Kompania Meta, në pronësi të Mark Zuckerberg, është duke u përballur me një gjyq vendimtar në SHBA, që mund të çojë në ndarjen e saj nga platformat Instagram dhe WhatsApp.

Procesi gjyqësor nisi më 14 prill, pas një hetimi gjashtëvjeçar nga Komisioni Federal i Tregtisë, që pretendon se Meta ka shkelur ligjet e konkurrencës.

Sipas padisë, Meta përdori praktika antikonkurruese për të mbrojtur dominimin në tregun e rrjeteve sociale personale.

FTC pretendon se blerjet e Instagram më 2012 dhe WhatsApp më 2014 ishin mënyra për të eliminuar kërcënimet konkurruese ndaj Facebook. Në dokumente citohet një email i Zuckerberg nga viti 2008 ku thuhet: “Është më mirë të blesh sesa të konkurrosh”.

Për më tepër, Meta akuzohet se ka vendosur kushte kufizuese për zhvilluesit që përdorin platformën e saj, në mënyrë që të frenojë rritjen e konkurrentëve potencialë. FTC argumenton se kjo sjellje ka dëmtuar përdoruesit, duke kufizuar zgjedhjen, cilësinë dhe inovacionin në rrjetet sociale.

Nga ana tjetër, Meta i është përgjigjur akuzave me një deklaratë ku i konsideron pretendimet e FTC-së si të dobëta dhe të shkëputura nga realiteti.

Jennifer Newstead, drejtuese e çështjeve ligjore në Meta, theksoi se tregu i rrjeteve është kompleks përfshin konkurrentë si TikTok, YouTube, iMessage dhe X.

Sipas saj, Instagram ka përfituar nga blerja nga Meta e ofron përvojë më të mirë për përdoruesit. Megjithatë, nëse Meta humbet procesin, Zuckerberg mund të detyrohet të shesë Instagram dhe WhatsApp – një vendim që do të kishte pasoja të mëdha për të ardhmen e rrjeteve sociale globale.

Lucy Guo, themeluesja e Passe, ka kaluar Taylor Swift si gruaja më e re miliardere. Guo, 30 vjeç, përfshihet në listën e Forbes të grave miliardere të bëra vetë.

Sipas Forbes, ajo është një nga gjashtë miliarderet e vetë-krijuara në botë në botë nën moshën 40 vjeç. Guo është e vetmja në atë listë që e ka ndërtuar pjesën më të madhe të pasurisë së saj nga një kompani ku nuk punon më. Ish-startup-i i saj Scale AI është vendosur për ofertë tenderi me vlerë 25 miliardë dollarë.

Lucy u lind më 14 tetor 1994, u rrit në Fremont, Kaliforni nga prindër emigrantë kinezë, që ishin të dy inxhinierë elektrikë. Pavarësisht prejardhjes teknike, prindërit e saj hezitonin që ajo të ndiqte një karrierë në teknologji, duke besuar se do të ishte sfiduese për një grua të kishte sukses në këtë fushë.

Interesi i Guo për teknologjinë nisi herët, filloi të kodonte në klasën e dytë si adoleshente, zhvilloi robotë për lojëra online si Neopets, duke shitur asete në lojë për fitim. Ajo u regjistrua në Universitetin Carnegie Mellon për të studiuar shkenca kompjuterike, por më vonë e braktisi shkollën pasi mori Thiel Fellowship , një grant prej 100,000 dollarësh që inkurajonte sipërmarrësit e rinj të ndiqnin sipërmarrjet e tyre.

Pas Carnegie Mellon, internoi në Facebook e i’u bashkua Snapchat si dizajnerja e parë femër e kompanisë, duke kontribuar në zhvillimin e Snap Maps. Më pas punoi në Quora, ku u takua me Alexandr Wang me të cilin vazhdoi të bashkëthemelonte Scale AI në 2016.

Guo u largua nga ScaleAI dy vjet pasi e filloi atë, me bazë në San Francisko, Scale AI vlerësohet në 14 miliardë dollarë dhe një ofertë e re tenderi mund ta çojë në 25 miliardë dollarë. Guo ende mban rreth 5% të kompanisë, duke i dhënë asaj një aksion me vlerë rreth 1.2 miliardë dollarë.

Pas daljes nga ScaleAI, Guo nisi Backend Capital, një firmë sipërmarrje që mbështet inxhinierë të talentuar. Por, nuk qëndroi larg ndërtimit për shumë kohë.

Më 2022, themeloi Passes, platformë e krijuar për të fuqizuar krijuesit e përmbajtjes duke u ofruar mjete për të fituar para nga puna. Platforma fitoi shpejt tërheqje, duke mbledhur 40 milionë dollarë në një raund financimi të Serisë A deri në vitin 2024.

Që nga prilli 2025, pasuria neto e vlerësuar e Guo është 1.25 miliardë dollarë, duke e bërë atë miliarderen grua më të re në botë në moshën 30-vjeçare.

Pas një pauze trevjeçare, OnePlus është rikthyer në prodhimin e pajisjeve të serisë T, dhe modeli i ri mban emrin 13T.

OnePlus 13T nuk sjell përmirësime në specifika, por ka ndjekur qasje të ndryshme krahasuar me modelin OnePlus 13, me theks të veçantë në ergonomi. Pajisja është prezantuar në Kinë dhe pritet të dalë në tregun global në muajt e ardhshëm.

Bëhet fjalë për një smartphone premium kompakt me ekran LTPO AMOLED 6.32 inç, rezolucion FHD+ dhe frekuencë freskimi adaptive nga 1 deri në 120 Hz.

OnePlus 13T është pak më shumë se 150 mm i gjatë dhe pak më pak se 72 mm i gjerë, çka e bën më të lehtë për t’u përdorur me një dorë. Në ekran është integruar një sensor optik për shenjat e gishtave, ndërsa kamera e përparme është 16 MP. Paneli është i mbrojtur me xhamin Oppo Crystal Shield.

Butoni i njohur Alert Slider është zëvendësuar me një buton të ri, Shortcut Key, i cili ende ofron mundësinë për të ndërruar profilin e zërit, por gjithashtu mund të programohet për shkurtore dhe aplikacione të ndryshme.

Shumica e telefonëve kompaktë nuk kanë bateri të mëdha, por 13T është përjashtim. Ai furnizohet nga një bateri silikoni-karboni me kapacitet 6200 mAh, që mbështet karikim prej 80W. OnePlus ka shtuar edhe një hapësirë për ftohje prej 4400 mm² VC për të mbajtur temperaturën nën kontroll.

Në pjesën e pasme ndodhet kamera kryesore 50 MP me sensorin IMX906, si dhe një modul telefoto 2x, 50 MP. Smartphone-i funksionon me procesorin më të avancuar të Qualcomm, Snapdragon 8 Elite, i cili mund të shoqërohet me deri në 16 GB RAM dhe 1 TB memorie të brendshme.

Pajisja përdor ColorOS 15 të bazuar në Android 15. Versioni ndërkombëtar pritet të përdorë sistemin OxygenOS.

Gjithashtu, 13T ka certifikimin IP65 për qëndrueshmëri ndaj ujit dhe pluhurit.

Smartphone-i është i disponueshëm në ngjyrë gri, rozë dhe zi. Versioni me 12 GB RAM e 256 GB memorie të brendshme kushton 446 dollarë në Kinë, ndërsa për versionin më të avancuar me 16 GB RAM dhe 1 TB memorie të brendshme, çmimi arrin në 617 dollarë.

Presidenti i Shteteve të Bashkuara të Amerikës, Donald Trump, ka premtuar se “vendet e punës dhe fabrikat do të rikthehen në SHBA”, pas zbatimit të tarifave të pashembullta anembanë botës në atë që ai e quajti si “Dita e Çlirimit”.  

Me tarifat e tij në zbatim, rritja e çmimeve në produktet si veshmbathjet e deri te pajisjet elektronike mund të jetë barrë e madhe për konsumatorët amerikanë. Një ekspert i teknologjisë ka paralajmëruar se çmimi i telefonit të famshëm, iPhone, mund të arrijë deri në 3,500 dollarë nëse kompania Apple fillon me montimin dhe prodhimin e këtyre telefonave në SHBA.

iPhone i prodhuar në Amerikë mund të kushtojë trefish më shumë se çmimi i tanishëm prej 1,000 dollarësh, për shkak se do të ishte e domosdoshme të imitohej rrjeti i ndërlikuar i prodhimit që ekziston në Azi.

Që nga inaugurimi i Trumpit në fund të muajit janar, aksionet e Appleit kanë humbur rreth 25 për qind të vlerës për shkak të shqetësimeve në lidhje me ndikimin e tarifave në zinxhirin e furnizimit, i cili është shumë i varur nga Kina dhe Tajvani. Rreth 90% e iPhoneve montohen në Kinë.

Prodhimi dhe montimi i pjesëve të telefonave inteligjentë u zhvendos në Azi dekada më parë, pasi kompanitë amerikane u përqendruan kryesisht në zhvillimin e softuerëve dhe dizajnimin e produkteve, të cilat gjenerojnë margjina shumë më të larta fitimi.

Kjo lëvizje e ka ndihmuar Apple të bëhet një nga kompanitë më të vlefshme të botës dhe të konsolidojë pozitën si prodhues dominant i telefonave të mençur.