Ministri i Jashtëm jordanez Ayman Safadi tha se ekziston një plan egjiptian i mbështetur nga arabët që synon të rindërtojë Rripin e Gazës pa zhvendosur banorët e tij palestinezë.

Sipas Ministrisë së Jashtme jordaneze, Safadi bëri këto komente gjatë takimit të tij me homologun francez Jean-Noel Barrot në Paris, në margjinat e një konference për Sirinë të organizuar nga Franca.

Deklarata citonte të dy diplomatët e lartë që kundërshtonin zhvendosjen e palestinezëve, duke kundërshtuar planin e presidentit amerikan Donald Trump për të marrë nën kontroll Gazën dhe për të zhvendosur banorët e saj në Jordani, Egjipt dhe gjetkë.

Dy ministrat e jashtëm diskutuan gjithashtu përpjekjet për të ruajtur armëpushimin në Gaza që filloi të zbatohet më 19 janar dhe për të rritur bashkëpunimin në ofrimin e ndihmave të mjaftueshme humanitare në të gjitha zonat e Rripit të Gazës.

Më herët këtë javë, Egjipti tha se po punon për një “vizion gjithëpërfshirës” në lidhje me rindërtimin e Gazës, të shkatërruar nga bombardimet e pamëshirshme të Izraelit për 15 muaj, pa zhvendosur palestinezët nga territori.

Jordania dhe Egjipti po përballen me presionin në rritje të SHBA-së për të pranuar palestinezët pasi Trump bëri thirrje për marrjen e kontrollit të Gazës dhe zhvendosjen e palestinezëve, një ide e refuzuar me forcë nga palestinezët dhe liderët arabë.

Trump priti Mbretin e Jordanisë Abdullah në Shtëpinë e Bardhë të martën dhe përsëriti këmbënguljen e tij që banorët e Gazës duhet të zhvendosen dhe enklava të kontrollohet nga SHBA dhe të rizhvillohet si një zonë turistike.

Presidenti i Ukrainës dha një paralajmërim të fortë, duke thënë se Rusia mund të jetë duke u përgatitur për një akt agresioni kundër anëtarëve të NATO-s që në vitin e ardhshëm. Duke folur në Konferencën e Sigurisë në Mynih të premten, Volodymyr Zelenskyy tha se sulmi mund të vijë nga Bjellorusia.

Zelensky përmendi Bjellorusinë si një trampolinë për një sulm të mundshëm në të ardhmen.

Sipas tij, Rusia po përgatit 15 divizione rreth 150 mijë trupa në drejtimin e Bjellorusisë. “Nuk jam i sigurt nëse do të sulmojnë Ukrainën, por do të sulmojnë. Ndoshta Ukrainën, ndoshta Poloninë, ndoshta vendet baltike”,- tha Zelenski.

Më herët këtë javë, Shërbimi Danez i Inteligjencës së Mbrojtjes dha një paralajmërim të ngjashëm, duke thënë se Rusia mund të gjejë mundësinë për të nisur një luftë në shkallë të gjerë në Evropë brenda pesë viteve.

Në fillim të vitit 2022, Rusia përdori Bjellorusinë si një trampolinë për pushtimin e saj në shkallë të plotë të Ukrainës. Kjo u parapri nga lejimi i forcave të armatosura ruse nga Minsku për të zhvilluar “stërvitje ushtarake” disajavore, të cilat ishin një fasadë për pushtimin e planifikuar.

Më 24 shkurt, trupat ruse hynë në Ukrainë nga Bjellorusia, duke pushtuar menjëherë pjesët veriore të rajoneve të Kievit dhe Çernihivit.

Forcat ruse hynë në qytetet kryesore duke i mbajtur ato të pushtuara deri në fund të marsit. Sipas vlerësimeve të NATO-s, forca sulmuese që hyri në Ukrainë nga Bjellorusia kishte deri në 30 mijë  trupa ruse.

Dhjetorin e kaluar, aleati i Putinit, Alexander Lukashenko, tha se vendi i tij po priste dhjetëra armë bërthamore ruse dhe do të përgatiste objekte për dislokimin e planifikuar të raketave më të reja balistike hipersonike të Moskës.

Negociatat për Ukrainën kanë hyrë në një fazë delikate pas bisedës telefonike mes Donald Trump dhe Vladimir Putin, e cila ka nxitur reagime të shumta në arenën ndërkombëtare.

Nga njëra anë, Putin kërkon një takim të drejtpërdrejtë me Trump, duke anashkaluar Evropën, ndërsa nga ana tjetër, Uashingtoni paralajmëron sanksione ndaj Moskës nëse kjo e fundit dështon në arritjen e një marrëveshjeje.

Trump ka deklaruar se negociatat për përfundimin e konfliktit kanë nisur dhe ka paralajmëruar takime mes zyrtarëve amerikanë, rusë dhe ukrainas.

Takimi i parë pritet të zhvillohet në Mynih gjatë Konferencës së Sigurisë, ndërsa një tjetër është planifikuar për javën e ardhshme në Arabinë Saudite.

Megjithatë, takimi i Mynihut mbetet i pasigurt, pasi Moska ka deklaruar se nuk është ftuar zyrtarisht, ndërsa presidenti ukrainas Volodymyr Zelensky ka pohuar se ende nuk ka parë një plan konkret nga SHBA për përfundimin e luftës.

Në një intervistë për “Wall Street Journal”, zëvendëspresidenti amerikan J.D. Vance ka paralajmëruar se Rusia mund të përballet me sanksione dhe masa të tjera, përfshirë opsionin e dërgimit të trupave amerikane në Ukrainë, nëse Putin nuk pranon të negociojë në mirëbesim.

“Opsioni për të dërguar trupa amerikane në Ukrainë mbetet në tryezë nëse Moska refuzon të angazhohet seriozisht në negociata. Ukraina duhet të ruajë pavarësinë dhe sovranitetin e saj,” ka deklaruar Vance.

Nga ana tjetër, Putin ka shprehur dëshirën për një takim sa më të shpejtë me Trump për të diskutuar Ukrainën dhe çështje të tjera, duke e konsideruar Uashingtonin si ndërmjetësin kryesor, ndërkohë që për Evropën roli i saj në negociata mbetet i paqartë.

Lidhur me pjesëmarrjen e Ukrainës, Kremlini ka nënvizuar se “në një mënyrë apo tjetër, Kievi do të jetë pjesë e bisedimeve.”

Sekretari i Përgjithshëm i NATO-s, Mark Rutte, ka theksuar se aleatët evropianë duhet të përcaktojnë qartë ofertat e tyre për një marrëveshje paqeje midis Rusisë dhe Ukrainës.

“Evropa duhet të vijë me plane konkrete dhe të bazuara në realitet. Ne kemi treguar më parë se mund ta bëjmë këtë,” ka deklaruar Rutte nga Mynihu.

Në Konferencën e Sigurisë në Munih zëvendëspresidenti i SHBA-ve, JD Vance, vazhdon të sugjerojë se ka pasur një tërheqje të “vlerave themelore” në Europë.

Ai thotë se nuk është e qartë çfarë ka ndodhur me “fituesit e Luftës së Ftohtë”, duke dhënë si shembull Brukselin, i cili ka “mbyllur mediat sociale gjatë trazirave civile”, raporton BBC.

“Në Britani dhe në të gjithë Europën, liria e fjalës, kam frikë, po tërhiqet“, thotë ai në konferencë.

Vance më pas thotë se ka ardhur në konferencë me një ofertë. “Ka një sheriff të ri në qytet”, thotë ai, duke iu referuar presidentit të SHBA-ve, Donald Trump.

SHBA mund të mos pajtohen me pikëpamjet e Gjermanisë, vazhdon ai, por “ne do të luftojmë për të drejtat tuaja për t’i shprehur ato”.

Vance pohoi temat si buxhetet e mbrojtjes priten të diskutohen në konferencë në ditët e ardhshme, dhe u thotë të pranishmëve se SHBA beson se vendet evropiane duhet të luajnë një “rol më të madh” në të ardhmen e kontinentit.

Më pas, ai thotë se po bëhet gjithnjë e më e paqartë se për çfarë po e mbron veten Europa.

“Cili është vizioni pozitiv që ngjall këtë pakt sigurie?” pyet Vance.

“Besoj thellësisht se nuk ka siguri nëse ke frikë nga zërat dhe mendimet që udhëhoqen popullin tënd”, shtoi ai.