Kryetari i Partisë Demokratike të Kosovës (PDK), Memli Krasniqi, deklaroi sot se partia që ai drejton është e përkushtuar ndaj dialogut dhe bashkëpunimit politik për të gjetur zgjidhje ndaj krizës aktuale institucionale në vend. Ai konfirmoi se është i gatshëm për takime me të gjithë liderët politikë, përfshirë edhe Albin Kurtin, duke theksuar se “PDK ka kulturë politike të dialogut dhe nuk i ikë asnjë takimi”.

Në lidhje me propozimin e kryetarit të LDK-së, Lumir Abdixhiku, për krijimin e një qeverie tranzicionale, Krasniqi tha se kjo çështje do të diskutohet në mbledhjen e Kryesisë së PDK-së që mbahet sot pasdite. Ai shtoi se është lexuar publikisht propozimi dhe do të trajtohet me seriozitet brenda strukturave të partisë.

Megjithatë, Krasniqi shprehu kundërshtimin e qartë ndaj kandidaturës së Albulena Haxhiut për kryetare të Kuvendit të Kosovës, duke theksuar se “ajo nuk është person që i bën nder këtij Kuvendi”. Ai e cilësoi kandidaturën e saj si përçarëse dhe të dëmshme, duke përkujtuar përfshirjen e saj në akte si hedhja e gazit lotsjellës në sallën e Kuvendit.

Ai kritikoi ashpër Lëvizjen Vetëvendosje, duke e akuzuar për “marrje peng të shtetit” dhe për mospranimin e faktit se nuk ka shumicën parlamentare. “Ky është abuzim me të drejtën kushtetuese dhe dhunim i verdiktit të qytetarëve”, deklaroi Krasniqi, duke i bërë thirrje VV-së që të ndryshojë kandidatin për kryeparlamentar, pasi Haxhiu nuk do të mund të zgjidhet as në përpjekjet e ardhshme.

Krasniqi gjithashtu përmendi faktin se Kosova ka hyrë në muajin e tretë pa institucione funksionale, dhe shtoi se vendi ka nevojë urgjente për konsolidimin e Kuvendit dhe formimin e një qeverie legjitime.

Ndërkohë, seanca e 12-të për konstituimin e Kuvendit dështoi sërish për shkak të mungesës së kuorumit për formimin e komisionit verifikues. Kryesuesi i seancës, Avni Dehari i VV-së, kërkoi votim të fshehtë dhe propozime nga partitë për anëtarët e komisionit, por nuk mori mbështetje nga pjesa tjetër e spektrit politik. Seanca do të vazhdojë më 9 maj.

Autoritetet kosovare kanë sekuestruar armë dhe kanë arrestuar një të dyshuar për importin dhe eksportimin e armëve, gjatë një bastisjeje në disa lokacione në veri të Kosovës, njoftoi të mërkurën Sistemi Prokurorial i Kosovës.

Policia ka gjetur një punishte të armëve në Mitrovicën e Veriut, e banuar me shumicë serbe, ku sekuestroi “sasi armatimi, pjesë të ndryshme të armëve, makina që janë përdorur në ndërhyrje në armë”, thuhet në njoftim.

Bastisjet u kryen nga Policia e Kosovës, Prokuroria Themelore në Mitrovicë dhe Drejtoria kundër Krimit të Organizuar në Prishtinë, me urdhër të gjykatës.

I dyshuari, identiteti i të cilit nuk është bërë i ditur, është dërguar në mbajtje dhe akuzohet për disa vepra penale, përfshirë importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve, apo materieve plasëse, si dhe për armëmbajtje pa leje.

Autoritetet e sigurisë nuk dhanë më shumë hollësi në lidhje me atë se nga cilat vende apo se në cilat vendet mund të ketë importuar dhe eksportuar armë i dyshuari.

Në të kaluarën, Policia e Kosovës ka gjetur dhe konfiskuar armatim kohë pas kohe, veçanërisht në veri të vendit.

Më mars, autoritetet i arrestuan 16 të dyshuar, përfshirë një zyrtar policor, për kontrabandë me armë gjatë një operacioni të gjerë policor në jug dhe veri të Kosovës.

Asokohe zëvendësdrejtori i Policisë së Kosovës për veriun, Veton Elshani, tha për Radion Evropa e Lirë (REL) se në mesin e të arrestuarve ishte dhe një zyrtar policor, i cili ishte pezulluar gjatë arrestimit.

REL-i mësoi nga burimet e saj se polici i arrestuar ishte nga radhët e komunitetit serb./REL/

Partitë e komuniteteve jo-shumicë në Kosovë kanë kritikuar propozimin e kreut të LDK-së, Lumir Abdixhiku për qeveri tranzicionale. Deputeti Elbert Krasniqi tha se ai i ka ftuar vetëm subjektet politike shqiptare, duke i përjashtuar përfaqësuesit e komuniteteve jo shumicë në Kosovë. Sipas tij, kjo është qasje përjashtuese dhe jo në frymën multietnike të Kosovës.

“Ne përfaqësuesit e subjekteve politike të komuniteteve jo-shumicë në Kosovë, jemi si zakonisht për formimin e institucioneve sa më parë dhe sa më shpejt, në mënyrë që të ketë stabilitet dhe qëndrueshmëri përfaqësimi edhe në Kuvendin e Kosovës por edhe në Qeverinë e Kosovës. Po i përcjellim me vëmendje krejt këto zhvillimet e fundit edhe na duhet t’i themi dy gjëra që ne si parti politike të bashkuar në një grup politik kemi një vërejtje të madhe në deklaratën për media të zotëri Lumir Abdixhiku i cili i bën thirrje vetëm subjekteve politike shqiptare edhe përjashton përfaqësuesit e komuniteteve jo shumicë në Kuvendin e Kosovës. Jo nga fakti që po presim një ftesë për të ju përgjigj, mirëpo kjo qasje përjashtuese nuk është në frymën e Republikës së Kosovës, nuk është frymën multietnike të Kosovës dhe për këtë duhet të kemi një vërejtjeje të drejtpërdrejt”, tha ai.

Ai kritikoi edhe stagnimin që e ka përmendur Abdixhiku në këtë letër, për çka tha se për herë të parë ka gjithëpërfshirje të komuniteteve në qeveri.

Lidhja Demokratike e Kosovës (LDK) ka refuzuar koalicionin qeverisës me Lëvizjen Vetëvendosje, derisa ka kërkuar një qeveri tranzicionale deri në zgjedhjen e presidentit të vendit në vitin 2026.

Kryetari i Nismës Socialdemokrate, Fatmir Limaj tha se fillimisht do të shohin se si po shkon seanca  marr parasysh lëvizjet e fundit që kanë ndodhur.

Deputetët e Kuvendit të Kosovës janë mbledhur sot në përpjekjen e dymbëdhjetë për konstituimin e institucionit ligjvënës.

Derisa partitë politike nuk po arrijnë marrëveshje, procesi ka ngecur për shkak të mospajtimeve mes partisë që doli e para në zgjedhje (koalicioni Lëvizja Vetëvendosje, Guxo dhe Alternativa) dhe të tjerave (PDK, LDK dhe AAK), lidhur me emrin e kryetarit të Kuvendit. Kjo situatë ka bërë që 11 seanca të mëparshme të dështojnë.

Për të zhbllokuar situatën, kryetari i Vetëvendosjes, Albin Kurti, i ka dërguar një letër kryetarit të LDK-së, Lumir Abdixhiku, duke i ‘shtrirë dorën’ për bashkëpunim dhe duke propozuar hyrjen në një koalicion qeverisës.

Ndërkaq, Abdixhiku i është përgjigjur Kurtit gjatë ditës së djeshme përmes një letre, në të cilën propozon formimin e një qeverie tranzicionale me pjesëmarrjen e të gjitha partive politike në vend.

Limaj i pyetur nëse do t’i përgjigjet pozitivisht kërkesës së kreut të LDK-së, Lumir Abdixhiku tha shkurt se prej fillimit janë deklaruar pro takimeve.

“Të shohim se si po shkojnë zhvillimet në seancë, a ka lëvizje, të shohim çfarë lëvizje. Nuk do të thotë se të gjitha lëvizjet shkojnë në drejtim të duhur  por megjithatë ka një lëvizje… Ka pasur letra prej pardje, ka pasur komunikime me letra… E kemi thënë prej fillimit, jemi për takime”, tha ai para fillimit të seancës konstituive.

Kreu i Nismës, Fatmir Limaj  theksoi se do ta jap një deklarim më të gjatë për medie pas përfundimit të seancës.