Pas shkarkimit të Jon Dahl Tomasson, Federata Suedeze e Futbollit ka nisur kërkimin për një trajner të ri të kombëtares. Një nga emrat që ka dalë në qarkullim është ai i Graham Potter, ish-trajner i Chelseat dhe së fundmi i West Ham United.

Potter, i cili aktualisht është pa angazhim, nuk e ka fshehur interesimin e tij për të marrë drejtimin e “Tre Kronorëve”.

Në një intervistë për një gazetë skandinave, ai deklaroi:

“Jam në Suedi tani, në shtëpinë time këtu. Jam i papunë dhe sapo u largova nga Premier League. Jam i hapur për çdo gjë, me të vërtetë, ku ndiej se mund të kontribuoj. Puna e trajnerit të ekipit kombëtar suedez është fantastike. Kam ndjenja për Suedinë. E dua vendin dhe e dua futbollin suedez. Kam shumë për të qenë mirënjohës në futbollin suedez. Pra, po, padyshim që do të ishte një mundësi fantastike për mua.”, tha ai.

Graham Potter ka një lidhje të veçantë me Suedinë, pasi në të kaluarën ka drejtuar ekipin Östersunds FK, me të cilin arriti suksese të mëdha, përfshirë edhe pjesëmarrjen historike në fazën e grupeve të Europa League.

Federata Suedeze ende nuk ka dhënë ndonjë koment zyrtar për kandidaturat, por emri i Potter shihet si një ndër më të mundshmit për të marrë drejtimin e kombëtares pas krizës së fundit të rezultateve./S.K/KP/

GO+ Peja debutoi me humbje në Ligën ENBL, pasi që skuadra u mund nga Riga Zelli me rezultat 72:83.

Fillimi i ndeshjes ishte i baraspeshuar, me të dy skuadrat, që nuk arrinin të shkëputeshin, derisa çereku i parë përfundon 20:17.

Mysafirët ishin më të mirë në periudhën e dytë, që e fituan 21:30, për të shkuar në pushim me rezultat 41:47.

Periudha e tretë ishte tërësisht e barabartë, duke u karakterizuar me jo shumë pikë të shënuara, 15:15, kurse shifrat pas 30 minutash ishin 56:62. Në dhjetë minutat e fundit, nuk ndodhi përmbysja e vendasve, duke pësuar 72:83.

Te vendasit, Tajh Nugace Green kishte 20 pikë e shtatë kërcime, derisa Skyler Tyron Flatten shtoi 14 pikë.

Kjo ishte ndeshja e parë për pejanët në këtë ligë, ndërsa fitorja e dytë për skuadrën letoneze në dy ndeshje./S.K/KP/

Cristiano Ronaldo ka vendosur një tjetër rekord historik pasi shënoi dy gola në pjesën e parë të ndeshjes kundër Hungarisë, duke përmbysur rezultatin pas avantazhit fillestar të Szalai dhe duke i dhënë Portugalisë epërsinë 2-1.

Falë këtyre dy realizimeve, kapiteni i Portugalisë arrin në 41 gola në kualifikimet e Kupës së Botës, duke kaluar sulmuesin guatemalas Carlos Ruiz, i cili kishte 39.

Në podium qëndron edhe Lionel Messi, me 36 gola, që mban vendin e tretë në renditjen historike.

Nga futbollistët evropianë, përveç Ronaldos, në listën e 25 më të mirëve renditen: Robert Lewandowski (33 gola), Edin Džeko (29), Andriy Shevchenko (26), Harry Kane (23) dhe Memphis Depay (22)./S.K/KP/

Kombëtarja e Kosovës e bëri një hap gjigant drejt pozitës së dytë në grup në kualifikimet e Botërorit 2026.

Dardanët e mposhtën Suedinë në udhëtim me rezultat minimal, 1:0, ndërsa paraprakisht muajin e kaluar e kishin mundur të njëjtin kundërshtar me rezultat 2:0 në “Fadil Vokrri”.

Vedat Muriqi me shokë i kanë grumbulluar 7 pikë, 3 më pak se Zvicra, e cila është lidere me 10 pikë.

Deri në fund të kualifikimeve të Botërorit kanë mbetur për t’u luajtur edhe nga dy lojë për secilën Kombëtare në muajin nëntor.

Situata momentale në grup ia lejon Kosovës që ta synojë edhe vendin e parë, që do të thoshte kualifikim direkt në Kupën e Botës, e cila do të mbahet vitin tjetër në Shtetet e Bashkuara të Amerikës, në Kanada dhe në Meksikë.

Ndonëse do të jetë një mision i vështirë, ai nuk është edhe i pamundur.

Por, për ta arritur këtë, Kosovës nuk do t’i mjaftojnë dy fitore në nëntor, të cilat i ka të obligueshme.

Pra, me fitore të Dardanëve ndaj Sllovenisë dhe Zvicrës dhe me kusht që Helvetikët të mos e fitojnë paraprakisht lojën me Suedinë në muajin tjetër (barazim ose humbje), e natyrisht të humbin edhe nga Kosova, trupa e Franco Fodës me këtë rast do ta shkruante historinë duke shkuar direkt në Botëror.

Në versionin tjetër, Kosova mund të shkojë në Botëror nëse i grumbullon katër pikë në ndeshjet e nëntorit, e me kusht që Granit Xhaka me shokë t’i humbin dy takimet, me Suedinë dhe me Kosovën./S.K/EO/