Sport

Andi Kallaba, djaloshi i artë i Kosovës që po shkëlqen në Amerikë

Published

on

Andi Kallaba është njëri prej futbollistëve shqiptarë më të dalluar që luan në kolegjet amerikane. Ai po i gërsheton mjaft mirë shkollimin me pasionin e tij më të madh. 18 vjeçari ëndërron ta ketë një karrierë të suksesshme, ndërsa shpreson që një ditë të luajë për Kosovën ose për Shqipërinë

Shqiptarët e Kosovës kanë ditur të lënë gjurmë në vende të ndryshme të botës, në sfera dhe lëmi të ndryshme.

E një rrugë të tillë po e ndjek edhe Andi Kallaba, djaloshi i artë i Kosovës që është lindur dhe rritur në Shtetet e Bashkuara të Amerikës.

I riu me prejardhje nga Rogana e Kamenicës po i gërsheton për mrekulli shkollimin me pasionin e tij më të madh – futbollin.

Por, si kishte nisur gjithçka në jetën e Andit?

“Futbolli më ka pëlqyer qysh si fëmijë dhe kam marrë pjesë në të gjitha grupmoshat duke filluar nga fatosët e deri këtu në U-18 në klubin prestigjioz e shumë të njohur ‘MLS Chicago Fire’. Me punë çdoherë kam arritur që të jem lider dhe kapiten. Ndërkohë në të gjitha garat ku kam luajtur jam munduar që ta prezantoj me dinjitet klubin tim, qytetin tim si dhe dy vite më parë pata nderin që ta përfaqësoj Shtetin e Illinois në garat e nivelit më të lartë në USA ku pothuajse në çdo paraqitje kemi fituar si dhe pothuajse në çdo ndeshje kam fituar trofe dhe jam shpallur lojtari më i mire i lojës”, i tregon fillimisht Kallaba hapat e parë të karrierës në një bisedë me “Gazetën Express”.

Vlen të përmendet se futbollisti i lindur në Chicago më 1 qershor të vitit 2002 e kishte fituar Këpucën e Artë (Golden Boot) si mesfushori ofanziv më i mirë me 24 gola të shënuar si dhe 23 asistime.

Po ashtu, ai ishte shpallur edhe lojtari i vitit në Illinois për të gjitha shkollat e mesme (IHSA).

Pas përfundimit të shkollës së mesme, Andi tregon se ka pranuar oferta të shumta nga kolegje të ndryshme të D1 (divizioni1), që në Amerikë është rangu më i lartë për futboll.

Kjo padyshim se e ka bërë shumë të lumtur pasi që është ëndërr e çdo nxënësi që të jetë pjesë e ndonjë nga këto kolegje.

Ai vendosi të bëhet pjesë e UIC (University Illinois of Chicago), ku për momentin është lojtari më i ri në moshë në këtë kolegj (18 vjeçar).

Kallaba e ka një orar mjaft të ngjeshur, në mes studimesh e ushtrimesh dhe angazhimeve me ndeshje futbolli.

“Padyshim, jam shumë i angazhuar dhe nuk është një punë e lehtë pasi që më duhet që, krahas mësimeve, ligjëratave të shumta, të merrem edhe me stërvitje, lojëra të shumta, udhëtime të ndryshme etj. Por, por me vullnet të madh jam duke i bërë të gjitha dhe po e jap maksimumin pasi që ia kam vënë vetes një qëllim, dua të jem i suksesshëm”, shton Kallaba.

Për herë të parë, në universitetin ku po shkollohet ai, është vendosur flamuri i Kosovës dhe krejt kjo për meritë të Andit, dhe kjo sipas tij është një ndjenjë speciale.

“Wow, ngritja e flamurit të Kosovës – vendit tim për herë të parë në Amerikë në këtë Universitet ishte nder dhe privilegj për mua. Po ashtu, një ndjenjë e pa përshkruar në jetën time deri më tani. Shumë e veçantë pasi që isha i pari, por shpresoj që mos të jem i fundit që e promovoj Kosovën”, shton Kallaba.

Për momentin, ai thekson se garat po shkojnë mirë, por që, njëjtë si në krejt botën, edhe ai me shokë po përballen me vështirësi për shkak të COVID-19.

Kallaba nuk e ka ndërmend të ndalet, sa i përket futbollit, sepse ai synon që të bëhet futbollist i madh në të ardhmen.

“Gjithsesi, do të vazhdoj sepse futbolli është pasioni im i jetës dhe dua që ta vazhdoj traditën edhe të babait tim dhe familjes sime Kallaba. Shfrytëzoj rastin që t’i falënderoj të gjithë për inspirimin tim për këtë lloj sporti shumë të preferuar në mbarë botën”, thotë ndër të tjera ai për “Gazeta Express”.

Madje, qysh tash, klubet e ndryshme kanë filluar të interesohen për futbollistin e talentuar, i cili nuk e përjashton mundësinë që në të ardhmen të luajë edhe në futbollin evropian.

“Zakonisht, ofertat këtu në Amerikë nga klubet e mëdha vijnë gjatë kohës së studimeve dhe lojërave nëpër kolegje, apo pas mbarimit të studimeve. Unë tashmë e kam filluar një ëndërr timen qysh si fëmijë dhe pres oferta të ndryshme si në Amerikë, po ashtu edhe në Evropë. Kam pranuar oferta por nuk kam ndonjë gjë për të bërë publike”, nënvizoi Kallaba.

Ëndërr e tij po ashtu është që ta përfaqësojë njërën prej Kombëtareve shqiptare, Kosovën ose Shqipërinë në nivelin nacional.

“Qëllimi dhe dëshira e krejt këtij angazhimi është që një ditë shumë të afërme ta sfidoj veten si lojtar nën petkun e ndonjërës prej kombëtareve tona, Kosovës apo Shqipërisë. Nuk kam pasur ndonjë kontakt deri më tani, por pres me padurim që një ditë ta jap kontributin tim për vendin tim”, përfundoi Kallaba.

Një djalosh modest, kokulur, i vyeshëm dhe punëtor, Andi është model se si një i ri nuk duhet ta lë anash as shkollimin e as pasionin e tij. 

Sport

Luka Modric: “Serie A është një ligë shumë e vështirë, por e shijoj çdo moment”

Published

on

By

Luka Modric ka dhënë asistimin e tij të parë në Serie A mbrëmjen e së premtes, duke treguar se sa sfiduese mund të jetë kampionati italian. Mesfushori kroat ishte në formacionin titullar për Milanin në fitoren 2-0 ndaj Lecces në Stadio Via del Mare, ku golat u shënuan nga Ruben Loftus-Cheek dhe Christian Pulisic.

Pas ndeshjes, Modric ka shpërndarë mendimet e tij për eksperiencën në Serie A. Ai tha për DAZN dhe Sky Sport Italia: “Ndihem shumë mirë, gjithçka është perfekte. Shkoj mirë me shokët e ekipit, ndihem i qetë. Ende duhet të gjej një shtëpi, por përveç kësaj, gjithçka është mirë! Sigurisht, gjithçka ndihet edhe më mirë kur fiton.”

Milanit i ka duhur të ndryshojë formacionin nga 4-3-3 në një 3-5-2, dhe Modric ka përmendur kërkesat e trajnerit Massimiliano Allegri: “Ne ende po njihemi me njëri-tjetrin, ai më kërkoi ta ndihmoja ekipin të lëvizte me më shumë rrjedhshmëri. Po punoj për t’u rikthyer në formë fizike dhe shpresoj të jem në 100 për qind pas pushimit ndërkombëtar.”

Një tjetër detaj interesant është kërkesa e Allegrit që Modric të komunikojë më shumë me lojtarët e rinj, për t’i dhënë atyre më shumë besim në fushë. “Trajneri më kërkon të flas shumë në fushë, pasi ka shumë lojtarë të rinj dhe ata kanë nevojë për vetëbesim,” ka thënë ai.

Modric, i cili ka qenë tifoz i Milanit gjatë fëmijërisë së tij në Kroaci, shpjegoi gjithashtu arsyet që e bënë të bëjë realitet ëndrrën e tij për të luajtur në Serie A në moshën 39 vjeçare: “Gjithmonë e kam parë futbollin italian, ka shumë lojtarë kroatë këtu dhe mbi të gjitha e vlerësoj Milanin. Kam luajtur shumë ndeshje kundër ekipeve italiane, e di sa të organizuar janë taktikisht në çdo fazë.”

Modric e ka pranuar se Serie A është një ligë shumë e vështirë për t’u përshtatur, por është gjithashtu një përvojë që po e shijon. “Ende duhet të mësohem me këtë, pasi kjo është një ligë shumë e vështirë. Duhet të jemi në gatishmëri në çdo ndeshje dhe të japim gjithçka që kemi për të fituar. Deri tani, po e shijoj shumë atë që kam parë,” ka përfunduar ylli kroat.

Continue Reading

Sport

Fermin Lopez në prag të transferimit te Chelsea, Barcelona kërkon 90 milionë euro

Published

on

By

Fermin Lopez, mesfushori 22-vjeçar i Barcelonës, po kalon në një moment vendimtar për të ardhmen e tij te klubi katalanas. Shumë afër një transferimi të mundshëm te Chelsea këtë javë, Lopez është gjithashtu i lidhur me Newcastle United, i cili ka shprehur interes të fortë për shërbimet e tij.

Edhe pse trajneri Hansi Flick ka deklaruar më parë se dëshironte ta mbante Lopezin te Barcelona, Chelsea ka kontaktuar zyrtarisht për një transferim dhe mesfushori po shqyrton mundësinë e një largimi. Chelsea është e gatshme të dyfishojë pagën e tij për të siguruar një kalim në Stamford Bridge, por Barcelona ka vendosur një çmim të lartë prej 90 milionë eurosh, shumë që vetëm Newcastle është aktualisht në gjendje ta plotësojë.

Raportet nga Katalunia sugjerojnë se Lopez preferon të qëndrojë te Barcelona, por ka kërkuar leje për të negociuar me Chelsea. Për momentin, mbetet e paqartë nëse klubet janë të gatshme të arrijnë një marrëveshje, pasi Chelsea ka një limit prej 50 milionë eurosh për transferime.

Ish-mesfushori i Barcelonës, Sergio Busquets, ka dhënë një paralajmërim për shitjen e lojtarëve nga La Masia, duke theksuar rëndësinë e përvojës dhe mentalitetit që lojtarët e akademisë ofrojnë për klubin. Ai ka shtuar se, pavarësisht se është një vendim individual i lojtarit, Barcelona duhet të kujdeset për interesat e tij dhe të klubit.

Tifozët e Barcelonës janë të ndarë në lidhje me këtë çështje, ndërsa të gjitha palët tani presin një përditësim nga Lopez për të përcaktuar hapat e ardhshëm.

Continue Reading

Sport

Besnik Krasniqi pas kualifikimit historik: “Suksesi më i madh në karrierën time”

Published

on

By

Besnik Krasniqi, autori i golit vendimtar në fitoren e Dritës kundër Differdanget, ka shprehur entuziazëm të madh pas kualifikimit historik të skuadrës nga Gjilani në fazën e grupeve të Ligës së Konferencës së UEFA-s.

Drita fitoi të dyja ndeshjet e fazës play-off – 2-1 në Prishtinë dhe 1-0 në Luksemburg – me Krasniqin që shënoi nga pika e bardhë në sfidën e kthimit, duke vulosur rezultatin e përgjithshëm 3-1.

“Jam shumë i lumtur për fitoren dhe që goli im ishte vendimtar. Ishim pak në presion, pasi e kemi ditur se është natë historike. Dhe ia arritëm. Jam shumë i lumtur për tifozët e Dritës, po ashtu për presidentët që kanë bërë punë të jashtëzakonshme dhe e kanë merituar këtë,” tha Krasniqi pas ndeshjes.

Mesfushori e cilësoi këtë si suksesin më të madh në karrierën e tij deri më tani, por theksoi se skuadra nuk do të ndalet këtu: “Ky nuk është fundi. Kemi ende punë. Në grupe do të jemi më të qetë dhe do të bëjmë lojëra shumë më të mira.”

Ai gjithashtu u ndal te presioni që kishte ndjerë skuadra si favorite, por theksoi se menaxhimi i situatës ishte çelësi i suksesit: “Si favoritë kishim një lloj presioni, por e menaxhuam mirë dhe në fund u shpërblyem. Falënderoj tifozët dhe familjen time për mbështetjen.”

Continue Reading

Sport

Kualifikim historik dhe përfitime rekord për Shkëndijën

Published

on

By

Shkëndija e Tetovës është kualifikuar për herë të parë në fazën e grupeve të Ligës së Konferencës së UEFA-s, duke shënuar arritjen më të madhe në historinë e klubit, si në aspektin sportiv ashtu edhe atë financiar.

Skuadra e drejtuar nga Jeton Beqiri tashmë ka garantuar mbi 3 milionë euro përmes kësaj pjesëmarrjeje — një shumë rekord për futbollin në Maqedoninë e Veriut.

Sipas strukturës së shpërblimeve të UEFA-s, çdo ekip që arrin në fazën e grupeve përfiton 3.2 milionë euro si shpërblim bazë. Kjo shumë mund të rritet më tej, pasi çdo fitore në grup sjell 400 mijë euro shtesë, ndërsa një barazim vlerësohet me 133 mijë euro.

Kualifikimi për në grupe përfaqëson një hap të madh për Shkëndijën, duke i siguruar klubit stabilitet të rëndësishëm financiar dhe një bazë për zhvillim të mëtejshëm afatgjatë. Për më tepër, kjo pjesëmarrje e vendos klubin tetovar në një pozicion të ri në skenën evropiane, si përfaqësues i denjë i futbollit nga Maqedonia e Veriut.

Continue Reading

Të kërkuara