleksionistëve të Korçës në bashkëpunim me Shoqatën e Koleksionistëve të Shqipërisë, e mbështetur nga RTSH Korça.

Koleksionisti Mirgen Shamblli flet për foto historike, dokumente të kohës, por edhe pulla postare të kësaj periudhe.

“Është një ekspozitë fotografike, pullat e taksës dhe materiale dokumentare që tregojnë ngjarje të ndryshme të asaj kohe”, tha Shamblli.

Julian Demeti, kryetar i Shoqatës së Koleksionistëve të Shqipërisë, ka sjellë një koleksion të rrallë me kartëmonedha të kohës së Krahinës Autonome të Korçës, duke e prezantuar për publikun korçar.

“Unë kam sjellë kornizë me kartëmonedha të qeverisë së Krahinës së Korçës. Disa nga seritë ku janë kartëmonedhat e Shqipërisë vetëqeveritare”, tha Demeti.

Ekspozita ka pasqyruar një nga kapitujt më të rëndësishëm të historisë së qytetit, në një atmosferë të mbushur me histori, kuriozitet dhe emocion, ndërsa vizitorët panë nga afër dëshmi të një periudhe që ka lënë gjurmë të thella në identitetin korçar./atsh/UBT News/

Filmi më i ri artistik “Parku i Dorës”, me regji të Sabidin Aliut, do të ketë premierën më 11 dhjetor në Shkup, duke shënuar një moment të rëndësishëm për kinematografinë vendore.

Posteri zyrtar i publikuar tregon një dramë emocionale, të ngrohtë, e fokusuar te marrëdhëniet njerëzore, dhimbja dhe rimëkëmbja.

Një veçori që e bën këtë premierë edhe më të veçantë është pjesëmarrja e aktores së njohur Teuta Krasniqi, e cila për herë të parë luan në një film së bashku me vajzën e saj, Tara Krasniqi Muharremi.

Ky bashkëpunim unik nënë-bijë ngjall kureshtje të madhe tek publiku dhe krijon një dimension emocional të thellë në rrëfimin e filmit.

Në poster shfaqen edhe emra të tjerë të kastës, përfshirë Shkëlqim Islami, duke paralajmëruar një performancë të fuqishme të ansamblit.

Produksioni është realizuar nga Vizioni Plus Production, ndërsa tema dhe atmosfera e filmit premtojnë një histori të ndjeshme dhe artistikisht të përpunuar me kujdes.

Pas premierës në Shkup, “Parku i Dorës” pritet të shfaqet në të gjitha kinematë, duke u bërë një nga projektet më të komentuar të fundvitit. /A.Z/UBT News/

Liderja e opozitës venezueliane, Maria Corina Machado, e cila u shpall fituese e çmimit Nobel për Paqen për vitin 2025, nuk mori pjesë personalisht në ceremoninë e sotme të dorëzimit të medaljes.

Në emër të saj, medaljen dhe certifikatën prestigjioze të Nobelit e mori Ana Corina Sosa Machado, gjatë ceremonisë në bashkinë e Oslos.

Komiteti Norvegjez i Nobelit njoftoi në tetor se kishte zgjedhur Machadon për këtë çmim për angazhimin për të drejtat demokratike të popullit venezuelian, të cilit ia dedikoi këtë nderim.

Machado, e cila jeton në fshehtësi, është një kundërshtare e vendosur e presidentit autoritar të Venezuelës, Nicolas Maduro.

Për javë të tëra kishte pasur pasiguri nëse ajo do të mund të udhëtonte në mënyrë të sigurt për të marrë pjesë në ceremoninë në Oslo, që tradicionalisht zhvillohet më 10 dhjetor, përvjetori i vdekjes së Alfred Nobel, shpikësit suedez të dinamitit dhe themeluesit të çmimeve.

Instituti Nobel njoftoi në mëngjes se Machado nuk do të merrte pjesë, më pas u tha se pritet gjithsesi të mbërrijë në Oslo.

Në një intervistë të publikuar pak para fillimit të ceremonisë në llogarinë zyrtare të Nobelit në X, Machado konfirmoi se ishte rrugës për në Norvegji. Duke bërë këtë udhëtim, 58-vjeçarja rrezikon pasoja serioze pas kthimit në vendin e saj.

Prokuroria publike e kërcënoi se mund ta konsideronte Machadon si të arratisur nëse largohet nga vendi për shkak të hetimeve të ndryshme kundër saj. Ajo mund të përballet me arrestim ose ndalim të udhëtimit, gjë që ka pasoja për lëvizjen opozitare. /A.Z/UBT News/