Botë

Armëpushimi në Gazë mbetet i largët, ndërsa negociatorët kërkojnë marrëveshje

Published

2 years ago

on

Të mërkurën, negociatorët po përpiqen të finalizojnë detajet e fundit të një marrëveshjeje të ndërlikuar armëpushimi në Gazë, pas bisedimeve maratonë në Katar që synojnë t’i japin fund konfliktit që ka shkaktuar vdekje dhe shkatërrime masive dhe ka tronditur Lindjen e Mesme.

Bisedimet e gjata, më shumë se tetë orëshe, kishin nxitur optimizëm në Doha të martën. Zyrtarë nga Katari, Egjipti dhe SHBA-ja, si dhe nga Izraeli dhe Hamasi – organizatë e shpallur terroriste nga SHBA-ja dhe BE-ja – thanë se një marrëveshje për një armëpushim në enklavën palestineze dhe për lirimin e pengjeve ishte më afër se kurrë.

Por, një zyrtar i lartë i Hamasit i tha Reuters të martën vonë se grupi palestinez ende nuk kishte dorëzuar përgjigje sepse po priste që Izraeli të dorëzonte hartat që tregojnë se si forcat e tij do të tërhiqeshin nga Gaza.

Gjatë bisedimeve disamujore të ndërprera për të arritur një armëpushim në luftën tashmë 15-mujore, të dyja palët kanë thënë edhe më parë se ishin afër një marrëveshjeje vetëm për të hasur në pengesa në minutën e fundit. Pikat e përgjithshme të marrëveshjes aktuale janë vendosur që në mes të vitit 2024.

Nëse ka sukses, armëpushimi i planifikuar me faza mund të ndalojë luftimet që kanë shkatërruar Gazën, kanë vrarë dhjetëra mijëra palestinezë, kanë zhvendosur pjesën më të madhe të popullsisë 2.3 milionëshe të para luftës dhe vazhdojnë të vrasin dhjetëra njerëz çdo ditë.

Kjo marrëveshje, nga ana tjetër, mund të zbusë edhe tensionet në të gjithë Lindjen e Mesme, ku lufta ka nxitur konflikte në Bregun Perëndimor, Liban, Siri, Jemen dhe Irak, dhe ka rritur frikën për një luftë të përgjithshme midis Izraelit dhe Iranit.

Izraeli nisi sulmin e tij në Gazë pasi luftëtarët e udhëhequr nga Hamasi kaluan kufijtë e tij më 7 tetor 2023, duke vrarë 1.200 njerëz dhe duke marrë më shumë se 250 pengje, sipas të dhënave izraelite.

Që atëherë, forcat izraelite kanë vrarë më shumë se 46.700 palestinezë në Gazë, sipas zyrtarëve shëndetësorë të enklavës.

Palestinezët shpresonin sërish që bisedimet e fundit të sillnin një lehtësim nga sulmet ajrore izraelite dhe të lehtësonin një krizë humanitare.

“Po presim armëpushimin dhe marrëveshjen. Zoti na ndihmoftë për ta përfunduar me të mira, na dhëntë paqe dhe na lejoftë të kthehemi në shtëpitë tona”, tha Amal Saleh, 54 vjeç, një banore e Gazës e zhvendosur nga lufta.

“Edhe nëse shkollat janë bombarduar, shkatërruar dhe rrënuar, ne thjesht duam të dimë se më në fund po jetojmë në paqe”, tha ajo.

Sipas planit, Izraeli do të rikuperonte rreth 100 pengje dhe trupa të mbetura nga ata të kapur në sulmet e 7 tetorit 2023 nga Hamasi, që nxitën luftën. Në këmbim, Izraeli do të lironte të burgosurit palestinezë.

Drafti i fundit është mjaft i ndërlikuar dhe përfshin shumë faza. Sipas kushteve të tij, hapat e parë do të përfshijnë një armëpushim fillestar gjashtë-javor.

Plani gjithashtu përfshin një tërheqje graduale të forcave izraelite nga Gaza qendrore dhe kthimin e palestinezëve të zhvendosur në veri të Gazës.

Marrëveshja do të kërkonte gjithashtu që Hamasi të lironte 33 pengje izraelite, së bashku me hapa të tjerë.

Drafti parasheh që negociatat për një fazë të dytë të marrëveshjes të fillojnë deri në ditën e 16-të të fazës së parë. Faza e dytë përfshin lirimin e të gjithë pengjeve të mbetura, një armëpushim të përhershëm dhe tërheqjen e plotë të ushtarëve izraelitë.

Edhe nëse palët ndërluftuese bien dakord për marrëveshjen në tryezë, ende do të ketë nevojë për negociata të mëtejshme përpara se të ketë një armëpushim përfundimtar dhe lirim të të gjitha pengjeve.

Nëse gjithçka shkon pa probleme, palestinezët, shtetet arabe dhe Izraeli duhet gjithashtu të bien dakord për një vizion për Gazën pas luftës, në një detyrë masive që përfshin garanci sigurie për Izraelin dhe miliarda dollarë investime për rindërtimin e Gazës./REL/

Related Topics:
Continue Reading

Lajmet

SHBA sulmon ishullin strategjik të Iranit në Ngushticën e Hormuzit

Published

3 hours ago

on

November 3, 2026

By

Shtetet e Bashkuara kanë ndërmarrë sulme ushtarake në ishullin Qeshm të Iranit, i cili gjendet në Ngushticën e Hormuzit, kanë konfirmuar zyrtarë amerikanë për rrjetin CBS. Agjencia shtetërore e lajmeve IRNA raportoi se të hënën janë dëgjuar disa shpërthime radhazi në ishull.

Zyrtarët amerikanë i përshkruan sulmet si mbrojtëse dhe të kufizuara, duke sqaruar se ato erdhën si përgjigje ndaj veprimeve të Korpusit të Gardës Revolucionare Islamike (IRGC) të Iranit, i cili kishte shënjestruar një avion ushtarak amerikan.

Ky veprim ushtarak vjen në prag të zgjedhjeve të sotme të mesmandatit në SHBA, që do të përcaktojnë kontrollin e Kongresit. Presidenti Donald Trump është përballur me presion edhe nga brenda partisë së tij për t’i dhënë fund konfliktit të hapur që filloi në shkurt pas sulmeve të përbashkëta SHBA-Izrael ndaj Iranit.

Pavarësisht goditjes, Trump deklaroi se nuk ka nxitim për të shkallëzuar më tej sulmet.

“Në një mënyrë ose në një tjetër, ne do të bëjmë diçka, por nuk ka nxitim. Ne i gjymtuam financiarisht. Ata nuk kanë para, nuk kanë benzinë dhe populli i tyre po lodhet shumë nga kjo”, tha Trump për agjencinë Axios.

Paralelisht me veprimet ushtarake, diplomacia vazhdon pas skenës. Ministri i Jashtëm i Iranit, Abbas Araghchi, konfirmoi për IRNA-n se po zhvillohen bisedime “shumë intensive” me SHBA-në nëpërmjet ndërmjetësve. Ai theksoi se Teherani është i përgatitur si për skenarë diplomatikë ashtu edhe ushtarakë, duke i lënë në dorë Uashingtonit të zgjedhë mes rrugës së negociatave ose gabimit të agresionit. /BBC/

Continue Reading

Lajmet

Zgjedhjet e sotme në SHBA: Test për Presidentin Trump dhe shumicën në Kongres

Published

4 hours ago

on

November 3, 2026

By

Më shumë se 57 milionë amerikanë kanë votuar përpara kohe, ndërsa sot hapen qendrat e votimit në të gjithë SHBA-në për zgjedhjet e mesmandatit . Këto zgjedhje konsiderohen si një votëbesim i drejtpërdrejtë për dy vitet e para të mandatit të Presidentit Donald Trump dhe për përbërjen e re të legjislaturës në Uashington.

Në garë janë të gjitha 435 ulëset e Dhomës së Përfaqësuesve dhe 35 nga 100 ulëset e Senatit. Humbja e shumicës parlamentare në ndonjërën prej dhomave nga ana e republikanëve do të kufizonte ndjeshëm hapësirën e Presidentit Trump për të kaluar reformat e tij dhe do t’u jepte demokratëve mundësi për të nisur hetime parlamentare ndaj administratës.

Tema kryesore e fushates ka qenë kostoja e jetesës, ku votuesit kanë shprehur shqetësime për rritjen e çmimeve të ushqimeve dhe karburantit. Kjo rritje është ndikuar nga politikat e tarifave tregtare si dhe konflikti me Iranin, i cili e ngriti çmimin e naftës në nivele rekord gjatë muajve të fundit.

Donald Trump zhvilloi një seri tubimesh në ditët e fundit të fushates për të mobilizuar bazën e tij elektorale, duke u fokusuar edhe në shtete konservatore si Kansas dhe Iowa, ku garat janë bërë më të ngushta se sa pritej. Rezultatet e para pritet të rrjedhin gjatë orëve të vona të mbrëmjes, ndërsa numërimi përfundimtar në disa zona mund të zgjasë disa ditë. /The New York Times/

Continue Reading

Lajmet

Dështojnë bisedimet për buxhetin: Kryeministri i Belgjikës De Wever ofron dorëheqjen

Published

21 hours ago

on

November 2, 2026

By

Kryeministri i Belgjikës, Bart De Wever, i ka ofruar dorëheqjen Mbretit Philippe pas dështimit të negociatave për buxhetin brenda koalicionit të tij pesëpartiak.

Nacionalisti konservator flamand, i cili mori detyrën në shkurt të vitit 2025 për të trajtuar borxhin e lartë të vendit, nuk arriti të sigurojë mbështetjen e partnerëve të qeverisë për buxhetin e vitit 2027.

Pallati Mbretëror konfirmoi dorëheqjen, ndërsa Mbreti Philippe e ka shtyrë vendimin për pranimin e saj duke shprehur keqardhje për mungesën e marrëveshjes. Monarku belgjik do të nisë konsultimet me krerët e grupeve parlamentare të martën, përpara se ta presë sërish De Weverin në takimin e së premtes. /BBC/

Continue Reading

Lajmet

Katër të vrarë dhe rreth 15 të plagosur nga të shtënat në tri lokacione në Dallas

Published

1 day ago

on

November 2, 2026

By

Katër persona janë vrarë dhe rreth 15 të tjerë janë plagosur pas tri incidenteve me armë zjarri gjatë natës në lagjen “Deep Ellum” të Dallasit, në Shtetet e Bashkuara të Amerikës.

Sipas policisë, të shtënat ndodhën në tri lokacione të ndryshme në këtë lagje, e njohur për jetën e natës, baret, restorantet dhe ambientet me muzikë live. Në disa lokale të zonës ishin organizuar ngjarje për festën e Halloween-it.

Shefi i Policisë së Dallasit, Daniel Comeaux, deklaroi gjatë një konference për media se ende nuk dihet nëse të shtënat ndodhën brenda ndonjë biznesi apo në rrugë. Ai bëri të ditur se hetimet paraprake nuk kanë zbuluar ndonjë lidhje mes tri incidenteve.

Sipas njoftimit të policisë, të shtënat e para ndodhën rreth orës 00:20, të dytat pak pas orës 01:00, ndërsa incidenti i tretë u raportua rreth gjysmë ore më vonë.

Comeaux paralajmëroi se numri i të plagosurve mund të ndryshojë, pasi disa persona janë paraqitur vetë në institucionet shëndetësore për të marrë ndihmë mjekësore.

Disa persona janë arrestuar dhe po merren në pyetje, ndërsa policia po punon për identifikimin e autorëve dhe sqarimin e rrethanave të ngjarjeve. Megjithatë, ende nuk është konfirmuar nëse personat e arrestuar kanë lidhje me të shtënat.

Tri incidentet ndodhën brenda një distance prej rreth 800 metrash nga njëri-tjetri, në një zonë ku kishte prani të madhe të qytetarëve për shkak të aktiviteteve të Halloween-it.

Shefi i policisë bëri të ditur se numri i zyrtarëve policorë në terren ishte shtuar paraprakisht, për shkak të pritjes së turmave të mëdha gjatë festës.

/A.K/

Continue Reading

Të kërkuara