Kryeministri i Kosovës, Albin Kurti, ka zhvilluar një takim me presidentin e ri të Këshillit Evropian, António Costa, në Bruksel.

Kryeministri Kurti tha se Kosova është e përkushtuar që të përparojë në rrugën drejt BE-së.

“Në Bruksel pata kënaqësinë që të takoj dhe të bashkëbisedoj me Presidentin e ri të Këshillit Evropian, António Costa, i cili sonte është gjithashtu nikoqir i darkës me liderë të Ballkanit Perëndimor. Kosova është e përgatitur dhe e përkushtuar që të përparojë në rrugën drejt BE-së”, shtoi Kurti.

Kurti poashtu i ka shprehur urime për detyrën e re.

“Duke e uruar për detyrën e re dhe suksese të shumta gjatë angazhimit të tij, i ofrova bashkëpunim të ngushtë dhe të sinqertë, gjersa vendi ynë mbetet i palëkundur në përkushtimin për integrim brenda familjes evropiane, aty ku Kosova përket”, përfundoi Kurti.

Sindikata e Bashkuar e Arsimit, Shkencës dhe Kulturës do të mbajë sot protestë me kërkesat për rritjen e pagave dhe nënshkrimin e kontratës kolektive, në të kundërtën kërcënon me greva.

Sindikalistët janë të pakënaqur me vendimin e Qeverisë së Kosovës për rritjen e pagave dhe njëherësh me mungesën e Kontratës Kolektive.

Protesta nis nga ora 12:30, te Biblioteka Kombëtare e Kosovës, prej nga do të vazhdojë deri para objektit të MASHTI-t, ku do të shpalosen kërkesat dhe do të kërkohet takim me ministren Arbërie Nagavci, në përpjekje për të arritur marrëveshje të pranueshme për të dy palët.

Protesta do të vazhdojë më pas deri te Qeveria e Kosovës dhe pritet të përfundojë në ora 15:00.

Ministrja Nagavci dje ka pritur drejtuesit e SBASHK-ut, por takimi ka përfunduar pa asnjë rezultat.

Kryetari i SBASHK-ut, Rrahman Jasharaj, ka paralajmëruar se në protestë do të marrin pjesë rreth 2.000 punonjës të arsimit nga e gjithë Kosova dhe aty do të vendoset edhe për veprimet tjera sindikale.

Sektori i kujdesit shëndetësor në Bashkimin Europian po përballet me një paradoks të thellë në vitin 2024. Pavarësisht se numri i mjekëve dhe infermierëve ka arritur nivele rekord, një raport i Organizatës Botërore të Shëndetësisë (OBSH) parashikon se deri në vitin 2030, mungesat e stafit do të arrijnë deri në katër milionë profesionistë.

Kjo ndodh ndërkohë që demografia po krijon sfida të mëdha: një popullsi që plaket dhe një fuqi punëtore në rënie do të rrisin kërkesën për profesionistë të kujdesit shëndetësor, ndërsa numri i njerëzve në moshë pune po zvogëlohet. Pasojat janë të dukshme, me kërkesa të vazhdueshme për kushte më të mira pune dhe paga më të larta nga punonjësit e sektorit.

Në këto kushte, shumë shtete të BE-së janë të detyruara të mbështeten në profesionistë të ardhur nga jashtë për të mbushur boshllëqet. Ndërkohë, shumë mjekë dhe infermierë janë tërhequr nga sektori për shkak të kushteve të pasigurta të punës, pagave të ulëta dhe pasigurisë politike dhe ekonomike. Të rinjtë gjithashtu po shfaqin një interes të ulët për karrierat në kujdesin shëndetësor, duke thelluar më tej krizën. Kjo situatë e rënduar ka nxitur protesta nga profesionistët e kujdesit shëndetësor në të gjithë Evropën, të cilët kërkojnë përmirësime urgjente në kushte dhe kompensime.

Në përpjekje për të adresuar këto probleme, autoritetet evropiane po shqyrtojnë ndryshime të thella në organizimin e punës dhe përdorimin e teknologjive të reja. Raporti i OECD-së thekson se, megjithëse përdorimi i inteligjencës artificiale dhe automatikës mund të ndihmojë në rritjen e produktivitetit, ai nuk mund të zëvendësojë nevojën për më shumë staf. Ndërkohë, politika shëndetësore e BE-së po kalon nga reagimi ndaj krizës në një qasje më proaktive, duke u fokusuar gjithashtu në parandalimin e sëmundjeve dhe promovimin e inovacionit për të përmirësuar efikasitetin e sistemit./UBTNews/