E ardhmja e Vinicius Junior te Real Madridi po bëhet gjithnjë e më e paqartë, sepse kontrata e brazilianit skadon në vitin 2027 dhe rinovimi i tij nuk është zgjidhur ende, duke hapur derën për interesim të madh nga klubet e tjera.

Sipas DefensaCentral, Real Madridi ka bërë të ditur se nuk do të pranojë asnjë ofertë nën 100 milionë euro për sulmuesin dhe kjo shifër tashmë u është komunikuar agjentëve që pyesin çdo ditë për situatën e lojtarit.

Vetë lojtari ka treguar publikisht se dëshiron të vazhdojë te Real Madridi, por me ardhjen e trajnerit Xabi Alonso roli i tij ka ndryshuar.

Ai nuk është më titullar i padiskutueshëm, për shkak të sistemit më të ngurtë dhe rotacioneve që po përdor trajneri. Ky ndryshim ka krijuar pasiguri te lojtari dhe ka vënë në pikëpyetje të ardhmen e tij në klub.

Presidenti i Real Madridit, Florentino Pérez, është i vendosur të mos humbasë kontrollin mbi situatën: ose rinovim, ose shitje por asnjë largim me ulje çmimi.

Muajt e ardhshëm do të jenë vendimtarë dhe nëse Vinicius ndihet i rëndësishëm në projektin e Xabi Alonsos, rinovimi mund të bëhet realitet.

Për momentin, një gjë është e sigurt se Real Madridi nuk pranon oferta nën 100 milionë euro për yllin brazilian./S.K/KP/Al Jazeera/

Deputeti i Lidhjes Demokratike të Kosovës, Armend Zemaj, ka kërkuar nga presidentja Vjosa Osmani të respektojë afatet kushtetuese për shpalljen e zgjedhjeve të parakohshme, pas dështimit të Glauk Konjufcës për ta formuar qeverinë e re.

Ai, në hollin e Kuvendit, tha se dështimi i dytë i LVV-së për të formuar qeverinë tregon se qytetarët u mashtruan, pasi nuk kanë pasur numrat e nevojshëm për ekzekutivin e ri.

“Vendi po shkon drejt zgjedhjeve të jashtëzakonshme dhe ne bëjmë thirrje për zgjedhje të lira dhe demokratike, pa ndërhyrje dhe pa tendencë, ashtu si kemi parë këto ditë vazhdimisht nga LVV-ja si grup politik parlamentar. Presidentja e vendit duhet të respektojë afatet kushtetuese dhe të mos lejojë asnjë ndërhyrje të kujtdo qoftë në vendimmarrjen e saj”, tha ai.

Sipas tij, pas dështimit të formimit të qeverisë së re, nuk duhet të thirret asnjë seancë për zgjatjen buxhetore të paralajmëruar nga presidentja Osmani.

“Ata që kanë mashtruar qytetarët se kanë numrat janë Lëvizja Vetëvendosje. Që nga fillimi dhe deri në përfundim të zgjedhjeve të 9 shkurtit, ata deklaruan se kishin një shumicë, por kjo shumicë u dyshua se nuk ekzistonte dhe nuk e kishin as sot. Me votimin kundër të mandatarit të dytë ka përfunduar gjithçka, dhe çdo thirrje për një seancë, përveç nëse kemi gjendje emergjente, çdo thirrje tjetër është tendencë për kamuflim dhe mashtrim”, theksoi ai.

Deputeti i Partisë Demokratike të Kosovës (PDK), Memli Krasniqi ka thënë se presidentja Vjosa Osmani duhet që sa më parë të shpall datën e zgjedhjeve të jashtëzakonshme.

Pas dështimit të formimit të Qeverisë Konjufca, ai tha para mediave se nuk ka kohë për t’u humbur dhe se vendi ka nevojë për institucione legjitime dhe funksionale.

“Pas këtij dështimi të paralajmëruar e pas kësaj blerjeje kohë të panevojshme të 15 ditëshit të fundit me kinse mandatarin e dytë Konjufca, presidentja e Republikës e ka obligim që sa më parë ta shpall datën e zgjedhjeve që të mos humbet kohë e vlefshme edhe më tej sepse qytetarët kanë nevojë për institucione legjitime dhe funksionale. Edhe propagandimi i të pavërtetave të shumta që u tentua të bëhet sot me seancën e parë, nuk pinë ujë. Kosova nuk është duke i rrezikuar as fondet e Bashkimit Evropian me mos votimin e sotëm, as nuk e ka rrezikuar kreditë e Bankës Botërore me mos votimin e sotëm, e as qytetarët e Kosovës nuk mbesin pa pagat e tyre në vitin e ardhshëm për mos votimin e buxhetit të sotëm. Në fakt ajo që ka mundur të ndodhte sot me votimin e atyre pikave do të ishte një përligjje e mentalitetit anti-kushtetutes, një përligjje e qasjes e cila nuk mërzitet për ligjet dhe Kushtetutën e Kosovës”, deklaroi ai.

Ish-kryetari i PDK-së, Memli Krasniqi thekson se “mentaliteti bllokues i Albin Kurtit e ka sjellë Kosovën në këtë situatë”.

“Kanë kaluar mbi nëntë muaj që qytetarët e Kosovës kanë folur me votën e tyre dhe i patën thënë një jo të madhe të ashtuquajturit referendum të Albin Kurtit, duke i thënë jo po ashtu mentalitetit të qeverisjes një partiake e autokratike. Po ashtu kanë kaluar më shumë se shtatë muaj kur jemi mbledhur si të zgjedhurit e popullit këtu në Kuvendin e Kosovës për të konstituuar Kuvendin e Kosovës dhe për t’i dhënë përsëri qytetarëve institucione legjitime. Asnjëra nga këto nuk ka ndodhur. Më vjen keq që për herë të parë këtu para jush, qysh më 27 prill, apo ndoshta më 23 prill që ky ngërç do të vazhdojë nëse nuk tërhiqet zotëri Kurti nga mentaliteti i tij bllokues dhe përfundimi do të jetë zgjedhjet e jashtëzakonshme. Kam kërkuar qysh atëherë që këto zgjedhje të mbahen më herët, në qershor në mënyrë që qytetarët ta thonë fjalën e tyre edhe herë për të dhënë drejtimin që ata e kërkojnë. Kjo nuk ka ndodhur, sepse ky mentalitetit bllokues i LVV-së dhe i zotëri Kurti e ka sjellur Kosovën pikërisht në këtë situatë”, tha ai.

Kabineti qeveritar i prezantuar nga mandatari për kryeministër, Glauk Konjufca mori vetëm 56 vota. Ai dështoi të formojë qeverinë e re, kështu vendi do të mbajë zgjedhje sërish.

Pro qeverisë Konjufca votuan vetëm deputetët e Lëvizjes Vetëvendosje, Guxo, Alternativa, si dhe tetë deputetë të komuniteteve jo shumicë.

Ndërkaq kundër votuan 53 deputetët e PDK-së, LDK-së, AAK-së, Listës Serbe, kurse tre deputetët e Nisma Socialdemokrate abstenuan./KP

UEFA ka aprovuar rikthimin e Barcelonës në Camp Nou për ndeshjet e Ligës së Kampionëve, pasi stadiumi i rindërtuar pjesërisht tashmë i plotëson kushtet e nevojshme të sigurisë.

Ky vendim vjen pak ditë pas ndeshjes së parë të Barcelonës në kampionat në Camp Nou, duke i dhënë fund më shumë se dy viteve mërgim në stadiumin olimpik të Montjuic dhe në qendrën stërvitore Johan Cruyff.

Ndeshja e parë evropiane në Camp Nou do të luhet më 9 dhjetor, ku Barcelona pret Eintracht Frankfurtin. Stadiumi, i cili po rinovohet me një projekt prej 1.5 miliardë eurosh, për momentin do të funksionojë me kapacitet të reduktuar prej 45,401 vendesh.

Rihapja është vonuar disa herë për shkak të problemeve me licencat e sigurisë dhe vonesave në punimet e ndërtimit, duke i shkaktuar klubit humbje të konsiderueshme financiare.

Para rikthimit, Barça hapi dyert për 23,000 tifozë në një seancë prove stërvitore.

Kur punimet të përfundojnë plotësisht, Camp Nou i ri pritet të ketë kapacitet 105,000 spektatorë, duke u rikthyer si një nga stadiumet më të mëdha dhe modernë në botë./S.K/KP/